မြောက်ကိုရီးယားထံမှ စစ်လက်နက်ပစ္စည်းများ မြန်မာအစိုးရ ဝယ်ယူနေဆဲ ဟု အမေရိကန်ပြော

မတ်-၆၊ ၂၀၁၄
M-Media

– မြောက်ကိုရီးယားနှင့် ဆက်ဆံရေးကို လျှော့ချမည်ဟု ပြောကြားထားသော်လည်း မြန်မာနိုင်ငံအနေဖြင့် မြောက်ကိုရီးယားမှ စစ်လက်နက် ပစ္စည်းများအား ဆက်လက်ဝယ်ယူလျက်ရှိနေသည်ဟု အမေရိကန် ကာကွယ်ရေး ၀န်ကြီးဌာနက ပြောကြားခဲ့သည်။

ကွန်ဂရက်သို့ တင်သွင်းသော မြောက်ကိုရီးယား စစ်လက်နက် ပစ္စည်းဆိုင်ရာ အစီရင်ခံစာမှာ ယမန်နေ့က ထွက်ပေါ်လာခဲ့ရာ မြောက်ကိုရီးယားနိုင်ငံ အနေဖြင့် ကမ္ဘာတစ်ဝှမ်းလုံးသို့ လက်နက်များကို လျှို့ဝှက်စွာရောင်း ချနေကြောင်း ဖော်ပြထားသည်။

မြောက်ကိုရီးယားမှ လက်နက်ရောင်းချသည့်နိုင်ငံများတွင် အီရန်၊ ဆီးရီးယားနှင့် မြန်မာနိုင်ငံတို့မှာ အဓိကဖြစ်သော်လည်း မြန်မာနိုင်ငံ အနေဖြင့် မြောက်ကိုရီးယားနှင့် ဆက်ဆံမှုအား လျှော့ချနေကြောင်း ဖော်ပြထားသည်။

ထိုကဲ့သို့ စစ်လက်နက်ပစ္စည်း ၀ယ်ယူမှုအား တားမြစ်ထားသော ကုလ၏ ဥပဒေကို ချိုးဖောက်ခြင်း မရှိဟု မြန်မာနိုင်ငံက ပြောကြား ခဲ့သည်။  မြောက်ကိုရီးယားက ၎င်းတို့၏ ဒုံးကျည် နည်းပညာများကို ယခင်က မြန်မာနိုင်ငံသို့ ထောက်ပံ့သည်ဟု သံသယရှိထားပြီး၊ ထိုကဲ့သို့ ၀ယ်ယူမှုများကို ရပ်တန့်ရန် အတွက် မြန်မာနိုင်ငံ၏ ပြုပြင်ပြောင်းလဲရေး အစိုးရအား အမေရိကန်က ဖိအားပေးထားသည်။

မြောက်ကိုရီးယား၏ လက်နက် ကုန်သွယ်မှုများက နျူးကလီးယားလက်နက်နှင့် တာဝေးပစ် ဒုံကျည်များ ထုတ်လုပ်မှုအား အထောက်အကူပြုနိုင်မည်ကို အမေရိကန်က စိုးရိမ်လျက်ရှိသည်။ ပြီးခဲ့သည့် ဒီဇင်ဘာလကလည်း မြန်မာစစ်တပ် အကြီးအကဲ တစ်ဦးနှင့် ကုမ္ပဏီတစ်ချို့အား မြောက်ကိုရီးယားနှင့် လက်နက် ကုန်သွယ်မှုများကို ဆက်လက် လုပ်ဆောင်နေသည့် အတွက် အမည်ပျက် စာရင်းသွင်းခဲ့သည်။

AP