အာဏာရှင်စနစ်၏ အသက်ကယ်ဆေး (သို့) အစွန်းရောက် အမျိုးသားရေးဝါဒ

ဧပြီ ၁၂၊၂၀၁၄
M-Media
ဆောင်ပါးရှင်-ဦးဦး မှော်ဆရာ

နိုင်ငံရေးစနစ်တစ်ခုမှ တစ်ခုသို့ကူးပြောင်းခြင်း (သို့မဟုတ်) အာဏာရှင်အစိုးရစနစ်တစ်ရပ် ဆုံးခန်း တိုင်ခြင်းဟာ တိုင်းပြည်ရဲ့ လက်ရှိအားကောင်းဆဲ အုပ်စုတွေကို ခြိမ်းခြောက်လေ့ရှိပါတယ်။ အဲဒီအုပ်စုတွေထဲမှာ စစ်တပ် ဗျူရိုကရေစီယန္တရားနဲ့ လက်တဆုပ်စာလူတစ်စုနဲ့ပဲဆိုင်တဲ့ အကျိုးစီးပွားတွေ ပါဝင်တယ်။ ဒီမိုကရေစီဟာ သူတို့ကို ခြိမ်းခြောက်နေတယ်လို့ အင်အားကြီးအုပ်စုတွေက ခံစားရတဲ့အခါ သူတို့ဟာ သူတို့နိုင်ငံရဲ့ စနစ်ကျင့်ထုံးတွေကို အားနည်း ချည့်နဲ့သွားအောင်၊ ကြိုးကိုင်ခြယ်လှယ်လို့ရအောင် ကြိုးပမ်းလေ့ ရှိပါတယ်။ ယခင် အာဏာရှင်ဟောင်းတွေကပဲ လက်ရှိအင်အားကောင်းတဲ့ အစိုးရပိုင်း၊ စီးပွားရေးပိုင်းနဲ့ မီဒီယာရင်းမြစ်တွေအပေါ်မှာ တစ်စိတ်တစ်ပိုင်း ထိန်းချုပ် ထားနိုင်သေးတာကလည်း ဒီလိုခြယ်လှယ်နိုင်တဲ့ အခွင့်အရေးမျိုး ဖန်တီးပေးနေပါတယ်။ သူတို့ရဲ့ တည်ဆဲအနေအထားကို ကယ်တင်နိုင်ဖို့အတွက် အဲဒီ ခြိမ်းခြောက်ခံအုပ်စုတွေဟာ လူအများစုရဲ့ ထောက်ခံမှုကို ရရှိအောင် ရှာဖွေကြတယ်။ ဒီအခါမှာ အများဆုံးလုပ်လေ့ရှိတာကတော့ ဒီမိုကရေစီနည်းကျစရာမလိုဘဲနဲ့ သူတို့ကိုယ်သူတို့ လူကြိုက်များ ရေပန်းစား လာအောင်လုပ်နိုင်မယ့် အမျိုးသားရေးမျက်နှာစာနဲ့လှည့်ပြီး သိမ်းသွင်းစည်းရုံးတော့တာပဲ..။ ဒီနည်းလမ်းကသာ အာဏာရှင်စနစ် ဆက်လက် ရှင်သန်နိုင်မယ့် နောက်ဆုံး အသက်ကယ်ဆေးတစ်ဖုံပါ။ သူတို့ရဲ့ လက်ကျန်သြဇာလွှမ်းမိုးမှုကို ကောင်းကောင်းအသုံးချပြီးတော့ သူတို့ဟာ အခြားအတိုက်အခံ အုပ်စုတွေရဲ့ နိုင်ငံရေးလမ်းစဉ်ထဲမှာလည်း အမျိုးသားရေး ဆိုတာကို မပါမဖြစ်ပါရတဲ့ ဟင်းလျာတစ်မျိုးဖြစ်လာရလေအောင် ဆွဲဆောင်ရာမှာ အောင်မြင်ကောင်း အောင်မြင် သွားနိုင်ပါတယ်။ ဘာကြောင့်လဲဆိုတော့ အစိုးရစနစ်ဟောင်းရဲ့ ရည်မှန်းချက်ကြီးတဲ့ အတိုက်အခံတွေ (လူနည်းစု တိုင်းရင်းသားတွေနဲ့ လူများစုလူမျိုးကြီးအုပ်စုထဲက ထိပ်ပိုင်းအလွှာတွေ အပါအဝင်)ဟာလည်း `အမျိုးသားရေး´ဆိုတာကို ဆွဲဆောင်မှုရှိတဲ့ စင်မြင့်တစ်ခုအဖြစ် ရှုမြင်မယ့်အလားအလာရှိပါတယ်။ အောင်မြင်တဲ့ အမျိုးသားရေးလှုပ်ရှားမှုတစ်ခု ကိုသာ သူတို့ ဦးဆောင်နိုင်ခဲ့မယ်ဆိုရင် သူတို့ဟာ တိုင်းပြည်ခေါင်းဆောင် ဖြစ်လာမှာကိုးဗျ။

¥¥¥¥¥¥¥¥¥   ¥¥¥¥¥¥¥¥¥   ¥¥¥¥¥¥¥¥¥

ကျနော် နိုင်ငံရေးသိပ္ပံပညာဆည်းပူးခဲ့တဲ့ ဆရာသမားတွေထဲက တစ်ဦးအပါအ၀င်ဖြစ်တဲ့ “အီဂေါ ဘလာဇီဗစ်” ဟာ ဘော့စနီးယားနိုင်ငံမှာ မွေးဖွားတဲ့ ခရိုအက်လူမျိုးတစ်ယောက်ဖြစ်တယ်။ ကျနော်ကြုံခဲ့ဖူးတဲ့ နိုင်ငံရေးပညာရှင်တွေထဲမှာ ဆရာအီဂေါ နဲ့ ကျနော် ရင်းနှီးမှုပိုရှိသလို၊ ကျနော်နဲ့ အမြဲတမ်းအမြင်တူတယ်လို့ မဆိုသာပေမဲ့ ဆရာ့ရဲ့ ဓမ္မဓိဌါန်ကျကျ တွေးဆကောက်ချက်ချပုံတွေကို ကျနော် သဘောကျပါတယ်။ တစ်ရက်မှာ ဆရာအီဂေါဆီက သူတို့ နိုင်ငံမှာကြုံခဲ့ရတဲ့ ခေတ်ပြောင်းစနစ်ပြောင်းချိန်မှာ အာဏာရှင်တွေရဲ့ အစွန်းရောက်အမျိုးသားရေးဝါဒ လှိမ့်သွင်းခဲ့မှုကစလို့ ဆက်တိုက် ဖြစ်ပွားခဲ့တဲ့ လူမျိုးသုဉ်းသတ်ဖြတ်မှုတွေအကြောင်း ကျနော် နားထောင်မှတ်သားခဲ့ရပါတယ်။ အဲဒီတုန်းက ဆရာ`အီဂေါ´ ပြောပြတဲ့ ဖြစ်ရပ်တွေဟာ အခု ကျနော့်ဒီဆောင်းပါးရဲ့ အခြေခံကျောရိုး ဖြစ်ပါတယ်။

