ဆီးရီးယား အစိုးရတပ်နှင့် သူပုန်တပ် တိုက်ပွဲအတွင်း ဟုမ်းစ်မြို့သို့ သွားရောက်သည့် ကယ်ဆယ်ရေး ယာဉ်တန်းထိခိုက်၊ ၂ ဦး ဒဏ်ရာရရှိ

ဖေဖော်ဝါရီ ၉ ၊ ၂၀၁၄
M-Media

– ဆီရီးယား အစိုးရတပ်များနှင် သူပုန်တို့အပြန်အလှန် တိုက်ခိုက်မှုများကြောင့် ဟုမ်းစ်မြို့တွင် ပိတ်မိနေသည့် အရပ်သား ၂၅၀၀ ကျော်အတွက် အစားအစာများ၊ ဆေးဝါးများ ထောက်ပံ့ရန်သွားရောက်သည့် ကုလသမဂ္ဂ ဦးဆောင်သော ကူညီကယ်ဆယ်ရေး ယာဉ်တန်းမှာ ယမန်နေ့က တိုက်ခိုက်ခံခဲ့ရသည်ဟု သိရသည်။

သူပုန်များ ထိန်းချုပ်ထားရာ ဒေသအချို့တွင် မှောင်ရီပျိုးစအချိန်၌ ဖြစ်ပွားခဲ့သော ထိုတိုက်ခိုက်မှုအတွင်း မော်တာကျည်မှာ ယာဉ်တန်း၏ အနီးအနားတွင် ကျရောက်ပေါက်ကွဲခဲ့ပြီး၊ ပစ္စည်းများတင်ဆောင်လာသည့် လော်ရီကားများကိုလည်း တိုက်ခိုက်မှုများရှိခဲ့ကာ လော်ရီယာဉ်မောင်းများ ထိခိုက်ဒဏ်ရာရရှိခဲ့ကြောင်း၊ လခြမ်းနီအဖွဲ့နှင့် ကုလမှ အနည်းဆုံး မော်တော်ယာဉ် ၉ စီးမှာ ဟုမ်းစ်မြို့တွင် နာရီပေါင်းအတော်ကြာ ပိတ်မိနေခဲ့ပြီး ဒေသစံတော်ချိန် ည ၁၀ နာရီမတိုင်မီ လွတ်မြောက်ခဲ့ကာ ထောက်ပံ့ရေး ပစ္စည်းများ သယ်ဆောင်လာသည့် လော်ရီကား ၂ စီး ပျက်စီးခဲ့ကြောင်း ဆီးရီးယားအာရပ် လခြမ်းနီအဖွဲ့က ပြောကြားခဲ့သည်။

ဟုမ်းစ်မြို့တွင် ပိတ်မိနေသည့် လူ ၂၅၀၀ အတွက် ရိက္ခာများ၊ ဆေးဝါးများ၊ အိပ်ရာများ၊ ငွေကြေးနှင့် အခြားပစ္စည်းများ ပါဝင်သော ထိုထောက်ပံ့ရေး ပစ္စည်းများမှာ ဟုမ်းစ်မြို့အနီး အစိုးရကထိန်းချုပ်ထားသော ကုလသမဂ္ဂ ကုန်လှောင်ရုံတွင် ရောက်ရှိနေသည်မှာ လပေါင်းအတော်ကြာနေပြီဖြစ်ပြီး၊ ယခုမှ သွားရောက်ပေးအပ်နိုင်ခြင်းဖြစ်သည်။

ပြီးခဲ့သည့် သီတင်းနှစ်ပတ်က ဆွစ်ဇလန်နိုင်ငံ ဂျီနီဗာတွင်ပြုလုပ်ခဲ့သည့် ငြိမ်းချမ်းရေးဆွေးနွေးပွဲတွင် သဘောတူညီထားသည့်အတိုင်း သောကြာနေ့က စတင်ကာ ၃ ရက်ကြာ အပစ်အခတ်ရပ်စဲခဲ့ပြီး ဟုမ်းစ်မြို့တွင် ပိတ်မိနေသူများအား ကယ်ထုတ်နိုင်ခဲ့သည်။

အပစ်အခတ်ရပ်စဲရေး ပျက်ပြယ်သွားမှုနှင့် ပတ်သက်၍ အစိုးရနှင့် သူပုန်များက အပြန်အလှန် ပြစ်တင်ပြောဆိုမှုများ ပြုလုပ်ခဲ့ကြသည်။ ဟုမ်းစ်မြို့၏ မြို့တော်ဝန် တာလာ အလ်-ဘာရာဇီကမူ Bustan al-Diwan နှင့် Hamidiyeh ဒေသများတွင် ရှိနေသည့် ပြည်သူများအား အကူအညီများ ဝေငှခဲ့ပြီးပြီဟု ပြောကြားခဲ့သည်။

Ref: aljazeera