မော်ရင်ဟိုက မိမိအား အနိုင်မခံ အရှုံးမပေး စိတ်ဓာတ် ထည့်ပေးခဲ့ဟု ဒရော့ဂ်ဘာဆို

ဖေဖော်ဝါရီ ၂၅၊ ၂၀၁၄
M-Media

– ချယ်ဆီးအသင်းတွင် ကစားခဲ့စဉ် မော်ရင်ဟိုရိုက်သွင်းပေးခဲ့သည့် အလုပ်နှင့်ပတ်သက်သည့် ကျင့်ဝတ်က ဘောလုံးလောက၌ မိမိ၏ အောင်မြင်မှု အတွက် အဓိကကျခဲ့သည်ဟု ဂါလာတာစာရေး တိုက်စစ်မှူး ဒီဒီယာ ဒရော့ဂ်ဘာက ပြောကြားခဲ့သည်။

ဗုဒ္ဓဟူးနေ့တွင် ကစားမည့် ချန်ပီယံလိဂ်ပွဲစဉ်တွင် ဂါလာတာစာရေးအသင်းနှင့်အတူ အသင်းဟောင်း ချယ်ဆီး၊ နည်းပြဟောင်း မော်ရင်ဟိုတို့နှင့် ပြန်လည်တွေ့ဆုံရန် ရှိနေသည့် ဒရော့ဂ်ဘာက မော်ရင်ဟိုမှာ မိမိတွဲလုပ်ဖူးသည့် နည်းပြများထဲတွင် အကောင်းဆုံးဖြစ်ပြီး၊ မော်ရင်ဟို သင်ပေးခဲ့သည့် ကျင့်ဝတ်များက မိမိ၏ စိတ်ပိုင်းဆိုင်ရာကို လွှမ်းခဲ့သည်ဟု ဆိုသည်။

“ချယ်ဆီးမှာရှိနေစဉ် ကျွန်တော်တို့ရဲ့ ဒဿနက ရိုးရှင်းပါတယ်။ သူ(မော်ရင်ဟို)က အရှုံးကို မုန်းတီးအောင် ကျွန်တော်တို့ကို သင်ပေးခဲ့တာပါ။ လေ့ကျင့်ရေးကွင်းက ပွဲမှာ ဂိုးပေးလိုက် ရတဲ့အခါ အရေးကြီးတဲ့ပွဲမှာ ဂိုးပေးလိုက်ရသလိုမျိုး ဂျွန်တယ်ရီဟာ အော်ဟစ် ကန်ကျောက်တာမျိုးကို တွေ့ရမှာပါ။ လေ့ကျင့်ရာမှာတောင် ကျွန်တော်တို့မှာ ဒီလိုစိတ်ဓာတ် မျိုးရှိနေရင် ပရီးမီးယားလိဂ်နဲ့ ချန်ပီယံလိဂ်မှာ ဘယ်လို စိတ်ဓာတ်မျိုးဆိုတာ စဉ်းစားလို့ရပါတယ်” ဟု ဒရော့ဂ်ဘာက သတင်းထောက်များအား ပြောကြားခဲ့သည်။

အသက် ၃၅ နှစ်အရွယ်ရှိ ဒရော့ဂ်ဘက ၎င်းအနေဖြင့် ၂၀၀၄ ခုနှစ် ချယ်ဆီးအသင်း၏ကမ်းလှမ်းမှုကို ငြင်းပယ်တော့မည်ဆဲဆဲတွင် မော်ရင်ဟို၏ ဆွဲဆောင်မှုကြောင့် ရောက်ရှိလာခြင်းဖြစ်သည်။

ချယ်ဆီးသို့ ပြောင်းရွှေ့မှုမှာ အလောင်းအစား တစ်ခုဖြစ်ပြီး၊ အကောင်းဆုံး ကစားသမားဖြစ်ချင်ပါက ချယ်ဆီးသို့ လာရောက်ကစားရန်နှင့် အသင်းသို့ ရောက်ရှိပါက ကစားပုံကောင်းရမည်ဖြစ်ကာ ကစားပုံမကောင်းလျှင် အသင်းတွင် ပါဝင်ရမည် မဟုတ်ဟု မော်ရင်ဟိုက ပွင့်ပွင့်လင်းလင်း ပြောကြား ခဲ့ကြောင်း ဒရော့ဂ်ဘာက ၀န်ခံခဲ့သည်။

ဒရော့ဂ်ဘာမှာ ချယ်ဆီးအသင်းတွင် ၈ နှစ်ကြာကစားခဲ့ပြီး ချန်ပီယံလိဂ် အပါအ၀င် ဆုဖလား ၁၀ ခုကျော်ရရှိခဲ့ကာ၊ တစ်ဦးချင်း ဆုတံဆိပ်များလည်း အများအပြား ဆွတ်ခူးခဲ့သည်။

Ref : Goal