ဘင်္ဂလားဒေ့ရှ်မှ ထိပ်တန်း တိုက်လေယာဉ်မှူးဟောင်း ကွယ်လွန်

ဇွန် ၁၆၊ ၂၀၂၀
M-Media

-၁၉၆၇ ခုနှစ် အာရပ်-အစ္စရေး ၆ ရက်ကြာစစ်ပွဲအပါအဝင် မတူညီတဲ့နိုင်ငံ ၃ ခုက စစ်ပွဲတွေမှာ ပါဝင်တိုက်ခိုက်ခဲ့တဲ့ ဘင်္ဂါလီ တိုက်လေယာဉ်မှူးဟောင်းတစ်ဦး တနင်္ဂနွေနေ့မှာ ကွယ်လွန်သွားခဲ့ပါတယ်။

ဆိုက်ဖွလ် အာဇမ်လို့ခေါ်တဲ့ အဲဒီလေယာဉ်မှူးဟောင်းဟာ ကွယ်လွန်ချိန်မှာ အသက် ၇၉ နှစ်အရွယ် ရှိပါပြီ။

ဘင်္ဂလားဒေ့ရှ်သမိုင်းမှာ စစ်ဖက်ရော၊ နိုင်ငံရေးဖက်မှာပါ ထူး​ခြားထက်မြတ်တဲ့ ပုဂ္ဂိုလ်ဖြစ်တဲ့ အာဇမ်ဟာ ဂျော်ဒန်၊ အီရတ်နဲ့ ပါကစ္စတန်က စစ်ပွဲ ၃ ခုမှာ ရွပ်ရွပ်ချွံချွံ တိုက်ပါဝင်ခဲ့ပါတယ်။

၁၉၆၇ ခုနှစ် ဇွန်လ ၅ ရက်နေ့ မနက်ပိုင်းက အီဂျစ်လေတပ်ကို စစ်ကြေငြာခြင်းမပြုဘဲ အလစ်အငိုက် တိုက်ခိုက်ချေမှုန်းခဲ့တဲ့ အစ္စရေးလေတပ်ဟာ ဂျော်ဒန်​လေတပ်ကို ချေမှုန်းဖို့ လာရောက်စဉ် ဂျော်ဒန်လေတပ်မှာ တာန်ထမ်းဆောင်နေတဲ့ အာဇမ်ဟာ အစ္စရေးလေယာဉ် ၂ စီးကို ပစ်ချခဲ့ပါတယ်။ နောက် ၂ ရက်အကြာမှာ အီရတ်က လေတပ်စခန်းကို ကာကွယ်ဖို့ စေလွှတ်ခံခဲ့ရပြီး နောက်ထပ် အစ္စရေးလေယာဉ် ၂ စီးကို ပစ်ချနိုင်ခဲ့ပါတယ်။

၆ ရက်တာကြာမြင့်ခဲ့တဲ့ အဲဒီစစ်ပွဲမှာ အစ္စရေးက အနိုင်ရခဲ့ပြီး အာဇမ်ဟာ အဲဒီစစ်ပွဲမှာ အစ္စရေးတိုက်လေယာဉ် ၄ စီးကို ပစ်ချနိုင်တဲ့ တစ်ဦးတည်းသော လေယာဉ်မှူးအဖြစ် မှတ်တမ်းဝင်ခဲ့ပါတယ်။

၁၉၆၅ ခုနှစ် အိန္ဒိယ-ပါကစ္စတန် စစ်ပွဲမှာ အာဇမ်ဟာ အိန္ဒိယတိုက်လေယာဉ်တစ်စင်းကို ပစ်ချနိုင်ခဲ့ပြီး၊ လက်နက်အကန့်အသက်ရှိတဲ့ ပါကစ္စတန်တပ်ဖွဲ့တွေကို သူက တွန်းအားပေးနိုင်ခဲ့ပါတယ်။

ဂျော်ဒန်နဲ့ အီရတ်တို့က အာဇမ်ကို စစ်ဖက်ဆိုင်ရာ ဂုဏ်ပြုဆု ချီးမြှင့်ခဲ့သလို အမေရိကန်ကလည်း အာဇမ်ရဲ့ ပြောင်မြောက်တဲ့ တိုက်ပွဲဝင်စွမ်းရည်ကို ဂုဏ်ပြုကာ ၂၀၀၁ ခုနှစ်မှာ Living Eagles ​ဆုတံဆိပ်ကို ချီးမြှင့်ခဲ့ပါတယ်။

အာဇမ်ဟာ ပါကစ္စတန်စစ်တပ်ရဲ့ တတိယအမြင့်ဆုံး ဂုဏ်ပြုဆုတံဆိပ် Star of Courage (Sitara-e-Jurat) ဆုတံဆိပ်ကိုလည်း ရရှိခဲ့ပါတယ်။

၁၉၇၁ ခုနှစ် ပါကစ္စတန်ကနေ ဘင်္ဂလားဒေ့ရှ် လွတ်လပ်ရေးရတဲ့အချိန်မှာ ဘင်္ဂလားဒေ့ရှ်စစ်တပ်အတွက် တာဝန်ထမ်းဆောင်ခဲ့ပြီး ၁၉၈၀ မှာ အငြိမ်းစားယူကာ နိုင်ငံရေးလောကထဲ ဝင်ရောက်ခဲ့ပါတယ်။

အာဇမ်ကွယ်လွန်သွားမှုအတွက် ပါလက်စတိုင်းနိုင်ငံရေးအသိုင်းအဝိုင်းက ဝမ်းနည်းကြောင်း ပြောကြားခဲ့ပါတယ်။

Ref: Aljazeera