တောင်ကြီးမြို့တွင် လက်လုပ် ယမ်းမိုင်းတစ်လုံး တွေ့၍ သက်ဆိုင်ရာမှ ဖောက်ခွဲဖျက်ဆီး

ဒီဇင်ဘာ ၂၅၊ ၂၀၁၃
M-Media
ဇာဏီ

တောင်ကြီးမြို့ စိန်ပန်းရပ်ကွက်၊ ပြည်တော်အေးလမ်းရှိ ငြိမ်းချမ်း လူငယ် ဖွံ့ဖြိုးရေးနှင့် ပရဟိတဂေဟာဘေးတွင် ယနေ့ နေ့လည် ၁-နာရီဝန်းကျင်ခန့်က လက်လုပ် ယမ်းမိုင်းတစ်လုံးတွေ့ရှိ၍ သက်ဆိုင်ရာမှ ၎င်းနေရာတွင်ပင် ဖောက်ခွဲ ဖျက်ဆီးလိုက်ကြောင်း သိရပါတယ်။

“မိဘမဲ့ကျောင်းရဲ့ ဘေးနားမှာပါ။ ကျောင်းထဲမှာ ဖြစ်တာမဟုတ်ပါဘူး။ ဗုံးကွဲတာတော့မဟုတ်ဘူး။ ဘယ်သူလာပစ်သွားလဲတော့မသိဘူး။ လက်လုပ်မိုင်း တစ်ခုလို့ပြောတယ်။ BE တပ်က ကျွမ်းကျင်တဲ့သူတွေက အဲ့ဒီနေရာမှာပဲ ဖျက်ဆီးလိုက်ပါတယ်။ ဘယ်သူတစ်ဦးတစ်ယောက်ကိုမှ ထိခိုက်ဒဏ်ရာ ရမှုမရှိခဲ့ပါဘူး။ တရားခံက မည်သူမည်ဝါဆိုတာ မသိနိုင်သေးပါဘူး။ တောင်ကြီးမြို့က တာဝန်ရှိသူတွေလည်း စုံစမ်းဖော် ထုတ်နေကြပါတယ်”ဟု တောင်ကြီးမြို့ခံ တစ်ဦးက ပြောကြားလာပါတယ်။

သက်ဆိုင်ရာက အန္တရာယ်ကင်းသည့်နေရာ အဖြစ် မိဘမဲ့ကျောင်းဝင်းအတွင်းက ကလေးများ ကစားသည့် ဘောလုံးကွင်း အတွင်းတွင် ကျင်းတူး၍ သဲအိတ်များဖြင့် စနစ်ကျစွာ ဖျက်ဆီးပစ် လိုက်ခြင်းဖြစ်ကြောင်း တောင်ကြီးမြို့ခံမှ ထပ်မံ သတင်းပေးပို့ပါတယ်။

၎င်း ငြိမ်းချမ်းလူငယ် ဖွံ့ဖြိုးရေးနှင့် ပရဟိတဂေဟာ အနယ်နယ် အရပ်ရပ်မှ မွတ်စလင် မိဘမဲ့ ဆင်းရဲသားကလေး ၁၀၀-ခန့် လာရောက်နေထိုင်ပြီး ၆၀-ခန့်မှာ အခြေခံပညာအလယ်တန်းကျောင်းတွင် တက်ရောက်ပညာ သင်ကြားနေသူများဖြစ်ကြကြောင်း၊ ယခင် မှတ်ပုံတင် မပြုလုပ်မီက မွတ်စလင် မိဘမဲ့ ကလေးများဂေဟာ အမည်ဖြင့် ဘာသာရေးစာပေ သင်ကြားမှုရှိခဲ့ပြီး မှတ်ပုံတင်ပြီးနောက်ပိုင်းတွင် အခြေခံပညာကိုပါ သင်ကြားပေးနေခြင်း ဖြစ်ကြောင်းလည်း သိရပါတယ်။