နာပိုလီ ပြောင်း၍ နောင်တမရဟု ဟီဂူအင်ဆို & ဘာလော့တယ်လီမှာ ထိပ်တန်း ကစားသမား မဟုတ်ဟု အန်ဆယ်လော့တီဆို

ဇန်နဝါရီ ၁၂၊ ၂၀၁၄
M-Media

– ရီးယဲလ်မက်ဒရစ်အသင်းအား စွန့်ခွာပြီး နာပိုလီအသင်းသို့ ပြောင်းရွှေ့ခဲ့ခြင်းကို နောင်တရမည်မဟုတ်ဘဲ နာပိုလီအသင်းတွင် ပျော်ရွှင်နေသည်ဟု တိုက်စစ်မှူး ဟီဂူအင်က ပြောဆိုလိုက်သည်။

အာဂျင်တိုင်းတိုက်စစ်မှူး ဟီဂူအင်မှာ ရီးယဲလ်အသင်းဖော်များဖြစ်ကြသည့် ဂျိုဆေး ကဲလ်လီဂျွန်နှင့် ရာအူးလ် အလ်ဘီအိုတို့နှင့်အတူ နာပိုလီအသင်းသို့ ပြီးခဲ့သည့် နွေရာသီက ပြောင်းရွှေ့လာခဲ့ခြင်းဖြစ်ပြီး ခြေစွမ်းပြနိုင်သောကြောင့် အသင်း၏ အဓိက ကစားသမားဖြစ်လာခဲ့သည်။

“(နာပိုလီကို ပြောင်းရွှေ့ဖို့) ကျွန်တော် ချမှတ်ခဲ့တဲ့ ဆုံးဖြတ်ချက်ကို နေ့တိုင်းကျွန်တော် ဂုဏ်ယူနေပါတယ်။ နေပဲလ်မြို့နဲ့ ဒီက ပြည်သူတွေကို ကျွန်တော် ချစ်ပါတယ်။ ဒီကို ပြောင်းရွှေ့ကို မာရာဒိုနာက ဆွဲဆောင်ခဲ့တာတော့ မဟုတ်ပါဘူး။ ဒီဆုံးဖြတ်ချက်ကို ကျွန်တော်ကိုယ်တိုင် ချမှတ်ခဲ့တာဖြစ်ပြီး နောင်တလည်း ရမှာမဟုတ်ပါဘူး” ဟု ဟီဂူအင်က Sportsweek အားကစားစာစောင်သို့ ပြောကြားခဲ့သည်။

နာပိုလီအသင်းမှာ အာဂျင်တီးနား ဂန္တ၀င်တိုက်စစ်မှူး မာရာဒိုနာ အောင်မြင်ခဲ့သည့် အသင်းဖြစ်ပြီး အသက် ၂၆ နှစ်အရွယ်ရှိ ဟီဂူအင်မှာ ယခုနှစ် စီးရီးအေ ၁၇ ပွဲတွင် ၉ ဂိုး သွင်းယူပေးထားသည်။

————————————————————–

ဘာလော့တယ်လီမှာ ထိပ်တန်းကစာသမား မဟုတ်ဟု အန်ဆယ်လော့တီဆို

– အေစီမီလန်အသင်းတိုက်စစ်မှူး ဘာလော့တယ်လီမှာ စိတ်ချရသော ကစားသမားမဟုတ်ဘဲ အီတလီအသင်းကိုလည်း ဦးဆောင်နိုင်မည်မဟုတ်ဟု ရီးယဲလ်အသင်းနည်းပြ ကားလို အန်ဆယ်လော့တီက ပြောကြားလိုက်သည်။

လာမည့်နှစ်တွင် ဘရာဇီးလ်၌ကစားမည့် ကမ္ဘာ့ဖလားပြိုင်ပွဲဝင် အီတလီအသင်း တိုက်စစ်တွင် ဦးဆောင်ကစားမည့် ရော့စီမှာ ဒူးဒဏ်ရာကြောင့် ပြိုင်ပွဲနှင့် လွဲချော်ရဖွယ်ရှိနေပြီး ဘာလော့တယ်လီက အသင်းတိုက်စစ်အတွက် အရေးပါသောသူဖြစ်လာခဲ့သည်။

သို့သော်လည်း အန်ဆယ်လော့တီက ဘာလော့တယ်လီမှာ ထိပ်တန်းအဆင့်ရှိ ကစားသမားမဟုတ်ဟု ပြောဆိုခဲ့သည်။

“အီတလီအသင်းရဲ့ တကယ့်ပြဿနာကတော့ တိုက်စစ်မှာပါ။ တိုက်စစ်အတွက် သူတို့မှာ ထိပ်တန်းကစားသမားမရှိပါဘူး။ ဘာလော့တယ်လီကို စောင့်နေပေမယ့်လည်း သိပ်ပြောင်းလဲဖို့ မရှိပါဘူး။ သူဟာ ပါရမီရှိပေမယ့် ယုံကြည်လို့မရသေးပါဘူး။ (စိတ်ဆတ်လွယ်တဲ့အတွက်) အချိန်မရွေး အသင်းဟာ ၁၀ ယောက်ဖြစ်သွားနိုင်ပါတယ်” ဟု RNE စပိန်ရေဒီယို သတင်းဌာနသို့ အန်ဆယ်လော့တီက ပြောကြားခဲ့သည်။

အီတလီအသင်းမှာ ကမ္ဘာ့ဖလား အုပ်စု D တွင် ဥရုဂွေး၊ ကော်စတာရီကာ၊ အင်္ဂလန်အသင်းနှင့် တစ်အုပ်စုတည်းကျရောက်နေပြီး ဇွန်လ ၁၄ ရက်နေ့တွင် အင်္ဂလန်အသင်းနှင့် အဖွင့်ပွဲ စတင်ကစားရမည်ဖြစ်သည်။