လူငယ်တွေကြားက စိတ်ဒါဏ်ရာတွေ

မေ-၂၆၊၂၀၁၃
M-Media
ရေးသူ-ဖိုးသောကြာ

ဒီနေ့သူငယ်ချင်းတစ်ယောက်နဲ့ စကားအတော်ကြာပြောမိရင်း ပြီးသွားတဲ့ ၂နှစ် ၃နှစ်စာလောက်ကိုပြန်လှန်မိတယ်။ လွန်ခဲ့တဲ့ ၂နှစ်လောက်တုန်းက ကျွန်တော်တို့ မွတ်ဆလင်လူငယ်တွေထဲမှာ လူမျိုးမရွေး ဘာသာမရွေးပဲ လူမှုရေးတွေလုပ်မယ် မြန်မာပြည်က မွတ်ဆလင်လူထုအတွက် ပညာရေးအဆင့်မြှင့်တင်မှုတွေ ကမ္ဘာနဲ့ရင်ပေါင်တန်းနိုင်တဲ့ အသိအမြင်ကျယ်မှုတွေဖြစ်လာဖို့ ဘယ်လိုကြိုးစားကြမယ် Minority နဲ့ Majority ကြားမှာကွာဟမှုကျဉ်းမြောင်းပြီး အတူယှဉ်တွဲနေထိုင်ရေး အတွက် ပြောကြမယ် ဆိုကြမယ်ဟေ့ဆိုရင် အသိအမြင်တင်ပြနိုင်တဲ့ လူငယ်တွေ အမြင်ကျယ်ပြီး လက်တွေ့ပြင်ပလောကအထိ ဆောင်ရွက်နိုင်တဲ့/ဆောင်ရွက်ချင်တဲ့ မွတ်ဆလင်လူငယ်တွေ မများဘူးဆိုရင်တောင် မနည်းလှတဲ့အရေအတွက်ကိုရနိုင်ခဲ့တယ်။

လွန်ခဲ့တဲ့ ၁နှစ်ကျော်ကဆိုရင် မွတ်ဆလင်လူငယ်တွေဟာ ဘာသာလူမျိုး မခွဲခြားတဲ့ လူမှုရေးအသင်းတွေအထိ ပူးပေါင်းဆောင်ရွက်နိုင်မှု အတိုင်းအတာတစ်ရပ် အထိရှိနေခဲ့တယ်။ ပြောရရင်တော့ အရင့်အရင်အစိုးရ လက်ထက်များက ဖိနှိပ်မှုမျိုး အတန်ငယ်ပြေလျော့လာသယောင် အနေအထားမှာ မွတ်ဆလင်လူငယ်တွေဟာ ပြောင်းလဲလာတဲ့ နိုင်ငံရဲ့အခန်းကဏ္ဍတွေမှာ ပါဝင်ဖို့ Ideology/သဘောတရားရေးရာမှာ အဖုအထစ်တော်တော်လေးကင်းစင်နေပြီး လက်တွေ့ပြင်ပလောကမှာလည်း ပူးပေါင်းဆောင်ရွက်မှုအချို့နဲ့ လူမှုရေး/ကျန်းမာရေးစတာတွေအထိ ဆောင်ရွက်နိုင်မည့်/ဆောင်ရွက်နေတဲ့ ခြေလှမ်းတစ်ချို့အထိရောက်ရှိနေခဲ့တယ်။

လွန်ခဲ့တဲ့ ၁နှစ်ကျော်ကျော်လောက်ကစပြီး အဲ့ဒီလိုဖူးသစ်စရောင်ခြည်ဟာ တိမ်မီးခိုးတို့ဖုံးလွှမ်းသွားပြီး ဘောင်တွေကျဉ်းလာလိုက် ဖယ်ကျဉ်မှုတွေ မသိမသာရော သိသိသာသာပါ ဖြစ်ထွန်းလာလိုက်တာ ၁နှစ်ဆိုတဲ့ကာလအတွင်းမှာ အလုံးစုံပျက်ဆီးသွားပြီလို့မပြောနိုင်သေးရင်တောင် အဲ့ဒီအနေအထားမျိုးပြန်ရောက်ဖို့ စိတ်ဓာတ်ပိုင်းဆိုင်ရာ အနိုင်ကျင့်ခံလိုက်ရပြီ။