`အီဂေါ´တို့နေထိုင်ခဲ့တဲ့ဒေသမှာ ခရိုအက်တွေ၊ အဲလ်ဘေးနီးယားမွတ်ဆလင်တွေ၊ ဆာ့ဘ်တွေအပြင် တခြားလူမျိုးတွေ အစုံရှိကြတယ်။ တချိန်မှာတော့ ဒီလို ဘာသာ၊လူမျိုးမတူပေမဲ့ နှစ်ပေါင်းများစွာ အတူတကွရင်းရင်းနှီးနှီး အေးအေးချမ်းချမ်း နေထိုင်လာခဲ့တဲ့ အိမ်နီးချင်းကောင်းတွေဟာ ရုတ်တရက် အချင်းချင်းသတ်ဖြတ်ကြတဲ့အထိ တဘက်နဲ့တဘက် နာနာကျည်းကျည်း မုန်းတီးသွားခဲ့ကြပါတယ်။ `အီဂေါ´ ရဲ့ ဦးလေးတွေ အဒေါ်တွေဆိုရင် လူသတ်ပွဲတွေမှာ အသက်ဆုံးရှုံး ခဲ့ရတယ်။ `အီဂေါ´ကိုယ်တိုင်လဲ မသေယုံတမယ် ထွက်ပြေးလာခဲ့ရတယ်။ ဒီလို နှစ်ပေါင်းများစွာ ချစ်ချစ်ခင်ခင်နေထိုင် လာကြတဲ့  အိမ်နီးချင်းကောင်းတွေဟာ တစ်ယောက်မျက်နှာတစ်ယောက် မကြည့်ချင်တော့လောက်အောင် ဖြစ်သွား စေတာ ဘယ်အကြောင်းခံကြောင့်လဲလို့ `အီဂေါ´က နှစ်ပေါင်း၂၀လောက် ကိုယ့်ကိုယ်ကို မေးခွန်းထုတ်နေခဲ့တယ်။ အဲဒီအဖြစ်အပျက်တွေကို ဒီထက်ပိုပြီး လေ့လာချင်စိတ်တွေ ဖြစ်လာခဲ့တယ်။ ကိုယ့်နိုင်ငံမှာမှ မဟုတ်ဘူး၊ တခြားနိုင်ငံ တွေမှာလည်း ဒါမျိုးတွေဖြစ်ခဲ့တယ်ဆိုတာကို စပြီးလေ့လာတယ်။ နောက်ပိုင်း ဒီဖြစ်ရပ်ဆိုးနဲ့ပက်သက်ပြီး ငါတို့ ခံစားခဲ့ရတယ်၊ သူတို့က အသာရခဲ့တယ်ဆိုတဲ့ စိတ်ခံစားချက်ကို ဘေးဖယ်ထားပြီး ဒီလို ဘာကြောင့်ဖြစ်လာသလဲ ဆိုတာကို ပညာရှင်ဆန်ဆန် စနစ်တကျသုံးသပ်ကြည့်တော့ အဖြေတစ်ခု ကောက်ချက်ဆွဲလို့ရလာတယ်။ အဖြေဆိုတာ ထက် ဖြစ်တတ်တဲ့ပုံစံတစ်ခုကို သွားတွေ့တယ်။ အဲဒီဖြစ်စဉ်ကို “The Vicious Circle of Extreme Nationalism” (အစွန်းရောက် အမျိုးသားရေးဝါဒကြောင့် ဆင့်ကဲဖြစ်လာတဲ့ အဆိုးကျော့သံသရာ)လို့ အမည်ပေးခဲ့တယ်။ တဘက်ဘက် က သတ်ဖြတ်၊ မီးရှို့၊ လုယက်ဖျက်ဆီးတာတွေ တရားလွန်လုပ်လာတဲ့အခါ ကျန်တဲ့တဘက်ကလည်း လက်တုန့်ပြန် အကြမ်းဖက်လာတဲ့အတွက် ဒီအဆိုးသံသရာက မပြီးဆုံးနိုင်တော့ဘဲ ဆင့်ကဲဆင့်ကဲနဲ့ သံသရာလည်သွားတဲ့အကြောင်း ကို ဖေါ်ညွှန်းထားတာပါ။

ယူဂိုဆလားဗီးယားပြည်ထောင်စုရဲ့ နောက်ခံသမိုင်းအကျဉ်း

စစ်အေးခေတ်တုန်းက အရှေ့ဥရောပနိုင်ငံတွေနဲ့အတူ ယူဂိုဆလားဗီးယားပြည်ထောင်စုဟာလည်း ကွန်မြူနစ်နိုင်ငံ ဖြစ်ခဲ့ပါတယ်။ ယူဂိုဆလားဗီးယားပြည်ထောင်စုဆိုတာ ၀ါဒတူကွန်မြူနစ်နိုင်ငံ ခြောက်နိုင်ငံအပြင် ကိုယ်ပိုင် အုပ်ချုပ်ခွင့်ရ စီရင်စုနှစ်စု ပေါင်းထားတာဖြစ်ပြီး မတူကွဲပြားတဲ့ လူမျိုးတွေ၊ ကိုးကွယ်မှုတွေ စုစည်းထားတဲ့ တိုင်းပြည်ကြီးတစ်ခုပါ။

ပြည်နယ်အလိုက် အနှစ်ချုပ်ဖေါ်ပြရရင် –

(၁) ဆလိုဗေးနီးယားပြည်နယ်မှာ လူဦးရေ ၁ သန်းခန့်ရှိပြီး၊ အများစုက ဆလိုဗေးနီးယန်း(၉၅%)တွေ ဖြစ်ပါတယ်။ တခြားပြည်နယ်တွေထက် ပိုပြီး ဖွံ့ဖြိုးတိုးတက်တဲ့ ပြည်နယ်တစ်ခုပါ။ (၁၉၉၁)ခုနှစ် ဇွန်လမှာ ခွဲထွက်သွားပါတယ်။

(၂)  ခရိုအေးရှား – လူဦးရေ ၄ သန်းလောက်ရှိပြီး အများစုက ခရိုအက်လူမျိုးတွေ ဖြစ်ပါတယ်။ လူနည်းစု ဆာ့ဘ်တွေက ၁၂% ရှိပြီး ဟိုတစ်စု ဒီတစု စုစည်းပြီးနေထိုင်ခဲ့ကြပါတယ်။ (၁၉၉၁)ခုနှစ် ဇွန်လ (၂၅)ရက်နေ့မှာ လွတ်လပ်ရေးကြေငြာ ခဲ့တဲ့အတွက် တိုက်ပွဲတွေ ဖြစ်ပွားခဲ့ပါတယ်။

(၃)  မက်ဆီဒိုနီးယား – လူဦးရေရဲ့ ၃ ပုံ ၁ ပုံခန့်ရှိတဲ့ အဲလ်ဘေးနီးယား မွတ်ဆလင်တွေဟာ မြောက်ပိုင်းမှာ စုစည်းနေထိုင် ကြပါတယ်။ (၁၉၉၂) ခုနှစ် ဇန်န၀ါရီလမှာ လွတ်လပ်တဲ့ မက်ဆီဒိုးနီးယားနိုင်ငံ ဖြစ်လာခဲ့ပါတယ်။

(၄)  ဘော့စနီးယား ဟာဇီဂိုးဗီးနား – ဘော့စနီးယား (Bosniak) မွတ်ဆလင် (၄၃%) လောက်ရှိပြီး၊ ဘော့စနီးယား ဆာ့ဘ် အော်သိုဒေ့ါ (၃၁%)၊ ဘော့စနီးယား ခရိုအက် ကတ်သိုလစ် (၁၇%) ခန့်ရှိတယ်။ ဆာ့ဘ်လူမျိုး မွတ်ဆလင်တွေလည်း ရှိပါတယ်။ (၁၉၉၂) ခုနှစ် ဧပြီလမှာ လွတ်လပ်ရေးကြေငြာတော့ ဆာဗီးယားရဲ့ ကြားဝင်ခလောက်ဆန်မှုကြောင့် လူမျိုးရေးအကြမ်းဖက်မှုတွေ နဲ့ စစ်ပွဲတွေဖြစ်ပွားခဲ့တဲ့အတွက် လူပေါင်းမြောက်များစွာ အသက်ဆုံးရှုံးခဲ့ရပြန်ပါတယ်။

(၅) မွန်တီနီဂရိုး – ယူဂိုဆလားဗီးယားပြည်ထောင်စုကနေ ခွဲထွက်လိုသူတွေ ရှိသလို၊ ဆာ့ဘ်တွေနဲ့ ပေါင်းလိုသူတွေလည်း ရှိကြပါတယ်။ ဒါကြောင့် တခြားနိုင်ငံတွေ ခွဲထွက်သွားစဉ်မှာတောင် သူတို့မခွဲထွက်ခဲ့ဘဲ ၂၀၀၁ ခုနှစ်မှာ `ဆာဗီးယား နှင့် မွန်တီနီဂရိုး´ ဆိုပြီး နိုင်ငံထောင်ခဲ့ပါသေးတယ်။ ဒါပေမဲ့လည်း တာရှည်မခံဘဲ ၂၀၀၆ ခုနှစ်မှာ နှစ်နိုင်ငံထပ်ကွဲသွားပါတယ်။

