ဖက်ဒရယ် ဖွဲ့စည်းပုံ မူကြမ်း နိုင်ငံရေးဆွေးနွေး ပွဲမှသာ ချပြမည်ဟု UNFC အတွင်းရေးမှူးဆို

မတ် ၂၀၊ ၂၀၁၄
M-Media
KK

နိုင်ငံလုံးဆိုင်ရာ အပစ်အခတ်ရပ်စဲရေး သဘောတူ လက်မှတ်ရေးထိုး နိုင်ငံရေးဆွေးနွေး ပွဲရောက်မှသာ ဖရက်ဒရယ် ဖွဲ့စည်းပုံ မူကြမ်းကို တင်ပြ ဆွေးနွေးသွားမည်ဟု သိရသည်။

“ငြိမ်းချမ်းရေးဖော်ဆောင်မှု လုပ်ငန်းစဉ်မှာ အပစ်အခတ်ရပ်စဲရေးဟာ အဆင့်တစ် ဖြစ်နေတယ်။ ဒီအဆင့်တစ်မှာ ကသိကအောင့် မဖြစ်စေရန် စာမူကို မထုတ်ပြန်သေးခြင်းကြောင်း၊ တပ်မတော်ဘက်က အာမခံ ချက်ရှိရှိ ပါဝင်လာရန် အရင်ဆုံး စောင့်မည်ဖြစ်ကြောင်း UNFC တွဲဖက် အတွင်းရေးမှူး-၂ ဗိုလ်မှူးကြီး ခွန်ဥက္ကာက ပြောကြားသည်။

တိုင်းရင်းသားများ၏ ဖွဲ့စည်းပုံပါ ဖက်ဒရယ်ကာကွယ်ရေး တပ်မတော် ဖွဲ့စည်းပုံအခန်းသည် လက်ရှိ ၂၀၀၈ ခုနှစ် ဖွဲ့စည်းပုံအခြေခံ ဥပဒေနှင့် ကွာဟ နိုင်သည်ဟု ၎င်းကဆိုသည်။

အဆိုပါ ဖွဲ့စည်းပုံအခြေခံဥပဒေ မူကြမ်းကို UNFC နှင့် UNA တို့ ပူးပေါင်းကာ နိုင်ငံရေး ဦးဆောင် ကြီးကြပ်ရေး ကော်မတီဝင် ၆ ဦး၊ ဥပဒေရေးရာ အကြံပေးကော်မတီဝင် ၉ ဦးနှင့် မူကြမ်းရေးဆွဲရေး ကော်မတီဝင် ၁၆ ဦးက ၂၀၁၃ ခုနှစ် ဧပြီတွင် စတင်ရေးဆွဲခဲ့ခြင်းဖြစ်ကာ လက်ရှိတွင် အင်္ဂလိပ် ဘာသာဖြင့် ရေးဆွဲပြီးစီးသွားပြီ ဖြစ်ပြီး မြန်မာဘာသာသို့ ပြန်ဆိုရန် ကျန်ရှိတော့သည်ဟု သိရှိရသည်။

၎င်းဖွဲ့စည်းပုံ မူကြမ်းအား တိုင်းရင်းသား လူမျိုးများ ဖက်ဒရယ်ကောင်စီ (UNFC) နှင့် ညီညွတ်သော တိုင်းရင်းသားလူမျိုးများ မဟာမိတ် အဖွဲ့ (UNA)တို့ ပူးပေါင်းရေးဆွဲထားခြင်းဖြစ်ပြီး အခန်း ၁၅-ခန်းနှင့် ပုဒ်မပေါင်း ၂၀၀-ကျော်ပါဝင်ကာ ပြည်ထောင်စုအဖွဲ့ဝင် ပြည်နယ်များအကြောင်းနှင့် ဖက်ဒရယ် ပြည်ထောင်စု ကာကွယ်ရေး တပ်မတော်၏ ဖွဲ့စည်းပုံတို့ကိုလည်း အခန်း တစ်ခုစီဖြင့် သီးခြားဖော်ပြထားသည်။