အာဖဂန်၏ တစ်ဦးတည်းသော အမျိုးသမီး အုပ်ချုပ်ရေးမှူးမှ အာရှနိုဗယ်လ်ဆု ပထမဆုံးရရှိ

ဇူလိုင် ၂၅၊၂၀၁၃
M-Media

ကဗူးလ်။        ။အာဖဂန်နစ္စတန်၏ ပထမဆုံးနှင့်တစ်ဦးတည်းသော အမျိုးသမီးအုပ်ချုပ်ရေးမှူး ဟဗီဗဟ် စရာဗီ(Habiba Sarabi) သည် မနီလာ အခြေစိုက် ဆုချီးမြှင့်ရေးအဖွဲ့မှပေးအပ်သည့် ဤျနှစ်၏ Ramon  Magsaysay Awards ဆုရှင်ဖြစ်လာကြောင်း ဗုဒ္ဓဟူးနေ့က ကြေငြာလိုက်သည်။

“ ဒီလို ဂုဏ်ယူစရာဆုကို လက်ခံရရှိတဲ့ ပထမဆုံးအာဖဂန် အမျိုးသမီးတစ်ဦးအနေနဲ့ ယနေ့အဖို့ ကျွန်မ ပျော်ရွှင်မိပါတယ်။ တန်ဖိုးလည်းထားပါတယ်။ ဒီဆုဟာ ဗမ်ယန်ခရိုင်အုပ်ချုပ်မှုကောင်းမွန်လာအောင် ဖော်ဆောင်အားထုတ်နိုင်ခဲ့တဲ့အပေါ် ကျွန်မကို အသိအမှတ်ပြုချီးမြှင့်မှုတစ်ရပ် ဖြစ်ပါတယ် ” ဟု စရာဗီမှ စင်ဟွာသတင်းဌာနသို့ ကြာသပတေးနေ့က ပြောပြခဲ့သည်။

အာဖဂန်နစ္စတန်အလယ်ပိုင်း ဗမ်ယန်ခရိုင် အုပ်ချုပ်ရေးမှူး တစ်ဦးဖြစ်သူ စရာဗီသည် ၂၀၀၅ ခုနှစ်ကတည်းကပင် အုပ်ချုပ်ရေးမှူးတာဝန်ကို ရယူခဲ့ပြီး၊ ထိုဒေသ၏ ပညာရေး၊ လူ့အခွင့်အရေး နှင့် လုံခြုံရေးကို ခိုင်မာအောင် ဆောင်ရွက်နိုင်ခဲ့သည်။

“ ဒီဆုကို လက်ခံရရှိခြင်းက အာဖဂန်တွေရဲ့လူနေမှုအဆင့်မြင့်မားဖို့အတွက်၊ အလားတူစွာပဲ စစ်ဒဏ်ခံတိုင်းပြည်က အမျိုးသမီးတွေအတွက် အကောင်းဆုံးဆက်လက် လုပ်ဆောင်သွားဖို့ ကျွန်မကို ထပ်မံတွန်းအားပေးလိုက်တာပါပဲရှင် ” ဟု စရာဗီမှ ဆိုသည်။

စရာဗီသည် လူပုဂ္ဂိုလ်သုံးဦးနှင့် အဖွဲ့အစည်းကြီးနှစ်ရပ်အနက်မှ ဤနှစ်၏ Ramon Magsaysay Awards အတွက် အများဆန္ဒအရ ရွေးချယ်ခံရခြင်းဖြစ်သည်။

Ramon Magsaysay Awards Foundation အား ဖိလစ်ပိုင်သမ္မတဟောင်း၏အမည်ကို အစွဲပြုခေါ်ဆိုထားပြီး၊ ၄င်းမှ ချီးမြှင့်သည်ကို အာရှနိုဗယ်လ်ဆုအဖြစ် အသိအမှတ်ပြုသတ်မှတ်ကြသည်။

လာမည့်သြဂုတ်လအတွင်း လက်ခံရရှိမည့် ဆုကြေးငွေကို မည်သည့်နေရာ၌ မြှုပ်နှံအသုံးချမည်ဟူသည်ကို မဆုံးဖြတ်ရသေးကြောင်း၊ သို့သော်လည်း အမျိုးသမီးများ လူနေမှုအဆင့်မြင့်မားရေး နှင့် မိန်းကလေးငယ်များ၏ ပညာရေး အတွက် ပံ့ပိုးပေးရန် စဉ်းစားထားကြောင်း စရာဗီမှ ပြောဆိုလိုက်သည်။

BERNAMA