(၆) ဆာဘီးယား – ယူဂိုဆလားဗီးယားတစ်နိုင်ငံလုံးမှာ ဆာ့ဘ်လူမျိုးတွေ စုစုပေါင်း သန်း ၂၀ ကျော်လောက်ရှိပြီး အများစုက ဆာဘီးယားပြည်နယ်မှာ နေထိုင်ပါတယ်။ ကျန်ပြည်နယ်တွေမှာလည်း ပျံ့နှံ့နေကြတယ်။

(၇) ကိုဆိုဗိုဆို – အဓိကနေထိုင်သူများက အဲလ်ဘေးနီးယားလူမျိုး မွတ်ဆလင်တွေဖြစ်ပြီး လူဦးရေ တစ်သန်း လောက်ရှိတယ်။ သူတို့ဟာ ၁၉၇၄ ခုနှစ်ကနေ ၁၉၈၉ ခုနှစ်အထိ ယူဂိုဆလားဗီးယား ဖက်ဒရယ် ပြည်ထောင်စုရဲ့ ကိုယ်ပိုင် အုပ်ချုပ်ခွင့်ရဒေသအဖြစ် အေးအေးချမ်းချမ်း နေထိုင်လာရာကနေ ဆာဗီးယားသမ္မတဖြစ်လာတဲ့ မီလိုဆီဗစ်ရဲ့ သိမ်းပိုက် မှုကြောင့်ကတဆင့် သမိုင်းတွင်မဲ့ဖြစ်ရပ်ဆိုးတွေ ဖြစ်ပွားခဲ့ပါတယ်။

ယူဂိုဆလားဗီးယားပြည်ထောင်စုကြီးကို ခြုံကြည့်ရင် ဆာ့ဘ်လူမျိုးတွေကသာ လွမ်းမိုးထားခဲ့တယ်။ မြို့တော် ဘဲလ်ဂရိတ် က ဆာ့ဘ်တွေရဲ့ ဆာဗီးယားပြည်နယ်မှာရှိပြီး၊  အစိုးရထိပ်တန်းရာထူးတွေ၊ လျှို့ဝှက်ထောက်လှမ်းရေးအဖွဲ့၊ စစ်တပ် ခေါင်းဆောင်တွေအားလုံး ဆာ့ဘ်တွေပဲ ချုပ်ကိုင်ထားခဲ့တာပါ။ အုပ်ချုပ်ရေးမှာလည်း တခြားလူမျိုးတွေကို ပါဝင်ခွင့်မပေးဘဲ ဆာ့ဘ်တွေကပဲ ကြီးစိုးထားခဲ့တယ်။ ဒါပေမဲ့ စီးပွားရေးမှာတော့ ဆာ့ဘ်တွေ ထိပ်ဆုံးရောက်မလာဘူး။ ဆလိုဗေးနီးယားတို့ ခရိုအေးရှားတို့ဘက်မှာ စီးပွားရေးပိုကောင်းတာ တွေ့ရတယ်။ ဒါကြောင့် အဲဒီလို စီးပွားရေးဖွံ့ဖြိုးပြီး ချမ်းသာတဲ့ဒေသ တွေက ပြည်ထောင်စုကြီးထဲမှာ မနေထိုင်လိုကြဘူး။ သူတို့ပြည်နယ်က သယံဇာတတွေ ထည့်ဝင်နေရပေမဲ့ တိုင်းပြည် တိုးတက်ရေးအတွက် သုံးစွဲရာမှာ ဆာ့ဘ်တွေနေတဲ့ဒေသတွေမှာပဲ အသုံးပြုနေပြီး၊ သူတို့ပြည်နယ်ကို ဖွံ့ဖြိုးအောင် မလုပ်ပေးဘူးလို့ မြင်ကြတယ်။ ခရိုအက်တွေကလည်း တန်းတူအခွင့်အရေးမရလို့ မကျေနပ်ကြဘူး။ အခွင့်အရေး တန်းတူပေးပါလို့ တောင်းဆိုနေရတာကိုလည်း ဘ၀င်မကျဖြစ်နေတယ်။ သူတို့တွေလိုပဲ ဆာ့ဘ်လူမျိုးတွေဘက် ကြည့်ရင်လည်း သူတို့က အင်အားအကြီးဆုံးလို့ပြောနေပေမဲ့ စီးပွားရေးမှာ တခြားသူတွေထက် နောက်ကျကျန်နေ ခဲ့တာကို မကျေနပ်ကြဘူးဆိုတာ  တွေ့ရတယ်။

ဒီလို အမျိုးသားရေးခံစားချက်တွေ ဘယ်လောက်ပဲ ပြင်းထန်နေပါခဲ့စေ – ကွန်မြူနစ်စနစ်နဲ့ အုပ်ချုပ်နေတဲ့အချိန်မှာတော့ တည်ငြိမ်ရေးတို့၊ စည်းလုံးညီညွှတ်မှုတို့ကို ဦးစားပေးတဲ့အတွက် အဲဒီမကျေနပ်ချက်တွေဟာ အပြင်ကိုထွက်ပေါ်မလာဘူး။

မီလိုဆီဗစ် (သို့) ဖေါက်ပြန်ရေးသမား

(၁၉၈၉ – ၉၀)၀န်းကျင်လောက်မှာ ကမ္ဘာ့နိုင်ငံရေးဇါတ်ခုံပေါ်မှာ ကြီးမားတဲ့ အပြောင်းအလဲကြီးတွေဖြစ်လာပြီး ပိုလန်၊ ချက်ကိုဆလိုဗက်ကီးယား စတဲ့ ကွန်မြူနစ်စနစ်ကျင့်သုံးတဲ့နိုင်ငံတွေ တစ တစ ပြိုလဲသွားတာ နောက်ဆုံး ဆိုဗီယက် ပြည်ထောင်စုမှာ အဆုံးသတ်သွားတယ်။ ဒီလို ဗဟိုဥရောပနဲ့ အရှေ့ဥရောပမှာ ကွန်မြူနစ်ဝါဒပြိုလဲခြင်းတွေဟာ ယူဂိုဆလားဗီးယားကို  ရိုက်ခတ်လာတဲ့အတွက် သူတို့ဆီမှာလည်း ကွန်မြူနစ်အုပ်ချုပ်ရေးစနစ်ကို ဆက်လက်ကိုင်ဆွဲ ထားဖို့ မဖြစ်နိုင်တော့တဲ့အခြေအနေ ရောက်သွားတယ်။  ဒီတော့ သူတို့လည်း နိုင်ငံရေးစနစ် အပြောင်းအလဲတွေ လုပ်လာရတယ်။ အုပ်ချုပ်သူ အာဏာရှင်ဟောင်းတွေ ဖယ်ရှားခံရတယ် (သို့) နေရာဖယ်ပေးရတယ်။ သူတို့နေရာမှာ ခေါင်းဆောင်အသစ်တွေ တက်လာတယ်။

