” မြန်မာ့သစ္စာခံ အစ္စလာမ့် အင်အားစု” အမည်ဖြင့် အရပ်ဘက် လူမှုအဖွဲ့အစည်း တစ်ခု ဖွဲ့စည်း

ဇွန်လ ၁၇၊ ၂၀၁၃
M-Media
သတင်း – ဆူးထက်

မြန်မာ့သစ္စာခံ အစ္စလာမ့် အင်အားစု ( Myanmar Loyal Islamic Union) အဖွဲ့ကို ရန်ကုန်မြို့ ဒေါ်သိန်းတင်လမ်းမ ပေါ်ရှိ ကွမ်းကျုံး စားသောက်ဆိုင် အထူးဧည့်ခန်းမဆောင်တွင် ဇွန်လ ၁၆ရက်နေ့ ည(၆)နာရီက ဒီမိုရေစီနည်းအရ ဖွဲ့စည်း လိုက်ကြောင်း၊ နိုင်ငံတော်ကို မှတ်ပုံတင်ရန် ဆုံးဖြတ် လိုက်ကြကြောင်း သတင်းရရှိသည်။

အဆိုပါ အဖွဲ့အစည်း ဖွဲ့စည်းရခြင်း၏ ရည်ရွယ်ချက်မှာ အချက်(၅)ချက်ရှိကြောင်း ရှိကြောင်း သိရသည်။ ယင်းမှာ-
(၁) ပြည်ထောင်စု သမ္မတ မြန်မာနိုင်ငံတော် ဖွဲ့စည်းပုံ အခြေခံ ဥပဒေကို အစဉ်အမြဲ လိုက်နာဆောင်ရွက်ရန်။
(၂) အပြည်ပြည် ဆိုင်ရာ လူ့အခွင့်အရေး ကြေငြာ စာတမ်းပါ အခွင့်အရေးများအား အပြည့်အ၀ ဖော်ဆောင်နိုင်ရန်။
(၃) ဘာသာတရား ပေါင်းစုံ အပြန်အလှန် လေးစားရေးနှင့် ပူးပေါင်းဆောင်ရွက်ရန်။
(၄) လူသား အရင်းအမြစ်များ ဖွံ့ဖြိုးတိုးတက် မြင့်မား လာစေရန်။
(၅) နိုင်ငံတကာနှင့် ချတ်ဆက်၍ ပညာရေး၊ ကျန်းမာရေး၊ လူမှုရေး ကိစ္စရပ်များကို ပူးပေါင်းဆောင်ရွက်ရန် အလို့ဌာ မြန်မာ့ သစ္စာခံ အစ္စလာမ့် အင်အားစု (MLIU) ကိုဖွဲ့စည်းလျှက် လူထု အကျိုးကို အစွမ်းကုန် ထမ်းဆောင်နိုင်မည်ဟု ယုံကြည်ကြပါသည် ” ဟု ဖော်ပြပါရှိသည်။
အဆိုပါ အဖွဲ့အစည်း ဖွဲ့စည်းရခြင်းနှင့် ပတ်သက်၍ (MLIU) အဖွဲ့ဥက္ကဌ ဦးမောင်မောင်ဆင့်မှ ” ကျွန်တော်တို့ ဒီအဖွဲ့ ဖွဲ့စည်းရခြင်း အဓိက ရည်ရွယ်ချက်ကတော့ မြန်မာနိုင်ငံသား အစ္စလာမ် သာသနာ နှင့် သာသနာဝင်များအား အကြမ်းဖက် သာသနာဟု မသိနားမလည်သူတို့၏ စွပ်စွဲမှုကို ဖြေရှင်းရန် အစ္စလာမ် သာသနာ၏ လေးနက် တည်ကြည် သန့်ရှင်းမှုကို ပြသရန် အတွက် ဖြစ်ပါတယ် ” ဟု M-Media သို့ပြောသည်။

” ဘာသာတရား အချင်းချင်းကြား ချစ်ခင်လေးစားမှုကို ထာဝစဉ် တည်ဆောက် သွားနိုင်ဖို့ (MLIU) အဖွဲ့ကို ဖွဲ့စည်းခြင်း ဖြစ်ပါတယ် ” ဟု အတွင်းရေးမှူး ကိုဇေယျာ မှ M-Media သို့ပြောသည်။

ယင်းနောက် အဆိုပါ အခမ်းအနားကို ည(၈)နာရီခွဲတွင် ဆုမွန်ဒိုအာဖြင့် အောင်မြင်စွာ ရုတ်သိမ်းခဲ့ကြောင်း သတင်းရရှိသည်။