ရန်ကုန်မြို့တွင်း ဂတ်စ် စွမ်းအင်သုံး ယာဉ်များ ခရီးသည်များ လုံခြုံစိတ်ချစွာ စီးနင်းနိုင်ရန် ဆောင်ရွက်ထားသင့်

အောက်တိုဘာ ၉၊ ၂၀၁၃
M-Media
လင်းလင်း

ဓါတ်ပုံအညွှန်း – ရန်ကုန်မြို့တွင်းပြေးဆွဲနေသော ဘတ်စ်ကားလိုင်း တစ်ခု၏ မြင်ကွင်းတစ်နေရာ

ရန်ကုန်  ။       ။         ရန်ကုန်မြို့တွင်းပြေးဆွဲနေသော ဂတ်စ်စွမ်းအင်သုံး ကားများအနေဖြင့် မကြာခဏ ဂတ်စ်အိုးကွဲမှု၊ ဂတ်စ်ပိုက်ပေါက်မှုများ ဖြစ်ပေါ်တတ်သဖြင့် ပိုမိုဂရုပြုရန် လိုအပ်နေကြောင်း သိရသည်။
လွန်ခဲ့သော အောက်တိုဘာ ၆-ရက်နေ့ မွန်းလွဲ ၁-နာရီခွဲခန့်တွင် လှည်းတန်းမှတ်တိုင်အနီး၌လည်း အမှတ် ၄၅-မော်တော်ယာဉ်လိုင်းမှ ခရီးသည်တင် ဘတ်စ်ကား တစ်စီးမှာ ဂတ်စ်ပိုက်လိုင်းပေါက်ပြီး ကားမှ မီးခိုးများ အူလာပြီး မီးတောက်များ ထွက်လာသဖြင့် အနီးရှိ သဲ၊ ရေတို့ဖြင့် ငြိမ်းသတ်နိုင်လိုက်သဖြင့် မီးလောင်မှု၊ ထိခိုက် ဒဏ်ရာရမှု မရှိခဲ့ဟု သိရသည်။
အဆိုပါ ဘတ်စ်ကားပေါ်တွင် လိုက်ပါ စီးနှင်းခဲ့သူ ခရီးသည်တစ်ဦးမှ “လှည်းတန်းမီးပွိုင့်ကိုကျော်ပြီး လှည်းတန်းမှတ်တိုင်ရောက်ခါနီးမှာ ကားကရုတ်တရက်  မီးခိုးတွေ ထွက်လာတယ်၊ မီးလောင်တယ်ဆိုပြီးခရီးသည်တွေ အမြန်ဆင်းပြေးကြတယ်၊ ခရီးသည်တွေလည်း ရုတ်တရက်ထွက်ဖို့မလွယ်တော့ တစ်ကားလုံး ဆူညံသွားတယ်”ဟု ပြောပြခဲ့သည်။
“ကားဂက်စ်ပိုက်ပေါက်တဲ့နေရာက အိတ်ဇောနဲ့လည်းနီးတော့ ရုတ်တရက်မီးခိုးတွေအူထွက်လာတာပါ၊ မီးတောက်အကြီးကြီးတော့မဟုတ်ပါဘူး။ မီးခိုးတွေကတော့ တစ်စီးလုံးအူနေတာပေါ့၊ လှည်းတန်းဂိတ်နားမှာ ဆိုတော့ သဲနဲ့ ရေကအလွယ်တကူရလို့တော်သေးတယ်။ ကားပေါ်မှာပါတဲ့ မီးသတ်ဆေးဘူးနဲ့
အမြန်ဖျန်းလို့တော်သေး တာပေါ့၊ မဟုတ်ရင် မလွယ်ဘူးဟု”ဘတ်စ်ကားပေါ်တွင် စီးနင်းလိုက်ပါခဲ့သူ ခရီးသည်များက ပြောသည်။
ဂက်စ်ကိုအဓိက အားထားအသုံးပြုနေရသော ရန်ကုန်ရှိ ယာဉ်များတွင် ခရီးသည်များလုံခြုံစိတ်ချစွာ စီးနင်းနိုင်ရန် ဆောင်ရွက်ထားသင့်ကြောင်း ခရီးသည်များက ပြောခဲ့သည်။