သံတွဲမြို့ အကြမ်းဖက်မှုများအတွက် ကမန်အမျိုးသားတိုးတက်ရေးပါတီမှ သဘောထားထုတ်ပြန်

အောက်တိုဘာ ၂၊ ၂၀၁၃
M-Media
သုတ

ကမန်အမျိုးသားတိုးတက်ရေးပါတီ သဘောထားထုတ်ပြန် ကြေညာချက်

ရန်ကုန် ။ ။ ရခိုင်ပြည်နယ်၊ သံတွဲမြို့အတွင်း ဘာသာရေးကို အကြောင်းပြု၍ တကျော့ပြန်အကြမ်းဖက် မီးရှို့ဖျက်ဆီး၊ လူသတ်မှု၊ လုယက်မှုများအတွက် ကမန်အမျိုးသား တိုးတက်ရေးပါတီမှ ယနေ့ အောက်တိုဘာ ၂-ရက်နေ့တွင် သဘောထားကြေညာချက်တစ်စောင်ကို ထုတ်ပြန်ကြေညာလိုက်သည်။

ဘာသာရေးကိုအကြောင်းပြု၍ အကြမ်းဖက်မှုများ ဖြစ်ပေါ်လျက်ရှိရာ သံတွဲမြို့တွင် ဖြစ်ပေါ်လာသည့် တကျော့ပြန် အကြမ်းဖက်သည့် တဖက်သက် အနိုင်ကျင့်၊ မီးရှို့ လူသတ်၊ လုယက်မှုများသည် တိုင်းပြည် အေးချမ်းရေးနှင့် အေးချမ်းစွာ အတူယှဉ်တွဲနေထိုင်ရေးကို များစွာ ထိခိုက်လျက်ရှိပြီး၊ နိုင်ငံတော် သမ္မတကိုယ်တိုင် ရခိုင်ပြည်နယ် စစ်တွေမြို့၌ ရှိနေချိန်တွင် သံတွဲ၌ ယခုကဲ့သို့ ဖြစ်မှုအား မြန်မာပြည်သူလူထုနှင့် ကမန်တိုင်းရင်းသားများအနေဖြင့် လုံးဝမလည်နိုင်ကြောင်း၊ တရားဥပဒေစိုးမိုးရေးနှင့် နယ်မြေ တည်ငြိမ်အေးချမ်းရေး ပျက်ပြားလျက်ရှိပြီး ဒေသဆိုင်ရာ အာဏာပိုင်အဆင့်ဆင့်မှ တရားဥပဒေစိုးမိုးရေး စီမံခန့်ခွဲမှု ညံ့ဖျင်း၊ ဘက်လိုက်မှုများရှိကြောင်း ကို ထုတ်ပြန်ထားသည်။

မြန်မာနိုင်ငံ၏ ဒီမိုကရေစီအရေးနှင့် ငြိမ်းချမ်းရေး တည်ဆောက်မှုတွင် အစွန်းရောက်အကြမ်းဖက်သူများ၊ အဖွဲ့အစည်းများကို မြန်မာနိုင်ငံသားအားလုံး ၀ိုင်းဝန်းဖော်ထုတ်ရန်နှင့် ယခုကဲ့သို့ အကြမ်းဖက်ခံရသော ကျေးရွာများသည် ကမန်တိုင်းရင်းသားအများစု နေထိုင်သည့် ကျေးရွာများလည်း ဖြစ်သည့်အတွက် တရားဥပဒေစိုးမိုးရေးနှင့် ပျက်စီးဆုံးရှုံးမှုများအား နိုင်ငံတော်မှ အမြန်ဆုံး ပြန်လည်ထူထောင်ပေးနိုင်မည်ဟု မျှော်လင့်ကြောင်းကိုလည်း သဘောထားထုတ်ပြန်ချက်တွင် ဖော်ပြထားပါသည်။