အောက်တိုဘာ ၉၊ ၂၀၁၈
M-Media
– မလေးရှားဝန်ကြီးချုပ် မဟာသီယာ မိုဟာမက်ကို ဖခင်တစ်ယောက်အဖြစ်ရော၊ ခေါင်းဆောင်တစ်ယောက်အဖြစ်နဲ့ပါ ချစ်ခင်လေးစားတယ်လို့ အတိုက်အခံဟောင်း နိုင်ငံရေးသမား အန်န၀ါရ် အီဘရာဟင်က ပြောကြားလိုက်ပါတယ်။
ကြားဖြတ်ရွေးကောက်ပွဲမှာ ၀င်ရောက်ယှဉ်ပြိုင်မယ့် အန်ဝါရ်က မနေ့ကပြုလုပ်တဲ့ မဲဆွယ်ရေးလှုပ်ရှားမှုမှာ ဒီလို ပြောကြားလိုက်တာဖြစ်ပြီး မဲဆွယ်ပွဲကို မဟာသီလည်း တက်ရောက်ခဲ့ပါတယ်။
၁၉၉၀ ပြည့်နှစ်တွေက မဟာသီလက်အောက်မှာ ဒုတိယ၀န်ကြီးချုပ်အဖြစ် တာဝန်ထမ်းဆောင်ခဲ့တဲ့ အန်ဝါရ်ဟာ နောက်ပိုင်းမှာ မဟာသီနဲ့ သဘောထားကွဲလွဲမှုတွေဖြစ်ခဲ့ပြီး ရာထူးက ဖြုတ်ခံခဲ့ရသလို ထောင်ဒဏ်ချမှတ်မှုကိုလည်း ခံခဲ့ရပါတယ်။
ဝန်ကြီးချုပ်ဟောင်း နာဂျစ်ရာဇတ်ရဲ့ အစိုးရကို ဖြုတ်ချဖို့အတွက် အန်ဝါရ်နဲ့ မဟာသီတို့ဟာ အခုနှစ်ပိုင်းမှာ မဟာမိတ် ပြန်ဖြစ်လာခဲ့ပေမယ့် သူတို့နှစ်ဦးအကြား မကျေလည်မှုတွေ ဆက်ရှိနေတယ်လို့ ပြောကြားမှုတွေ ရှိနေပါတယ်။
အန်ဝါရ်ကတော့ ဒီစွပ်စွဲမှုတွေကို ငြင်းဆိုခဲ့ပါတယ်။
“ပွင့်ပွင့်လင်းလင်းဝန်ခံရရင် ကျွန်တော်သူ့ကို ကောင်းကောင်းသိတယ်။ ဖခင်တစ်ယောက်အဖြစ် ခေါင်းဆောင်တစ်ယောက်အဖြစ်ချစ်ခင်လေးစားပါတယ်။ အရင်တုန်းက သူနဲ့ကျွန်တော် အတိုက်အခံဖြစ်ဖူးတယ်။ သူဟာ မလေးရှားကို ဦးဆောင်နိုင်ဆုံးသူဆိုတာ အခု ကျွန်တော် လက်ခံပါပြီ”
အန်ဝါရ်ဟာ ကြားဖြတ်ရွေးကောက်ပွဲမှာ ပေါ့တ်ဒစ်ဆင်ကနေ ၀င်ရောက်ယှဉ်ပြိုင်ပြီး အမတ်ဖြစ်လာရင် ၀န်ကြီးချုပ်မဟာသီရဲ့ နေရာကို ဆက်ခံမှာ ဖြစ်ပါတယ်။ မဟာသီကလည်း ၀န်ကြီးချုပ်တာဝန်ကို ၂ နှစ်သာ ထမ်းဆောင်မယ်လို့ ပြောကြားထားပါတယ်။
မဟာသီကတော့ ဒီအခမ်းအနားကို တက်ရောက်ပြီး အန်ဝါရ်အတွက် မဲဆွယ်ပေးရတာကို ၀မ်းသာတယ်လို့ ပြောကြားခဲ့ပါတယ်။
“ရွေးကောက်ပွဲမှာ အန်ဝါရ် အီဘရာဟင် အနိုင်ရပြီး ကျွန်တော်တို့နဲ့ လက်တွဲလုပ်ဆောင်နိုင်မယ်လို့ ကျွန်တော် မျှော်လင့်ပါတယ်။ သူ့အတွက်မဟုတ်၊ ကျွန်တော့်အတွက်လည်းမဟုတ်ဘူး၊ (ကာကွယ်ရေးဝန်ကြီး) ဆာဘူးအတွက်လည်းမဟုတ်ဘူး၊ (ဘဏ္ဍာရေးဝန်ကြီး) လင်ဂွန်အန်အတွက်လည်းမဟုတ်ပါဘူး။ ကျွန်တော်ချစ်တဲ့ တိုင်းပြည်အတွက်၊ ကျွန်တော်တို့ Pakatan Harapan ကို မဲပေးခဲ့တဲ့ ပြည်သူတွေအတွက် အလုပ်လုပ်ဖို့ ဖြစ်ပါတယ်”
Ref: CNA
