ပါလက်စတိုင်း နယ်မြေအတွင်း တရားမ၀င်အိမ်ရာများ ထပ်ဆောက်ရန် အစ္စရေး ပြင်ဆင်နေ

ဇန်နဝါရီ ၂ ၊ ၂၀၁၄
M-Media

– ကုလသမဂ္ဂနှင့် အမေရိကန်တို့က တားမြစ်ထားသော်လည်း ပါလက်စတိုင်း ပိုက်နက်အတွင်း အိမ်ရာများ ထပ်မံဆောက်လုပ်သွားရန် အစ္စရေးက စီစဉ်နေပြီး အမေရိကန် နိုင်ငံခြားရေးဝန်ကြီး ဂျွန်ကယ်ရီ အရှေ့အလယ်ပိုင်းသို့ လာရောက်ရန် ရှိနေသောကြောင့် ထိုအစီအစဉ်အား ကြေညာခြင်း မပြုသေးဟု အစ္စရေး တာဝန်ရှိသူများ၏ ပြောကြားမှုများကို ကိုးကား၍ နယူးယောက် တိုင်မ်းသတင်းစာက ယနေ့တွင်ဖော်ပြခဲ့သည်။

ဂျွန်ကယ်ရီမှာ အစ္စရေး-ပါလက်စတိုင်း ငြိမ်းချမ်းရေးဆွေးနွေးမှုအား ကြားဝင်ဆောင်ရွက်ရန်အတွက် အရှေ့အလယ်ပိုင်းသို့ ယနေ့တွင် ရောက်ရှိမည်ဖြစ်ပြီး တနင်္ဂနွေနေ့အထိ ရှိနေမည်ဖြစ်သည်။ အစ္စရေးမှာ ၁၉၆၇ ခုနှစ် စစ်ပွဲပြီးကတည်းက ပါလက်စတိုင်းပိုင် အနောက်ဘက်ကမ်းခြေနှင့် အရှေ့ဂျေရုစလင်တို့အား သိမ်းပိုက်ထားပြီး အိမ်ရာများကို တိုးချဲ့ဆောက်လုပ်နေခဲ့သည်။ ပါလက်စတိုင်းအစိုးရကမူ အစ္စရေး၏ ထိုအိမ်ရာဆောက်လုပ်မှုအား ရှုတ်ချပြောဆိုခဲ့ပြီး ထိုကဲ့သို့ အိမ်ရာဆောက်လုပ်မှုများက ငြိမ်းချမ်းရေးဆွေးနွေးပွဲအား ထိခိုက်စေသည်ဟု ပြောကြားထားသည်။

ဓါတ်ပုံအညွှန်း- ၁၉၄၆ ခုနှစ် စတင်ပြီး ပါလက်စတိုင်းနယ်မြေများကို အစ္စရေးတို့ နှစ်အလိုက် ကျူးကျော်သိမ်းပိုက်ခဲ့သည့် မြေပုံ

Ref: Press TV