ဒီလို နိုင်ငံရေးစနစ် အပြောင်းအလဲကာလမှာ ခေါင်းဆောင် တစ်ယောက် ပေါ်လာတယ်။ သူ့နာမည်က `ဆလိုဗိုဒမ် မီလိုဆီဗစ်´ လို့ ခေါ်တယ်။ သူဟာ ခေတ်ဟောင်းမှာ တလျောက်လုံး ကွန်ုမြူနစ်ပါတီပေါ် သစ္စာခံနေရာကနေ နိုင်ငံရေး အပြောင်းအလဲ ဖြစ်သွားတဲ့ အချိန်မှာ ကွန်မြူနစ် ၀ါဒကိုစွန့်လွှတ်ပြီး အမျိုးသားရေး အရေခွံကို ပြောင်းခြုံလိုက်သူ ဖြစ်တယ်။ နိုင်ငံရေး သဘောတရားအရကြည့်ရင် ကွန်မြူနစ် ၀ါဒ နဲ့ အမျိုးသားရေး ၀ါဒက လုံးဝဆန့်ကျင်ဘက်ပဲ။ ဒါပေမဲ့ ဒီလူကတော့ ချက်ချင်းပဲ အပြောင်းအလဲမြန်ခဲ့တယ်။ ယခင်က `မီလိုဆီဗစ်´ ဟာ ထိပ်တန်းခေါင်းဆောင် မဟုတ်တဲ့အတွက် သူ့ကို ဘယ်သူကမှ သတိမထားမိခဲ့ပါဘူး။ သူက နိုင်ငံရေး ရည်မှန်းချက်ကြီးတဲ့ အတွက် သူရဲ့ပြိုင်ဘက် နိုင်ငံရေး ခေါင်းဆောင်တွေကို အပြတ်ရှင်းပြီး တဖြည်းဖြည်းနဲ့ ထိပ်ပိုင်း ခေါင်းဆောင်ရာထူးကို ရယူနိုင်ခဲ့တယ်။ ၁၉၈၉ ခုနှစ်မှာ ဆာဗီးယားသမ္မတ အဖြစ် ရွေးချယ်ခံရပြီး၊ ကွန်မြူနစ်ပါတီကို `ဆိုရှယ်လစ် အမျိုးသားရေးပါတီ´ဆိုတဲ့ အူကြောင်ကြောင် နာမည် ပြောင်းလဲလိုက်တယ်။

တဘက်မှာလည်း ကွန်မြူနစ်စနစ်ပြိုလဲသွားပြီဆိုတော့ ကွန်မြူနစ်ဝါဒကိုဗဟိုပြုပြီး တည်ထောင်ထားခဲ့တဲ့ ယူဂိုဆလား ဗီးယားပြည်ထောင်စု လည်း ပြိုကွဲတော့ မလိုဖြစ်လာတယ်။ ပြည်နယ်တွေက ခွဲထွက်မယ်လို့ အသံတွေထွက်လာတယ်။ ဆလိုဗေးနီးယားက ပြည်ထောင်စုကြီးမှာ မနေချင်တော့ဘူးလို့ စပြောလာတယ်။ ဒီအခါ မီလိုဆီဗစ်က စေ့စပ် ညှိနှိုင်းမယ်ပြောပြီး အချိန်ဆွဲလှည့်စားရင်း နှစ်နှစ်လောက်ကြာသွားတယ်။ ဒါပေမဲ့ ညှိနှိုင်းရာမှာ မအောင်မြင်တဲ့အတွက် (၁၉၉၁)ခုနှစ် ဇွန်လမှာ ခွဲထွက်သွားပါတယ်။ (၁၉၉၁)ခုနှစ် ဇွန်လမှာပဲ ခရိုအေးရှားကလည်း လွတ်လပ်ရေးကြေငြာတဲ့အခါ အဲဒီပြည်နယ်ထဲက ဆာ့ဘ်လူမျိုးအများစုနေတဲ့နေရာတွေကို ခွဲထွက်မခံဘဲ ဆာဗီးယားပိုင်တယ်၊ စောင့်ရှောက်ရမယ်ဆိုပြီး သိမ်းပိုက်ရာကနေ စစ်ပွဲတွေ စဖြစ်လာခဲ့တယ်။ ဒါပေမဲ့ ဆာဗီးယားစစ်တပ်ဆိုတာ ယခင်က ပြည်ထောင်စုတပ်မတော် အဖြစ် တပြည်လုံးမှာတပ်ဆွဲထားတဲ့ ယူဂိုဆလားဗီးယားစစ်တပ်ကြီးပဲ ဖြစ်တာကြောင့် ခုလို ခရိုအေးရှား၊ ဘော့စနီးယား နှစ်ပြည်နယ်နဲ့ စစ်ပွဲတွေဖြစ်လာတော့ ကိုယ့်တပ်တွေကို ခါးလယ်ကဖြတ်ခံထားသလို ဖြစ်နေတယ်။ ဒီတော့ မီလိုဆီဗစ်က တပ်တွေကို ပြန်စုစည်းနိုင်ဖို့အတွက် အကြံအစည်ကြီးကြီးနဲ့ ဆလိုဗေးနီးယားနယ်စပ်မှာ စစ်ပွဲတုတစ်ခု ဖန်တီး လိုက်တယ်။ ပြီးမှ အတုအယောင် ငြိမ်းချမ်းရေးလုပ်ပြပြီး တပ်တွေပြန်ရုတ်သိမ်းတဲ့ပုံမျိုးနဲ့ ကိုယ့်တပ်ဖွဲ့တွေကို ပြန်ခေါ် လိုက်တယ်။ တချိန်တည်းမှာပဲ အဲလ်ဘေးနီးယားလူမျိုးစုတွေနေတဲ့ ကိုဆိုဗိုဒေသမှာလည်း လူမျိုးရေးပဋိပက္ခတွေ ဖြစ်လာအောင် ဖန်တီးခဲ့တယ်။ မီလိုဆီဗစ်က စစ်ပွဲတွေတိုက်တဲ့အခါမှာလည်း သူလိုသလောက်ပဲတိုက်ပြီး ငြိမ်းချမ်းရေး လုပ်လေ့ရှိတယ်။ ဒီလို ငြိမ်းချမ်းရေးလုပ်ပြီးတဲ့အခါမှာ ကုလသမဂ္ဂတပ်ဖွဲ့တွေ ရောက်လာပြီး နယ်စပ်နားမှာတပ်စွဲတယ်။ အဲဒီနေရာမှာ ငြိမ်းချမ်းမှုရှိသွားတော့ သူ့တပ်ဖွဲ့တွေကို သူကြံစည်ထားတဲ့ နောက်တစ်နေရာကို ပြောင်းပြီး တိုက်ခိုက် ပြန်တယ်။ ဒီလို တနေရာပြီး တနေရာတိုက်လိုက်တာ (၄)နေရာမှာ စစ်ပွဲကြီးတွေဖြစ်ပွားခဲ့တယ်။ နောက်ဆုံးတော့ မီလိုဆီဗစ်ဖျက်ဆီးပစ်ခဲ့တဲ့ ယူဂိုဆလားဗီးယားပြည်ထောင်စုကြီးလည်း အစိတ်စိတ်အမွှာမွှာ ပြိုကွဲသွားတာ ခုဆိုရင် နိုင်ငံငယ်လေး တွေ (၇)နိုင်ငံ ဖြစ်လာခဲ့ပါပြီ။

မီလိုဆီဗစ် နိုင်ငံရေးအာဏာတည်ဆောက်ခဲ့ပုံ

ဒီတော့ အကြောင်းအရာကို ပြန်ကောက်ရင် ကွန်မြူနစ်စနစ်ပြိုလဲမှုနဲ့အတူ စင်ပေါ်ရောက်လာတဲ့ မီလိုဆီဗစ် ဆိုသူဟာ သူ့ရဲ့ အာဏာကို ဘယ်ပုံဘယ်နည်း တည်ဆောက်ခဲ့သလဲဆိုတာ ကျနော်တို့ ဆက်ပြီးလေ့လာကြည့်ပါမယ်။

ယခင်ကွန်မြူနစ်ခေတ်ဟောင်းမှာ အာဏာ၊ လုပ်ပိုင်ခွင့် နဲ့ ချမ်းသာကြွယ်ဝမှုတွေရှိတဲ့ အာဏာရှင်တွေနဲ့ အလိ(Elite) လို့ခေါ်တဲ့ လူ့မလိုင်လူတန်းစားတွေ ရှိခဲ့ကြတယ်။ ဒီလူတွေက တိုင်းပြည်ရဲ့ စီးပွားရေးတစ်ခုလုံး ချုပ်ကိုင်ထားတဲ့အပြင်၊ တခြားကဏ္ဍတိုင်းမှာလည်း အပေါ်စီးကနေချုပ်ကိုင်ထားတဲ့ အစိုးရဘက်တော်သား ပညာရှင်တွေ၊ အစိုးရအကြိုက် ပြောနေ လုပ်နေတဲ့ လူတွေချည်းပဲဖြစ်တယ်။ ဒါပေမဲ့ ခေတ်ပြောင်း စနစ်ပြောင်းချိန်မှာတော့ အတွေးအခေါ်ဟောင်းတွေလည်း အသုံးမ၀င်တော့ဘဲ အုပ်ချုပ်သူ အစိုးရသစ်ကို ရွေးကောက်ပွဲတွေနဲ့ ရွေးချယ်ဖို့လိုအပ် လာတယ်။ ဒီတော့ ခေတ်ဟောင်းက အာဏာရှင်ဟောင်းတွေနဲ့ ပက်သက်ခဲ့သူတွေဟာ ရွေးကောက်ပွဲမှာ ရှုံးနိမ့် သွားမှာကိုလည်း ကြောက်ရွံ့လာကြတယ်။ သူတို့အတွက် တခြားလုပ်စရာလည်း မရှိတော့ဘူး။

