ဇနီးဖြစ်သူမှ ဖေ့စ်ဘွတ်ပေါ် ဓာတ်ပုံတင်၍ အိန္ဒိယဆော့ဖ်ဝဲ အင်ဂျင်နီယာတစ်ဦး မိမိကိုယ်ကို အဆုံးစီရင်

အောက်တိုဘာ- ၃၁ ၂၀၁၃
M-Media

မိမိ၏ကြင်စဦးဇနီးမှ ဖေ့စ်ဘွတ်ပေါ်ဓာတ်ပုံတင်သည့်အကြောင်းဖြင့် အချင်းများပြီးနောက် MNC ၌လုပ်ကိုင်နေသည့် ဆော့ဖ်ဝဲအင်ဂျင်နီယာတစ်ဦးသည် ယမန်နေ့က မိမိကိုယ်ကို အဆုံးစီရင်ခဲ့သည်။

Jharkand မှ ချန်ဒန်ကူးမား (၂၉ နှစ်) သည် မိဘ၏ သဘောကို ဆန့်ကျင်၍ Chennai မှ စန်ဟီယာနှင့် Chennai ရှိ ချာ့ခ်ျကျောင်း တစ်ခုတွင် မကြာသေးမီက လက်ထပ်ထိမ်းမြားခဲ့သည်။ သတို့သမီး စန်ဟီယာသည် ခရစ်ယာန်ဖြစ်ပြီး ချန်ဒန်သည် ဟိန္ဒူဖြစ်သည်။ ချန်ဒန်၏ မိသားစုမှ သဘောမတူသော်လည်း စန်ဟီယာမိသားစု၏ အကျိုးဆောင်မှုဖြင့် ချာ့ခ်ျတစ်ခု၌ လက်ထပ် ထိမ်းမြားရန် သဘောတူခဲ့ကြသည်။

မင်္ဂလာပွဲပြီးဆုံးပြီးနောက် ထိမ်းမြားမှုဓာတ်ပုံများကို စန်ဟီယာမှ ဖေ့စ်ဘွတ်ပေါ် တင်လိုက်သည်။ Jharkand ရှိ ချန်ဒန်၏ ၀မ်းကွဲညီအစ်ကိုများမှသိရှိပြီး သူ့မိဘများထံ အကြောင်းကြားနိုင်စေရန် ဖြစ်သည်။

ချန်ဒန်၏မိဘများက သူ့အား မဆိုင်းမတွ ဆက်သွယ်လာပြီး ၄င်းတို့အနေဖြင့် အလွန်ပင် စိတ်ထိခိုက်ခံစားရကြောင်း ဖော်ပြလေရာ သူက ဖေ့စ်ဘွတ်ပေါ်တင်ထားသော ဓာတ်ပုံများကို ချက်ခြင်းဖယ်ရှားလိုက်၏။ ယင်းသို့ပြုခြင်းကို စန်ဟီယာမှ ကန့်ကွက်ပြီး မရှေးမနှောင်းမှာပင် ယင်းအဖြစ်ဆိုးကိုကြုံရခြင်းဖြစ်သည်။ စုံစမ်းမေးမြန်းပြီးနောက် ရဲတပ်ဖွဲ့က စန်ဟီယာသည် မိမိတို့၏ တရားဝင် ထိမ်းမြားမှု ဓာတ်ပုံများကို မဖယ်ရှားလိုခဲ့ပါဟု ပြောဆိုသည်။

စနေနေ့ညဥ့်က အချေအတင်စကားများခဲ့ကြသည်။ ၄င်းနောက် သီးခြားစီ အခန်းခွဲအိပ်ခဲ့ကြသည်။ တနင်္ဂနွေနေ့ နံနက်ခင်းတွင် ချန်ဒန်သည် အခန်းတွင်းမှ ထွက်မလာသဖြင့် စန်ဟီယာမှာ တံခါးဖွင့်ကြည့်ရာ မိမိကိုယ်ကို ကြိုးဆွဲချ အဆုံးစီရင်ထားကြောင်း တွေ့ခဲ့ရသည်။ အဆုံးစီရင်ရခြင်း စာတို တစ်စောင်ကိုလည်းရေးသားခဲ့သည်။ ၄င်းစာအရ ချန်ဒန်သည် မိမိ၏ဇနီးအား ချစ်မြတ်နိုးဆဲဖြစ်သော်လည်း သူမသည် ဖေ့စ်ဘွတ်ပေါ်မှ ဓာတ်ပုံများကို မဖယ်ရှားသည့် အတွက် အလွန် စိတ်ထိခိုက်ကာ မိမိဘ၀ကိုအဆုံးသတ်ဖို့ ဆုံးဖြတ်ခဲ့ခြင်းဖြစ်သည်ဟု ဖော်ပြထားသည်။ ယင်းအမှုကို Chennai ရဲတပ်ဖွဲ့မှ စုံစမ်းစစ်ဆေးဆဲဖြစ်သည်။

Ref: The Real Singapore
————————————————-
** M-Media ၏ မူပိုင် သတင်း/ဆောင်းပါးများကို အွန်လိုင်းမီဒီယာများတွင် မည်သူမဆို လွတ်လပ်စွာကူးယူဖော်ပြနိုင်ပါသည်။ ကူးယူဖော်ပြသူများအနေဖြင့် M-Media မူရင်းလင့်ခ်ကို ထည့်ပေးဖို့ မေတ္တာရပ်ခံအပ်ပါသည်။
စီးပွားဖြစ် ထုတ်ဝေသော Print Media များတွင် အသုံးပြုလိုသူများ M-Media သို့ ခွင့်ပြုချက်တောင်းရန် လိုအပ်ပါမည်။
ဆက်သွယ်ရန် [email protected]