ရိုးသားဖြောင့်မတ်ခြင်းက သူဆင်းရဲတစ်ဦးအား ကြွယ်ဝစေပြီ

စက်တင်ဘာ၊ ၂၃
M-Media

ဘော့စ်တွန်မြို့ရှိ အိုးအိမ်မဲ့သူ ဂလဲန်းဂျိမ်းစ်(Glen James) အတွက် Gofundme.com တည်ထောင်သူ တစ်ဦးမှ ငွေကောက်ခံ လျက်ရှိရာ လွန်ခဲ့သည့် ၂ ရက်တွင် ဒေါ်လာ ကိုးသောင်းခွဲအထိ ရရှိသွားပြီဖြစ်သည်။

ဒေါ်လာလေးသောင်းတန်ဖိုးရှိ ငွေသားအပါအ၀င် ခရီးသွားချက်လက်မှတ်များကို ထည့်ထားသော ကျောပိုးအိတ် တစ်လုံးကို တွေ့ရှိပြီး ပြန်လည်အပ်နှံခဲ့သည့်အမျိုးသားအတွက် ရံပုံငွေထူထောင်ကောက်ခံခဲ့ရာ လွန်ခဲ့သော ၂ ရက်ခန့်တွင် ဒေါ်လာ ၉၁၀၀၀ အထိ ထည့်ဝင်လှူဒါန်းလာကြ၏။ ရံပုံငွေကိုစတင်မတည် ကောက်ခံနေသော ဗာဂျီးနီးယားအမျိုးသားက ဤသည်မှာ အမေရိကန်ပြည်သူတိုင်းအဖို့ ပြောစမှတ်ဖြစ်ရသည်ဟု ဆို၏။

ဂျိမ်းစ်သည် စနေနေ့က ငွေသား ဒေါ်လာ ၂၄၀၀ နှင့် ဒေါ်လာလေးသောင်းနီးပါးရှိ ခရီးသွားချက် လက်မှတ်များ ထည့်ထားသည့် အိတ်ကို တွေ့ရှိပြီးနောက် ရဲအရာရှိတစ်ဦးထံ သွားရောက်အပ်နှံခဲ့သည်။ ပစ္စည်းရှင်သည် အနီးရှိကုန်တိုက် လုပ်သားများကိုပြောပြသဖြင့် ၄င်းတို့မှ ရဲအရာရှိကို အကြောင်းကြားခဲ့သည်။ ယင်းကျောပိုးအိတ်ကို ရဲအရာရှိမှ ၄င်းအား ပြန်လည်ပေးအပ်ခဲ့သည်။

တနင်္လာနေ့တွင် ဘော့စ်တွန်ရဲဌာနမှ ဂျိမ်းစ်အား ချီးမွှမ်း ဂုဏ်ပြုပွဲတစ်ခု ပြုလုပ်ပေးခဲ့သည်။ မီဒီယာများမှတဆင့် ဂျိမ်းစ်၏ ရိုးသားဖြောင့်မတ်မှုကို ဖတ်ရှုရပြီးနောက် အသက် ၂၇ နှစ်အရွယ် ဈေးကွက်ရှာဖွေရေးမန်နေဂျာ အီသန် ၀စ်တင်တန်က ၄င်းအတွက် ရံပုံငွေတစ်ရပ် ထူထောင်ရန်ဆုံးဖြတ်ခဲ့ကာ gofundme.com ၀က်ဘ်ဆိုဒ်ပေါ်မှ စတင်ကောက်ခံခဲ့ခြင်းဖြစ်သည်။ ပြီးခဲ့သည့် ကြာသပတေးနေ့အစောပိုင်း၌ လှူဒါန်းငွေပေါင်း ဒေါ်လာ ၉၁၈၅၅ အထိ ရောက်ရှိသွားကြောင်းသိရသည်။ မိမိနှင့်ရော ဂျိမ်းစ်နှင့်ပါ သူစိမ်းပြင်ပြင်ဖြစ်ကြသူတို့၏ သဒ္ဓါတရားအပေါ် အထူးအံ့သြ အားရ၀မ်းသာဖြစ်နေရသည်ဟု ၀စ်တင်တန်က ဆိုသည်။

“ သူဟာ အိုးအိမ်မဲ့တစ်ဦးရဲ့အခြေအနေဖြစ်နေပါလျက် အဲ့ဒီကျောပိုးအိတ်ကို ပြန်ပေးခဲ့ပါလား ဆိုတဲ့အချက်က ကျွန်တော့်စိတ်ကို စေ့ဆော်ရိုက်ခတ်သွားခဲ့တာပါဘဲ။ ကျွန်တော့်ရင်ထဲမှာ မကြုံစဖူး တောမီးလောင်သလို ခံစားလိုက်ရပြီး မျှော်လင့်ချက်ကြီးတစ်ခု ဖြစ်လာစေခဲ့တယ်လေ။ ဒီကိစ္စဟာ အမေရိကန်ကလူတိုင်း ပြောစမှတ်ပြုစရာလို့ ကျွန်တော် ထင်ပါတယ်။ တကယ်လို့ ကျွန်တော်တို့ အတူတစ်ကွစုပေါင်းဆောင်ရွက်ယင် ဒီမျှော်လင့်ချက်ပြည့်ဝလာပါလိမ့်မယ် ” ဟု ၀စ်တင်တန်က ဗုဒ္ဓဟူးနေ့တွင် ပြောကြားလိုက်သည်။

ဂျိမ်းစ်အတွက် ရံပုံငွေထူထောင်ရေးကြိုးပမ်းချက်မှာ အမှန်အလုပ်ဖြစ်ပါမည်လောဟု သံသယမေးခွန်းအချို့ကိုလည်း ကြုံဆုံခဲ့ရကြောင်း ဆက်လက်ပြောပြခဲ့သည်။

“ လုပ်ငန်းကြီးတစ်ခုကိုဆောင်ရွက်တော့မယ်ဆိုယင် မဖြစ်နိုင်ဘူးလို့ပြောသူတွေတွေ့ရပြီး လက်လျှော့လုနီးပါး ဖြစ်တတ်ကြပါတယ်။ အဲ့ဒီမှာ နည်းလမ်းတစ်ခုခုနဲ့ ၁၀၀ % ဖြစ်မြောက်ရမယ်လို့ဆန္ဒပြုပြီး လူတွေကို ကျွန်တော် အာမခံခဲ့တယ်။ တကယ်လို့ ကျွန်တော်သာ ကလိမ်ကကျစ်လုပ်ခဲ့ယင် ခုချိန်မှာ ကျွန်တော် သိက္ခာကျပြီးသား ဖြစ်နေပါပြီ”။

ဝစ်တင်တန်သည် ဂျိမ်းစ်အား ဖုန်းဆက်ပြောဆိုထားသလို လှူဒါန်းငွေကိုလက်ခံရန် ဘော့စ်တွန်သို့ မကြာမီ လာရောက်လိမ့်မည်ဟုလည်း မျှော်လင့်ထား၏။ သူရည်မှန်းထားသည့် ရံပုံငွေပမာဏမှာ ကနဦးက ဒေါ်လာငါးသောင်း ဖြစ်သော်လည်း ယခုအခါ နှစ်သိန်းခွဲအထိ ရောက်လာအောင် ထပ်မံဆောင်ရွက်သွားမည်ဟု ဆိုလိုက်ပါသည်။

Source : AP