ကွန်မြူနစ်ခေါင်းဆောင်ချင်းတူပေမဲ့ ဆလိုဗေးနီးယားတို့၊ ခရိုအေးရှားတို့ရဲ့ ခေါင်းဆောင်တွေက သဘောထား အလယ်အလတ်ရှိတယ်လို့ ဆိုနိုင်တယ်။ သူတို့က အခြေအနေမှန်ကို သဘောပေါက်ပြီး လူထုက ပြုပြင်ပြောင်းလဲမှု တွေကို လိုလာပြီ၊ အာဏာရှင်တွေကို အလိုမရှိတော့ဘူးဆိုတာ သိလို့ ပြောင်းလဲမှုတွေ စလုပ်ခဲ့တယ်။ ဒီလို လုပ်ပြီးမှ  ရွေးကောက်ပွဲကို ၀င်ပြိုင်တဲ့အခါမှာ လူထုက ပြုပြင်ပြောင်းလဲရေးခေါင်းဆောင်တွေအဖြစ် သူတို့ကိုပဲ ဆက်လက် ထောက်ခံခဲ့တဲ့အတွက် နောက် ရွေးကောက်ပွဲတွေမှာလည်း ဆက်လက်အနိုင်ရရှိခဲ့တယ်။

မီလိုဆီဗစ်ကတော့ ဆလိုဗေးနီးယားတို့၊ ခရိုအေးရှားတို့မှာ လုပ်သလိုမျိုး မလုပ်ဘူး။ သူ့ရဲ့ လုပ်ဆောင်ပုံကတော့ သူ့ရဲ့ ပြိုင်ဘက်နိုင်ငံရေး သမားတွေကို ပြန်ပေးဆွဲပြီး လက်စဖျောက်ပစ်တာပဲ ဖြစ်တယ်။ (အဲဒီတုန်းက အကြောင်းရင်း မှန်တွေကို ဘယ်သူကမှမသိခဲ့ကြဘူး။ နောက်ပိုင်း လူမျိုးသုဉ်းသတ်ဖြတ်မှုတွေကြောင့် ရုံးတင်စစ်ဆေးတဲ့အခါကျမှ အမှုမှန်တွေ ပေါ်လာပြီး မီလိုဆီဗစ်ရဲ့ လက်ချက်တွေပဲဆိုတာ လူတွေသိလာခဲ့ကြတာ။) အဲဒီလို ကွန်မြူနစ်ပါတီတွင်းမှာပဲ ဖြုတ်ထုတ် သတ်ပုံစံမျိုး လုပ်ခဲ့တဲ့အတွက် တိုင်းပြည်မှာ ခေါင်းဆောင်ဆိုလို့ မီလိုဆီဗစ်တစ်ယောက်ပဲ လောက်လောက် လားလား ရှိတော့တဲ့ အခြေအနေဖြစ်သွားတယ်။ ကျန်တဲ့ အတိုက်အခံတွေဆိုတာလည်း အားမကောင်းကြဘူး။ မီလိုဆီဗစ်က အာဏာရဲ့အရသာကို သိသွားတဲ့အတွက် ရွေးကောက်ပွဲတွေမှာ ရှုံးနိမ့်မှာ ကြောက်လာတယ်။ ဒါကြောင့် အာဏာကို ဆက်လက်ထိန်းချုပ်ထားနိုင်ဖို့ ကြံစည်တော့တယ်။

ကွန်မြူနစ်ဝါဒဆိုတာကတော့ အငွေ့ပျံပျောက်ကွယ်သွားပေမယ့် စနစ်တကျ ဖွဲ့စည်းတည်ဆောက်ထားခဲ့တဲ့ သူတို့ရဲ့ ယန္တရားကတော့ တည်ရှိနေဆဲပါ။ စီးပွားရေး၊ မီဒီယာ၊ စစ်တပ်၊ ရဲ၊ ထောက်လှမ်းရေး စတဲ့ ကဏ္ဍများအပေါ်မှာလည်း ချုပ်ကိုင်ထားဆဲဖြစ်တယ်။ အတိုက်အခံတွေအပေါ် ဆယ်စုနှစ်များစွာ ဖိနှိပ်ခဲ့ကြတဲ့ လယ်ယာနဲ့ စိုက်ပျိုးရေးစီမံသူတွေ၊ ဘဏ်အုပ်ချုပ်သူတွေ၊ စက်ရုံမှူးတွေ၊ ကုန်သွယ်ရေးအကြီးအကဲတွေ၊ ပြည်တွင်းရေဒီယိုနဲ့ ရုပ်မြင်သံကြားကို ထိန်းချုပ် ညွန်ကြားသူတွေ၊ စစ်ဗိုလ်ချုပ်တွေ၊ ရဲချုပ်တွေ၊ ထောက်လှမ်းရေးအေးဂျင့်တွေ၊ ကွန်မြုနစ်ပါတီကေဒါတွေက မိမိတို့ အပေါ်ကျရောက်လာမယ့် အပြောင်းအလဲတွေကို သေလုမတတ် ကြောက်ရွံ့နေကြတယ်။ မီလိုဆီဗစ်ကလည်း သူတို့တတွေ ဆက်လက်ရှင်သန်ဖို့၊ သြဇာအာဏာ တည်မြဲနေဖို့ လမ်းကြောင်းတစ်စ ဖော်ထားပေးခဲ့တယ်။ အဲ့ဒီလူတွေ အားလုံးကလည်း သူဖေါ်ပေးတဲ့လမ်းကြောင်း အတိုင်း ကောက်ကောက်ပါအောင် လိုက်ခဲ့ကြတယ်။

စဉ်းလဲသောနည်းဖြင့် ပြည်သူလူထုဆီက Legitimacy ရယူခဲ့ပုံ အဆင့်ဆင့်

ခုတော့ မီလိုဆီဗစ် ရွေးကောက်ပွဲဝင်ရတော့မယ်။ မီလိုဆီဗစ်အနေနဲ့ ရွေးကောက်ပွဲဝင်တဲ့အခါ အဆင့်သင့်မဖြစ်တဲ့ အချက်တချက်က အိုင်ဒီယိုလော်ဂျီ မရှိတော့တာပဲ ဖြစ်တယ်။ ဒါပေမဲ့ စစ်တပ်တွေ၊ ရဲတွေ၊ လျှို့ဝှက်ထောက်လှမ်းရေးတွေ၊ ဒေသအာဏာပိုင်တွေ၊ မီဒီယာတွေ စတဲ့ ကဏ္ဍပေါင်းစုံမှာ `မီလိုဆီဗစ်´ကပဲ ယခင်အတိုင်းထိန်းချုပ်ထားဆဲ ဖြစ်တယ်။ သူ လိုချင်တဲ့အတိုင်း လုပ်နိုင်တဲ့ apparatus တွေအဖြစ် ရှိဆဲပဲ။ အထူး အခွင့်အရေးတွေလည်း သူနဲ့ အပေါင်းအပါတွေပဲ ဆက်လက်ယူထားဆဲပဲ။ နောက်ပြီး ကွန်မြူနစ်ပါတီက ချမ်းသာကြွယ်ဝမှုအရှိဆုံး အင်အားအတောင့်တင်းဆုံးပါတီ ဖြစ်နေဆဲပဲ။ ဒါပေမဲ့ Ideology မရှိတော့ဘူး။ ယခင်ကတော့ ကွန်မြူနစ်ဝါဒကို အသုံးချပြီး တိုင်းပြည်ကို အုပ်ချုပ်ခဲ့တဲ့ အတွက် အုပ်ချုပ်တာ နည်းလမ်းကျတယ်၊ Legitimacy ရှိတယ်။ ခုတော့ Social contract လို့ခေါ်တဲ့ အစိုးရ နဲ့ ပြည်သူ ကြားမှာထားတဲ့ သဘောတူညီမှု

