ဒုတိယကမ္ဘာစစ်အတွင်း ပြင်သစ်ရွာသားများကို သတ်မှု နာဇီတပ်ဖွဲ့ဝင်တစ်ဦးအား ဂျာမနီတွင် တရားစွဲ

ဇန်နဝါရီ ၉ ၊ ၂၀၁၄
M-Media

– ဒုတိယကမ္ဘာစစ်အတွင်းက ပြင်သစ်နိုင်ငံရှိ ရွာသားအချို့အား သတ်ဖြတ်ခဲ့မှုတွင် ပါဝင်ခဲ့မှုကြောင့် နာဇီ Waffen-SS တပ်မှ စစ်သားဟောင်း တစ်ဦးအား ဂျာမနီရှိ တရားသူကြီးများက ယမန်နေ့က တရားစွဲဆိုလိုက်သည်ဟု သိရသည်။

ထိုစစ်သားဟောင်းမှာ အသက် ၈၈ နှစ်အရွယ်ရှိပြီး ကိုလုံးမြို့တွင် နေထိုင်သူဖြစ်သည်။ ၎င်းမှာ ဒုတိယကမ္ဘာစစ်အတွင်းက ပြင်သစ်နိုင်ငံအလယ်ပိုင်း Limousin ဒေသရှိ Oradour-sur-Glane ရွာအား နာဇီစစ်တပ်များက ဖျက်ဆီးခဲ့မှုတွင် ပါဝင်ခဲ့ပြီး၊ ၎င်းနှင့် အခြားစစ်သားတစ်ဦးမှာ ရွာသား ၂၅ ဦးကို သေနတ်ဖြင့် ပစ်သတ်ခဲ့ကာ၊ ရွာရှိ ခရစ်ယာန်ဘုရားကျောင်းအား မီးရှို့မှုတွင်လည်း ကူညီခဲ့သူဖြစ်သည်ဟု တရားသူကြီးများအဖွဲ့မှ ပြောရေးဆိုခွင့်ရှိသူ အချင်မ် ဟန်စတန်ဘာဂ့်က ယမန်နေ့တွင် ပြောကြားခဲ့သည်။

သို့သော်လည်း အဆိုပါစစ်သားဟောင်း၏ နာမည်ကို ထုတ်ဖော်ပြောဆိုခြင်းမရှိခဲ့ဘဲ၊ မည်သည့်ပြစ်မှုများဖြင့် တရားစွဲဆိုထားသည်ကိုလည်း မပြောခဲ့ပေ။ ထိုစစ်သားဟောင်း၏ ရှေ့နေကမူ ၎င်း၏အမှုသည်မှာ ၁၉၄၄ ခု ဇွန်လ ၁၀ ရက်နေ့က ဖြစ်ပွားခဲ့သော အဆိုပါ စစ်ဆင်ရေးတွင် သေနတ်တစ်ချက်မှ ပစ်ခဲ့ခြင်းမရှိဘဲ၊ ရွာသားများ၏ အသက်ကို ကယ်တင်ရန်သာ ကြိုးစားခဲ့သည်ဟု ကာကွယ်ပြောဆိုထားသည်။

Ref: aljazeera

ဓါတ်ပုံ အညွှန်း- ဒုတိယကမ္ဘာစစ်အတွင်းက ပြင်သစ်နိုင်ငံအလယ်ပိုင်း Limousin ဒေသရှိ Oradour-sur-Glane ရွာအား နာဇီစစ်တပ်များက ဖျက်ဆီးခဲ့စဉ် (၁၉၄၄)
Photo- AFP