လက်ရှိ လူငယ် လူရွယ် လူလတ် လူကြီးပိုင်းအထိ အဲ့ဒီ impact ဒါဏ်ဟာ နက်ရှိုင်းစွာရိုက်ခတ်သွားခဲ့ပြီးပြီ။ အဆုံးသတ်မဲ့ ရောင်နီလည်းမမြင်သေးဘူး။  ဒါဟာ ဒီမျိုးဆက်အတွင်းမှာ အပြန်အလှန်နားလည်မှုကို ခက်ခက်ခဲခဲတည်ဆောက်ဖို့ အကျိုးဆက်ကလွဲလို့ ဘာမှအမြတ်မကျန်ခဲ့မည့်အနေအထားအစစ်အမှန်ပဲ။၂၀၀၈ နာဂစ်အပြီးကတည်းက မွတ်ဆလင်လူငယ်တွေဟာ ဘာသာလူမျိုးမခွဲခြားဘဲ လူမှုကယ်ဆယ်ရေးလုပ်ငန်းတွေမှာ မထင်မှတ်လောက်အောင်ပဲ အားတက်သရောပူးပေါင်းပါဝင်ရင်း အတိုင်းအတာ တစ်ရပ်အထိ ထူထောင်ထားတဲ့ လူငယ်အချင်းချင်း အပြန်အလှန်နားလည်မှု ကွန်ယက်ဟာ အလုံးစုံနီးပါးပြိုပျက်သွားပြီ။

ဒါတွေအတွက် အစိုးရမှာ တာဝန်အရှိဆုံး အုပ်ချုပ်မှုအာဏာပိုင်များမှာ တာဝန်အရှိဆုံးနဲ့ တရားစီရင်ရေးအပိုင်းက ဒုတိယတာဝန်အရှိဆုံးလို့ သတ်မှတ်လို့ရနိုင်သလို အခြေအမြစ်မရှိတဲ့အနေအထားတွေမှာ အလုံးစုံပုံယုံကြည်လိုက်ပြီး ယုန်ထင်ကြောင်ထင်နဲ့ Knowledge ပိုင်းနဲ့ Globalization ပိုင်းမှာ Upgrade မလုပ်ခဲ့တဲ့ တစ်ချိန်က တွဲလက်ညီခဲ့သော တစ်ဖက်က လူငယ်ထုနဲ့ လူထုတစ်ရပ်လုံးဟာ တတိယတာဝန်အရှိဆုံးပါပဲ။  နိုင်ငံရေးပွင့်လင်းလာမှုနဲ့ နည်းပညာပိုင်းဆိုင်ရာပေါက်ကွဲမှုနောက်ကွယ်မှာ ဒီလောက်ပြင်းထန်တဲ့ ရိုက်ခတ်မှု ကြီးကြီးမားမားမျိုးနဲ့ လူငယ်တွေကြားက ဘာသာလူမျိုးမခွဲခြားတဲ့  အချင်းချင်းနားလည်ယုံကြည်မှုတွေဟာ အလျှားလိုက် ခွဲခံလိုက်ရတဲ့ ဝါးလုံးလိုမျိုး ထက်ခြမ်းသက်သက် ကွဲပြားသွားလိမ့်မယ်လို့ ၂၀၁၀နှစ်ကုန်ပိုင်းလောက်မှာ ကျွန်တော့ကို တစ်ယောက်ယောက်က လာပြောရင် အရူးလို့လက်ညှိုးထိုးပြီးပြန်လည် ဟားတိုက်လိုက်မိမှာ ဖြစ်ပေမဲ့ မျက်ဝါးထင်ထင်မြင် တွေ့လိုက်ရမှု အပေါ်မှာတော့ အံ့ဩမင်သက်ခြင်းနဲ့အတူ ဘယ်အရာကများ ဒီအတိုင်းအတာအထိ တွန်းအားပေးသွားသလဲဆိုတာ အဖြေရှာရင်တော့ ယုံလွယ်မှု အသိပညာ ဗဟုသုတနည်းပါးမှု မလိုအပ်တဲ့နေရာမှာ မာနတံခွန်ထောင်လွှားမှု ဖြစ်ရပ်တိုင်းမှာ အဓိကရင်းအမြစ်ကိုအပြန်အလှန်သုံးသပ်ခြင်းအားနည်းမှု ကမ္ဘာလုံးဆိုင်ရာအမြင်ကျယ်ခြင်းအားနည်းမှုတွေဟာလုံးထွေးရစ်ပါတ်ပြီး တစ်နွယ်ငင်တံစဉ်ပါဖြစ်နေတာလို့ပဲ သုံးသပ်မိတယ်။