– တနည်းအားဖြင့် သူဟာ တိုင်းပြည်ကိုအုပ်ချုပ်ဖို့ ထိုက်တန်ပါတယ်ဆိုတဲ့ အကြောင်းပြ ချက် မရှိတော့ဘူး။ ဗန်းပြစရာဝါဒလည်း မရှိတော့ဘူး။ ဒီလို နိုင်ငံရေး`အိုင်ဒီယိုလော်ဂျီ´မရှိတော့တဲ့အတွက် သူ တိုင်းပြည်ကိုအုပ်ချုပ်နေတာ သင့်တော်တယ်၊ မှန်ကန်တယ်လို့ အကြောင်းပြချက်ပေးဖို့ လိုအပ်လာပြီ။

လူထုကလည်း ကွန်မြူနစ်တွေကို သဘောမကျတော့ဘူး။ ကွန်မြူနစ်တွေ တိုင်းပြည်ကိုအုပ်ချုပ်ခဲ့တဲ့ နှစ်ပေါင်းသုံးဆယ် လောက်အတွင်းမှာ အဘက်ဘက်က ချွတ်ခြုံကျသွားတာကြောင့် အယူအဆအသစ်၊ စနစ်အသစ်၊ လူအသစ်ကို မျှော်လင့် နေကြတယ်။ ယခင် အစိုးရဟောင်းတုန်းက အစိုးရရာထူး အပြောင်းအလဲတွေက သူတို့အချင်းချင်းကြားမှာပဲ ပြောင်းလဲ ခဲ့တာဖြစ်ပြီး လူထုက ၀င်စွက်ဖက်ဖို့နေနေသာသာ ဘာမှတောင်မသိခဲ့ရဘူး။ အခု စနစ်ပြောင်းပြီဆိုတော့ လူထု အဆုံးအဖြတ်ကို ခံကြရတော့မယ်။ ရွေးကောက်ပွဲဝင်ရတော့မယ်။ ဒီတော့ လူထုကိုချပြဖို့ social contract တစ်ရပ် လိုလာပြီ။ သူ တိုင်းပြည်ကို ဘာကြောင့် အုပ်ချုပ်သင့်သလဲ၊ သူသာ အုပ်ချုပ်ဖို့သင့်လျှော်ကြောင်း အကြောင်းပြဖို့ လိုအပ်လာပြီ။ ပြည်သူတွေကို မဲဆွယ်နိုင်ဖို့ ပုံရိပ်ကောင်းတွေ၊ အမြင်ကောင်းတွေ တစ်စုံတစ်ရာမှ မရှိတော့ဘူး။ ဒီတော့ သူတို့အတွက် အလွယ်ကူဆုံး နဲ့ အထိရောက်ဆုံး အသက်ဆက်ပေးနိုင်မယ့် ဆေးစွမ်းကြီးကတော့ `အစွန်းရောက် အမျိုးသားရေးဝါဒ´ပဲ ဖြစ်ပါတော့တယ်။

အဆင့်(၁)

မီလိုဆီဗစ်က ရွေးကောက်ပွဲဝင်ဖို့ ဗန်းပြစရာ ၀ါဒတစ်ရပ်မရှိတဲ့အတွက် ပထမဆုံးသူစလှမ်းတဲ့ ခြေလှမ်းအနေနဲ့ တိုင်းပြည်အတွင်းမှာရှိတဲ့ မီဒီယာနဲ့လူ့ဝန်းကျင်အတွင်း လွမ်းမိုးကြီးစိုးထားဆဲဖြစ်တဲ့ အစွန်းရောက်အမျိုးသားရေးဝါဒီ ဘာသာရေးခေါင်းဆောင်တွေ၊ ဆယ်စုနှစ်များစွာ လက်သပ်မွေးခြင်းခံထားရတဲ့ ပညာရှင်တွေ၊ စာရေးဆရာတွေကို လွတ်လပ်စွာပြောဆိုခွင့်၊ ရေးသားခွင့်၊ ပုံနှိပ်ထုတ်ဝေခွင့်၊ မီဒီယာတွေမှာ အသံလွင့်ခွင့် ပြုပေးလိုက်တယ်။ အဲဒီ ဘာသာရေး ခေါင်းဆောင်တွေဆိုတာ ယခင် ကွန်မြူနစ်အစိုးရလက်ထက်တုန်းက ထောင်ကျရင် ကျ၊ မကျရင် ထွက်ပြေးနေရသူတွေ ဖြစ်တယ်။ သူ့ရဲ့ အဓိကအကြံအစည်ကတော့ သူ့နောက်မှာ လူတွေကို စုစည်းနိုင်ဖို့အတွက် အကြောက်တရားနဲ့ အာဃာတတရား ဖုံးလွမ်းနေတဲ့ဝန်းကျင်တစ်ခုကို ဖန်တီးနိုင်ဖို့ပဲဖြစ်ပါတယ်။ ခုကျတော့ မီလိုဆီဗစ်က `လွတ်လပ်စွာ ပြောဆိုခွင့်´ဆိုတဲ့ အချက်ကိုအသုံးချပြီး ဒီလိုလူတွေကို ဇက်ကြိုးလွှတ်ပေးလိုက်ကြတဲ့အခါ ကံမကောင်း အကြောင်းမလှ စွာပဲ စတင်ထုတ်ဖေါ်ပြောဆိုလာတာတွေက မုန်းတီးရေးစကားတွေ ဖြစ်နေတယ်။ ဘာကြောင့်လဲဆိုတော့ ဒီလူတွေက နှစ်ပေါင်းများစွာ အာဏာရင်စနစ်ဆိုးရဲ့ စနစ်တကျ Brainwash လုပ်ခြင်းခံထားရတဲ့ တဘက်ပိတ် radical တွေ ဖြစ်နေတာကိုး။ ဒီတော့ သူတို့ စပြောတာက Us & Them (ငါတို့ နဲ့ သူတို့) ဆိုတာပဲဖြစ်တယ်။ ရန် ငါ စည်းခြားတဲ့ စကားတွေ ဗြောင်ကျကျ ပြောလာတယ်။ နောက်ပြီး သေချာရေရာမှုမရှိတဲ့ သမိုင်းကြောင်းတွေ ထုတ်ပြောလာတယ်။ ဟိုတုန်းကဆိုရင် ဒီလူတွေ မရှိဘူး၊ ဟိုလူတွေမရောက်သေးဘူး ဆိုတာမျိုးတွေ ထုတ်ပြောလာတယ်။ ငါတို့ခံရတဲ့ မတရားမှုတွေဟာ အဲဒီလူမျိုးခြား တွေကြောင့်ဆိုတဲ့ စကားမျိုးတွေကိုသာ တရစပ် ပြောဆိုလာ ကြတယ်။

