ယူအေအီး ကြီးမားသောအမှား လုပ်ခဲ့မိပြီဟု အီရန်သမ္မတ ပြော

ဩဂုတ် ၁၆၊ ၂၀၂၀
M-Media

-အစ္စရေးနဲ့ သံတမန်ဆက်ဆံရေး ထူထောင်တာဟာ ယူအေအီးအနေနဲ့ ကြီးမားတဲ့ အမှားတစ်ခု လုပ်လိုက်တာဖြစ်တယ်လို့ အီရန်သမ္မတ ဟာဆန်ရူဟာနီက မနေ့မှာ ပြောကြားလိုက်ပါတယ်။

အာရပ်စော်ဘွားများပြည်ထောင်စု (ယူအေအီး)နဲ့ အစ္စရေးတို့ဟာ ပုံမှန် သံတမန်ဆက်ဆံရေးထူထောင်ကြောင်း ကြာသာပတေးနေ့မှာ ကြေငြာခဲ့ပြီး လုံခြုံရေးအပါအဝင် ကဏ္ဍများစွာမှာ နှစ်နိုင်ငံ ပူးပေါင်းဆောင်ရွက်မှုတွေ လုပ်ဆောင်သွားဖို့လည်း သဘောတူညီခဲ့ပါတယ်။

အီရန်သမ္မတ ဟာဆန်ရူဟာနီက ဒီသဘောတူညီချက်ဟာ အစ္စရေးကို ဒေသတွင်းမှာ အခြေခိုင်အောင် လုပ်ဆောင်လိုက်တာဖြစ်တယ်လို့ မနေ့က ရုပ်သံမိန့်ခွန်းမှာ ပြောကြားခဲ့ပါတယ်။

“ယူအေအီးအနေနဲ့ ပိုပြီးသတိထားရမှာပါ။ ကြီးမားတဲ့ အမှားတစ်ခု၊ သစ္စာဖောက်တဲ့ လုပ်ရပ်တစ်ခုကို ကျူးလွန်လိုက်တာပါ။ ဒါကို သတိထားမိပြီး လမ်းမှားကို စွန့်လွှတ်ဖို့ ကျွန်တော်တို့ မျှော်လင့်ပါတယ်”

ယူအေအီး-အစ္စရေး သံတမန်ဆက်ဆံမှု ထူထောင်ရေး သဘောတူညီချက်မှာ ပါလက်စတိုင်းပိုင် အနောက်ဖက်ကမ်းက ဒေသတွေကို ပိုက်နက်ထဲသွတ်သွင်းမယ့် အစ္စရေးရဲ့အစီအစဉ်ကို ရပ်ဆိုင်းဖို့ ပါဝင်ပါတယ်။

ယူအေအီးခေါင်းဆောင်ပိုင်းက ဒီလို ဆက်ဆံရေးထူထောင်တာဟာ ပါလက်စတိုင်းပိုင်နက်တွေကို အစ္စရေးက ထပ်မံသိမ်းပိုက်မှုကို တားဆီးနိုင်ခဲ့တယ်လို့ ပြောကြားခဲ့ပါတယ်။ ဒါပေမယ့် အစ္စရေးဝန်ကြီးချုပ် နေတန်ယာဟုက အနောက်ဖက်ကမ်း ဒေသတွေ အစ္စရေးနိုင်ငံထဲသွတ်သွင်းမယ့် အစီအစဉ်ကို မစွန့်လွှတ်ဘူးလို့ သဘောတူညီချက်ရပြီး နာရီပိုင်းအတွင်းမှာပဲ ထုတ်ပြန်ခဲ့ပါတယ်။

သဘောတူညီချက်ဟာ အမေရိကန်သမ္မတ ဒေါ်နယ်ထရမ့် နောက်ထပ်သက်တမ်းတစ်ခု အနိုင်ရဖို့ ရည်ရွယ်တာမျိုး ဖြစ်တယ်လို့လည်း ရူဟာနီက ထည့်သွင်း ပြောဆိုခဲ့ပါတယ်။

Ref: Reuters