ဒီဇင်ဘာ ၁၇ ၊ ၂၀၁၄
M-Media
– ဆီးရီးယားနှင့် အီရတ်ရှိ နယ်မြေများကို သိမ်းပိုက်ထားသည့် IS အဖွဲ့သို့ လူငယ်များ သွားရောက်ပူးပေါင်းခြင်းကို တားမြစ်ရန်အတွက် ရည်ရွယ်သော ၀ဘ်ဆိုက်တစ်ခုကို ဗြိတိန်ရှိ ရှေ့ဆောင်အီမာမ်များက ဖန်တီးပြုလုပ်လိုက်သည်ဟု သိရသည်။
အဆိုပါ ၀ဘ်ဆိုက်ကို Imams Online ဟု အမည်ပေးထားပြီး လန်ဒန်၊ လက်စတာ၊ လိဒ်၊ လန်ကက်စ်ရှိုင်းယား၊ ၀က်စ်မစ်ဒ်လန်းနှင့် ဘက်ကင်ဟမ်ရှိုင်းယားတို့ရှိ ဗလီဝတ်ကျောင်းတော်များမှ ရှေ့ဆောင်အီမာမ်များ စုပေါင်းကာ လွှင့်တင်ထားခြင်းဖြစ်ပြီး IS အဖွဲ့၏ အွန်လိုင်းမှ သွေးဆောင်မှုများကို တွန်းလှန်မည့် လှုပ်ရှားမှုများလည် ပါဝင်မည်ဖြစ်သည်။
`ဆိုးရွားတဲ့ အကြမ်းဖက်မှုနှင့် သတ်ဖြတ်မှုတို့ရဲ့ ပုံရိပ်တွေဟာ အမုန်းမျိုးစေ့ကို စိုက်ပျိုးနေခြင်းပါ။ ဒီလို ထိခိုက်စေတဲ့ အကြောင်းအရာတစ်ခုတိုင်း၊ တစ်ခုတိုင်းဟာ ကျွန်တော်တို့အားလုံးကို နာကျင်စေမယ့် အလားအလာတွေ ရှိနေပါတယ်´ ဟု Imams Online ၀ဘ်ဆိုက်၏ အယ်ဒီတာဖြစ်သူ ရှောင်ကသ် ၀ါရာအစ်ခ်ျက ဒီဇင်ဘာ ၁၅ ရက်နေ့တွင် The Sunday Times သတင်းစာသို့ ပြောကြားခဲ့သည်။
အရှေ့အလယ်ပိုင်းရှိ စစ်သွေးကြွအဖွဲ့များသို့ မွတ်စလင်လူငယ်များ သွားရောက်ပူးပေါင်းကြသည်ဆိုသော သတင်းများ ထွက်ပေါ်လာခြင်းက အဆိုပါ Imams Online ၀ဘ်ဆိုက် ဖြစ်ပေါ်လာရခြင်း၏ အကြောင်းအရင်းဖြစ်သည်။
အဆိုပါဝဘ်ဆိုက်တွင် အကြမ်းဖက်မှုများကို ရှုတ်ချသည့် အစ္စလာမ်သာသနာ၏ သင်ကြားမှုများ၊ လူငယ်များအတွက် လမ်းညွှန်ချက်များ၊ ဘာသာပေါင်းစုံချစ်ကြည်ရေး စသည့် ကဏ္ဍမျိုးစုံပါဝင်ပြီး အစ္စလာမ့်ဓမ္မပညာရှင်ပေါင်း ၁၄ ဦး၏ အစ္စလာမ့်ရေးရာ ဟောပြောပို့ချချက်များ၊ အသိပညာပေးဆောင်းပါးများနှင့် သတင်းများကိုလည်း ဖော်ပြထားသည်။
ထို့ပြင် ပညာရေးနှင့်ပတ်သက်သည့် ကဏ္ဍနှင့် လူမှုရေးနှင့် ပတ်သက်သည့် ကဏ္ဍတို့ကိုလည်း ထည့်သွင်းထားသည်။ ထိုဝဘ်ဆိုက်မှတစ်ဆင့် အစွန်းရောက် ၀ဘ်ဆိုက်များကိုလည်း သတင်းပေးပို့နိုင်မည် ဖြစ်သည်။
အစွန်းရောက်ဝါဒအား ဆန့်ကျင်သည့် ထိုကဲ့သို့ လှုပ်ရှားမှုမျိုးမှာ ယူကေတွင် ပထမဆုံးအကြိမ် ဆောင်ရွက်ခြင်း မဟုတ်ဘဲ ပြီးခဲ့သည့် ဇွန်လကလည်း စစ်ပွဲဖြစ်ပွားနေသည့် ဒေသများသို့ မသွားရန် ဗြိတိန်မွတ်စလင်များအား တိုက်တွန်းသည့် ကြေညာချက်တစ်စောင်ကို နောက်ခံပေါင်းစုံမှ အစ္စလာမ်ဘာသာရေးဆိုင်ရာ ပုဂ္ဂိုလ် ၁၀၀ ကျော်က လက်မှတ်ရေးထိုး ထုတ်ပြန်ခဲ့သည်။
ဗြိတိန်တွင် အစ္စလာမ်ဘာသာကို သက်ဝင်ယုံကြည်သူဦးရေ ခန့်မှန်းခြေ ၂.၇သန်းခန့် ရှိသည်။
ဗြိတိန်ဝန်ကြီးချုပ် ဒေးဗစ်ကင်မရွန်းကမူ အကြမ်းဖက်မှုတုံ့ပြန်ရေး ဥပဒေကို ထုတ်ပြန်ခဲ့ပြီး ဗြိတိန်မှလူငယ်များ စစ်သွေးကြွအဖွဲ့များသို့ သွားရောက်ခြင်းကို တားမြစ်ရန် ကြိုးစားခဲ့သည်။
ထိုဥပဒေအရ နိုင်ငံရပ်ခြား စစ်သွေးကြွအဖွဲ့များနှင့် သွားရောက်ပူးပေါင်းသူများမှာ ဗြိတိန်သို့ ပြန်လာပါက ဖမ်းဆီးခြင်းကို ခံရမည်ဖြစ်သည်။ သို့သော်လည်း အချို့သော ဥရောပနိုင်ငံများတွင်ုထိုကဲ့သို့ ဖမ်းဆီးခြင်းမရှိဘဲ ပညာပေးမှုများကိုသာပြုလုပ်ပြီး အဆိုပါ နည်းလမ်းက ပိုမိုအောင်မြင်နေသည်။
ဆီးရီးယားမှပြန်လာသော မွတ်စလင်လူငယ်အချို့ကလည်း မိမိတို့မှာ အာဏာရှင် အာဆတ်ကို ဖြုတ်ချရန် ဆီးရီးယားပြည်သူများ၏ ကြိုးစားမှုအား သွားရောက်ပံ့ပိုးပေးခြင်းဖြစ်ပြီး အကြမ်းဖက်လုပ်ရပ်များလုပ်ရန် ဆန္ဒဖြင့် သွားရောက်ခြင်းမဟုတ်ကြောင်း၊ ဗြိတိန်၏ ဥပဒေမှာ လူငယ်များအား အစွန်းတစ်ဘက်သို့ တွန်းပို့ခြင်းသာဖြစ်ကြောင်း ဖွင့်ဟပြောဆိုခဲ့သည်။
Imams Online ဝဘ်ဆိုဒ်လိပ်စာ => http://imamsonline.com/
ref: OnIslam