ခေတ်ဟောင်းတုန်းကဆို တိုးတိုးတိတ်တိတ် ခိုးကြောင်ခိုးဝှက် ရေးသားပြောဆိုနေခဲ့ရတဲ့အတွက် သူတို့ ပြောတာ၊ ရေးတာကို သိခွင့်ရတဲ့လူက ရာဂဏန်းလောက်ပဲ ရှိလိမ့်မယ်။ ဒါပေမဲ့ ခုချိန်မှာတော့ သူတို့က နိုင်ငံအနှံ့တရားပွဲတွေ လုပ်ပြီး အမုန်းတရားတွေကို ဗြောင်ကျကျ မှိုင်းတိုက်လာတဲ့အခါ တစ်ချိန်က ဖိနှိပ်ညှင်းဆဲခံထားရတဲ့ ပြည်သူများက မထင်မှတ်ဘဲ အာရုံပြောင်း သိမ်းသွင်းခံကြရတော့တယ်။ သူတို့ရဲ့ အမျိုးသားရေးနဲ့ ဘာသာရေးဆိုင်ရာ ယုံကြည်ချက် တွေဟာ မီဒီယာတွေ၊ ရုပ်မြင်သံကြားတွေမှာ ရုတ်တရက် ပေါ်ပေါက်လာကြတယ်။ လူထုတရားပွဲတွေ လုပ်စေတယ်။ အငြင်းပွားစရာဖြစ်မယ့် အကြောင်းတွေ၊ စာတွေကို ပုံနှိပ်မီဒီယာကနေတစ်ဆင့် ရေးသားဖော်ပြစေတယ်။ လက်ကမ်း စာစောင်တွေ၊ စာအုပ်တွေ ရေးသားဖြန့်ချိလာနိုင်တယ်။ တခါတလေကျရင် သူတို့ကိုယ်တိုင်က ဖြန့်ချိတာမျိုး မဟုတ်ဘဲ ကြားက ဘယ်သူမှန်းမသိသူ တယောက် ယောက်က စာရွက်တွေ သောင်းနဲ့သိန်းနဲ့ ချီပွားပြီး ဖြန့်ချိ ပေးတာမျိုးတွေ လုပ်လာတယ်။ အကျိုးဆက် အနေနဲ့ လူ့အဖွဲ့အစည်းထဲမှာ ဒီလို စာတွေ၊ အသံတွေကြောင့် လူထုက စိတ်ရှုပ်ထွေးမှုတွေ ဖြစ်လာတယ်။ သူတို့ ပြောတာ မှန်များ မှန်နေ သလား၊ ငါတို့က ခံရတဲ့သူတွေများ ဖြစ်နေ ပြီလား၊ ငါတို့ အန္တရာယ်တွေများ ကျရောက် တော့မှာလား ဆိုတဲ့ မရေရာမသေချာမှုတွေ၊ ဒွိဟတွေ စတင် ပေါက်ပွားလာတယ်။ ဒီလိုနဲ့ `မီလိုဆီဗစ်´ ဖြစ်စေချင်တဲ့ ၀န်းကျင် တစ်ခုက လူ့ဘောင် အဖွဲ့အစည်းထဲမှာ တဖြေးဖြေး ရုပ်လုံး ပေါ်လာ ပါတော့တယ်။

မီလိုဆီဗစ်လုပ်ခဲ့တဲ့ ပထမအဆင့်ကို မြင်သာအောင်ပမာပေးရရင် ခွေးလေးတွေကို မွေးထားပြီး ဟောင်ခိုင်းထားတာမျိုးပါ။ လူ့အဖွဲ့အစည်းထဲမှာ ခွေးဟောင်သံတွေ စတင်ပြီး ကြားလာရတယ်။ အဲဒီလို ခွေးတွေက တရစပ် ဟောင်နေတဲ့အတွက် အေးအေးချမ်းချမ်း နေ နေတဲ့ လူတွေရဲ့စိတ်ထဲမှာ သံသယတွေစပြီး ပေါ်လာတယ်။ စိုးရိမ်စိတ်တွေ ၀င်လာတယ်။ ဘာကြောင့် ခွေးတွေ ဒီလောက်ဟောင်နေတာလဲဆိုတဲ့ အတွေးနဲ့ မလုံခြုံမှုတွေ၊ စိတ်ရှုပ်ထွေးစရာတွေ ခံစားလာရတယ်။ ဒါပေမဲ့ မီလိုဆီဗစ်အနေနဲ့ အဲဒီအချိန်မှာ ရွေးကောက်ပွဲဝင်ရင်လည်း  ရှုံးမှာ သေချာနေသေးတယ်။ လူထုက တဘက်မှာ စိတ်ရှုပ်ထွေးလာပေမဲ့ တဘက်မှာလည်း သူတို့ကို နှစ်ပေါင်းများစွာ ဖိနှိပ်အုပ်ချုပ်ခဲ့တဲ့ အာဏာရှင်တွေရဲ့ လုပ်ရပ်ဆိုးတွေကို လတ်လတ်ဆတ်ဆတ် မှတ်မှိနေဆဲဖြစ်တာမို့ မဲပေးမှာတော့မဟုတ်ဘူး။ ဒါကြောင့် မီလိုဆီဗစ် အနေနဲ့ ရွေးကောက်ပွဲ အောင်နိုင်ရေး အတွက် နောက်ထပ် လုပ်ဆောင်ရမဲ့ ခြေလှမ်းတွေ အများကြီး ရှိပါသေးတယ်။

အဆင့်(၂)

ဒုတိယခြေလှမ်းကတော့ သဘောထားတင်းမာတဲ့၊ အစွန်းရောက်ဝါဒရေးရာ ကိုင်ဆွဲထားတဲ့ နိုင်ငံရေးပါတီတွေ ပေါ်လာတယ်။ အဲဒီပါတီတွေကလည်း တင်းမာတဲ့၊ အစွန်းရောက်တဲ့ ၀ါဒရေးရာတွေကို ပြောင်ပြောင်တင်းတင်း ဟောပြောစည်းရုံးကြတယ်။ သွေးထိုး လှုံ့ဆော်ကြတယ်။ သူတို့ အများဆုံးပြောတဲ့ အကြောင်းအရာ ကတော့ ငါတို့ လူမျိုး၊ ငါတို့သာသနာ ခြိမ်းခြောက်ခံနေရပြီ။ အင်မတန်ကြောက်စရာကောင်းတဲ့ ရန်သူတွေက ပြည်တွင်းမှာသာမက ပြည်ပမှာလည်း ရှိနေကြပြီ။ အချိန်မီကာကွယ်ကြမှ ဖြစ်မယ်။ စုစည်းညီညွှတ်မှ ဖြစ်မယ်လို့ ပြောဆိုစည်းရုံးလာတယ်။ အဲဒီတုန်းက လူတွေမသိခဲ့တဲ့ အချက်တွေရှိပါတယ်။ နောက်ပိုင်း ခေတ်တွေပြောင်းသွားတော့မှ ထောက်လှမ်းရေး ဖိုင်တွေကို ပြန်လှန် စစ်ဆေးကြည့်တဲ့အခါ သိလာရတဲ့ အချက်တွေအရ အဲဒီတုန်းကထောင်ခဲ့တဲ့ ပါတီလေးတွေရဲ့ တ၀က်လောက်ဟာ မီလိုဆီဗစ်ရဲ့ ထောက်လှမ်းရေးဟောင်းတွေ အဓိကဦးဆောင်ဖွဲ့စည်းထားတဲ့ `ပါတီအတု´တွေသာ ဖြစ်နေတယ် ဆိုတာပါပဲ။

အဆင့်(၃)