ရှေ့လျှောက် တိုးတက် ပွင့်လင်းလာမဲ့ မြန်မာ့နိုင်ငံရေး အခင်းအကျင်းနဲ့ ကမ္ဘာလုံးဆိုင်ရာ ဆက်ဆံရေး အခြေအနေတွေ အရတော့ ဒီပုံစံ ဒီစံနှုန်းများအတိုင်း ဆက်သွားကြမယ်ဆိုရင် တကယ်တမ်း အထိနာမှာကတော့ လူငယ်ထုဆိုတဲ့ တိုင်းပြည်ရဲ့ အနာဂါတ်ကို ပုခုံးထမ်းတင်ပေးရမဲ့ လူတန်းစားကြီးပဲဖြစ်လိမ့်မယ်။  ညီညွတ်ရေး တရားမျှတရေး ဆိုတဲ့ အခြေခံပူးပေါင်း ဆောင်ရွက်မှုတွေအတွက် အဘက်ဘက်က ခေါင်းဆောင်များအနေနဲ့ ဖြစ်မြောက်အောင် ကြိုးပမ်းဆောင်ရွက်ရတာ ခက်ခဲနေပြန်တော့ ထိရောက်ဖို့ဆိုတဲ့ အနေအထားရောက်ဖို့တောင် ဝေးလွန်းလှတယ်။

ဒါ့ကြောင့် တစ်ခါကရေးဖူးသလိုပဲ ဘာသာတရားများကြားက ညီညွတ်စွာနဲ့အပြန်အလှန်လေးစားပြီး အတူယှဉ်တွဲနေထိုင်ရေး အတွက် ဆောင်ရွက်မှုတွေက ခြေဗလာနဲ့ဖိနပ် လိုက်ရှာနေတုန်းမှာ အမုန်းမီးနဲ့အပေါ်ယံရာသီစာ တရားသဘင်များကတော့ တိုင်းပြည်အနှံ့ ယာဉ်ပေါင်းစုံစီးပြီး ခရီးထွက်ကာ လမ်းဆုံတိုင်းမှာ မဏ္ဍပ်တွေထိုးပြီး တရားတွေဟောနေကြလေရဲ့။ တရားမျှတမှုကို အားလည်းမပေး/တောင်းဆိုခြင်းလည်းမပြုဘဲ ဆိတ်ဆိတ်နေသောအခါ တရားမျှတမှု၏ အရသာကို ဘယ်သောအခါမှ မြည်းစမ်းခွင့်ပင်ရမည် မဟုတ်ပါ။

ဒီလိုပဲ ကျွန်တော်တို့ဘက်မှာလည်း မမျှတစွာ ဆက်ဆံခံနေရမှုကို မြင်တွေ့နေရမှု အကြမ်းဖက် တိုက်ခိုက်ခြင်းဒါဏ်မှ ကာကွယ်ပေးခြင်း မခံရမှုတွေကြောင့် ရရှိလာခဲ့တဲ့ လူငယ်တွေကြားက စိတ်ဒါဏ်ရာတွေကိုပဲ ဘယ်လိုဘယ်နည်းဖြေဖျောက်ပေးရမယ်ဆိုတာ ကြီးမားတဲ့ အရေးကိစ္စ တစ်ခုအဖြစ် ဝန်ပိစေပြန်ပါတယ်။

ပညာရေးနဲ့ ကျန်းမာရေးဆိုင်ရာပြုစုစောင့်ရှောက်မှုတွေ အခြေခံလူမှုနေထိုင်ရေး အဆင့်မြှင့်တင်ရေး အပိုင်းမှာ အသုံးပြုရမဲ့ Train ပေးရမဲ့အင်အားတွေဟာလည်း မိမိအိမ်ရာကိုစွန့်ခွါပြီး လမ်းပေါ်မှာ ရွက်ဖျင်တဲထဲရောက်သွားကြတဲ့ အကြမ်းဖက်တိုက်ခိုက်ခံရတဲ့ ဓါးစာခံလူသားတွေအတွက် အခြေခံ စားသောက်ရေးကိုပင် ပြည့်မှီအောင်ကြိုးပမ်းရရင်း အရင်းအမြစ်တွေ ကုန်ဆုံးလှပါတယ်။ဒီလိုဘယ်သူ့အတွက်မှ မကောင်းနိုင်တဲ့ အခြေအနေဆိုးကြီးကို တိုင်းသူပြည်သားတွေကလည်း စိတ်ပါလက်ပါ ပြင်ဆင်ပြောင်းလဲခြင်း မပြုချင် အုပ်ချုပ်သူ အစိုးရကလည်းထိရောက်စွာ ကိုင်တွယ်ဆောင်ရွက်ပေးခြင်းမရှိ တရားစီရင်ရေးအပိုင်းကလည်း မျှတစွာကိုင်တွယ် ဖြေရှင်းမှုမရှိဘဲ ဘယ်လို အခြေအနေရောက်သည်အထိ သယ်သွားကြမှာလဲလို့သာ မေးခွင့်ရရင် မေးချင်ပါသည်။ တစ်ဦးတစ်ယောက်ခြင်းစီ မိမိရဲ့ နှလုံးသားကိုပဲပြန်မေးကြဖို့တိုက်တွန်းပါရစေ။