တတိယခြေလှမ်းကတော့ မောင်းဖြုတ်တဲ့အဆင့်လို့ ပြောလို့ရတယ်။ ဘယ်လို မောင်းဖြုတ်လိုက်တာလဲဆိုတော့ တကယ့်ကို ဆိုးဆိုးဝါးဝါးအဖြစ်အပျက် တစ်ခု ဖြစ်ပေါ်လာတာမျိုးပေါ့။ ဘော့စနီးယားမှာ ဆာ့ဘ်လူမျိုး နွားကျောင်းသား လေးတစ်ယောက်ကို အယ်လ်ဘေးနီးယား မွတ်ဆလင်တွေက မုဒိန်းကျင့်တယ်ဆိုတဲ့ သတင်းတစ်ခု ထွက်ပေါ်လာတာပါ။ အဲဒီဖြစ်ရပ်ဟာ တကယ်ဖြစ်ခဲ့သလား၊ မဖြစ်ခဲ့ဘူးလားဆိုတာ ယနေ့ထိ အသေအချာမပြောနိုင်ပေမဲ့ နောက်ပိုင်း လေ့လာစုံစမ်းမှုတွေအရ ဒါဟာ တကယ်မဖြစ်ခဲ့ဘဲ ထောက်လှမ်းရေးတွေရဲ့ လှုံ့ဆော်မှုသက်သက်ပဲလို့ အခိုင်အမာ ကောက်ချက်ချထားပါတယ်။ ဒါပေမဲ့ အဲဒီတုန်းကတော့ ဘယ်သူကမှ ဒီသတင်း မှန်၊ မမှန် မဆန်းစစ်ကြဘဲ ဆာ့ဘ်လူမျိုး မီဒီယာသမားတွေ၊ ကာတွန်းဆရာတွေ၊ စာရေးဆရာတွေ၊ တတ်သိပညာရှင်တွေအားလုံးက အဲဒီသတင်းကို အဆပေါင်းများစွာ ပျံ့နှံ့သွားအောင် ဖွပစ်ခဲ့ကြတယ်။ ဒီတော့ အစထဲက စိတ်ရှုပ်ထွေးပြီး သံသယစိတ်တွေဖြစ်နေတဲ့ လူထုက ဒေါသထွက်တဲ့အဆင့်ကို ရောက်သွားပါတော့တယ်။ ဒီဖြစ်ရပ်တစ်ခုတည်းနဲ့တင် မပြီးပါသေးဘူး။ (၇)လလောက် အတွင်းမှာ အလားတူဖြစ်ရပ်တွေ အများကြီး သတင်းမီဒီယာတွေပေါ် တက်လာခဲ့တယ်။ တချိန်တည်းမှာပဲ ဆာဗီးယား အမျိုးသားရေးဝါဒီတွေဆိုသူတွေ နဲ့ မျိုးချစ်မီဒီယာတွေမှာတော့ အယ်လ်ဘေးနီးယန်းလူမျိုးတွေဟာ ဆာ့ဘ်တွေကို အန္တရာယ်ပေးနေတဲ့ အကြွင်းမဲ့ဒုစရိုက်သားတွေအဖြစ် ရုပ်လုံးဖော်ခဲ့ကြတယ်။ ဒါဟာ Mass Propaganda ဆိုတဲ့ ပြည်သူလူထုတစ်ရပ်လုံးကို ၀ါဒမှိုင်းတိုက်တဲ့ အဆင့်ထိရောက်သွားတာပါ။ ဒီတော့ `သူတို့ နဲ့ ငါတို့´ဆိုတဲ့ ရန်ငါ စည်းခြားတဲ့ ကိစ္စဟာ ပိုမိုထင်ရှားလာပြီး သဘောထားကွဲလွဲမှုတွေ ပိုမိုနက်ရှိုင်းသွားပါတယ်။

အဆင့်(၄)

နောက်ဆုံးခြေလှမ်းကတော့ စစ်ပွဲ၊ ဒါမှမဟုတ် အင်အားသုံးပြီး လူအစုလိုက်အပြုံလိုက် အကြမ်းဖက်သတ်ဖြတ်မှုတွေ လုပ်ဆောင်တာပါပဲ။ လူမျိုးဖြုတ်သုတ်သင်မှုဆိုတာ ရုတ်ချည်းထပေါက်ကွဲတတ်တဲ့ လူရမ်းကားတစ်စု ဒါမှမဟုတ် အချင်းချင်းမုန်းတီးနေတဲ့ အခြေခံလူတန်းစားတွေက ဘယ်တော့မှ မလုပ်တတ်ကြပါဘူး။ ဒါတွေဟာ အကြံစည်ရှိရှိ ပိပိရိရိ တွက်ချက်ပြင်ဆင်စီစဉ်ပြီးမှ လုပ်ဆောင်တဲ့ စစ်ဆင်ရေးတစ်မျိုးပါ။ အဲဒီလိုလုပ်ဆောင်ဖို့အတွက် အစထဲက ကြိုတင် ဖွဲ့စည်းထားခဲ့တယ်လို့ ယုံကြည်ရတဲ့ တရားမ၀င် လက်နက်ကိုင်အကြမ်းဖက်အဖွဲ့တွေကို အသုံးချခဲ့ပါတယ်။ အဲဒီအဖွဲ့မှာ ဒေသခံ အလုပ်လက်မဲ့လူငယ်တွေ၊ ရပ်ကွက်မှာ ဝေးလားဝါးလား နေ နေကြတဲ့ လူငယ်တွေ၊ ထောက်ကထွက်လာပြီး လုပ်စရာကိုင်စရာမရှိလို့ ပြန်လည် ခိုးဆိုးလုယက်နေတဲ့ လူမိုက်ဟောင်းတွေ စသဖြင့် လူ့အဖွဲ့အစည်းက ဖယ်ကျဉ် ထားတဲ့ လူဆိုးလူမိုက်တွေ ပါဝင်နေပြီး ထောက်လှမ်းရေး အေးဂျင့်ဟောင်းတွေက ဦးစီးကွပ်ကဲ သင်ကြားပေးနေတာပဲ ဖြစ်ပါတယ်။ သူတို့ကို သေချာလေ့လာကြည့်ရင် စနစ်တကျစုဖွဲ့ထားတာဖြစ်ပြီး၊ လိုအပ်တဲ့ လက်နက်၊ ငွေကြေး စတဲ့ အထောက်အကူပစ္စည်းတွေ အလုံအလောက် ရနေတာတွေ့ရမယ်။ နိုင်ငံတော် အဆင့်တွေကနေ နည်းဗျူဟာကျကျ ပါဝင်ပတ်သက်မှုမရှိဘဲ ဒီလောက်ကြီးကျယ်တဲ့ အကြမ်းဖက်မှုကြီးတွေ ဖြစ်ပွားလာစရာအကြောင်း မရှိပါဘူး။ အစွန်းရောက် အမျိုးသားရေးဝါဒီ ပညာရှင်တွေ နဲ့ ဘာသာရေးခေါင်းဆောင်တွေ၊ မျက်ကန်းမျိုးချစ်မီဒီယာတွေလည်း ဒီလို လူမဆန်တဲ့ ရက်စက်ကြမ်းကြုတ်မှုကြီးတွေမှာ အလိုတူအလိုပါတွေ ဖြစ်ကြပါတယ်။

လူထုကလည်း အရင်တုန်းက အတူတကွ ရောယှက်နေထိုင်ခဲ့တာမှန်ပေမဲ့ နောက်ပိုင်းမှာ ၀ါဒမှိုင်းတိုက်မှုတွေကြောင့်  သံသယတွေကြီးထွားလာပြီး သူ့ဒေသ ကိုယ့်ဒေသ သက်သက်စီ ဖြစ်သွားကြပြီဖြစ်တယ်။ ဒီအခြေအနေမျိုးက အကြမ်းဖက်သမားတွေ လှုပ်ရှားရတာ ပိုပြီးလွယ်ကူစေပါတယ်။ လက်နက်ကိုင် အကြမ်းဖက်အဖွဲ့တစ်ဖွဲ့က မွတ်ဆလင် ကျေးရွာတစ်ရွာကို ၀င်ရောက်မီးရှို့ဖျက်ဆီးကာ တွေ့ရာလူတွေကို သတ်ဖြတ်ပြီး ထွက်ပြေးကြတယ်။ အဲဒီရွာမှာ မီးလောင်ပြီး အုတ်အော်သောင်းနင်းဖြစ်နေတုန်းမှာ ဒေသခံ လက်နက်ကိုင်ရဲနဲ့ ပြည်သူ့စစ်တွေ ရောက်လာပြီးတော့ အခြေအနေကို ၀ိုင်းထိန်းသိမ်းပေးနေတယ်လို့ သတင်းလွင့်ကာ ခုနကျူးလွန်သွားတဲ့ လက်စလက်နတွေကို သဲလွန်စ မကျန်အောင် ဖျောက်ဖျက်ပစ်ကြတယ်။ အဲဒီလို တရားမ၀င်အဖွဲ့တွေက ကျူးလွန်ပြီး တရားဝင်အဖွဲ့တွေက လက်စလက်န ဖျောက်ဖျက်တာတွေ လုပ်ဆောင်ခဲ့တယ်။

စစ်တပ်ကိုယ်တိုင်ကတော့ လူမသတ်ဘူး၊ မီးမရှို့ဘူး၊ ကြားနေတယ်လို့ ရုပ်လုံးပေါ်အောင် နေပြတယ်။ တကယ်လုပ်တာက Paramilitary လို့ခေါ်တဲ့ တရားမ၀င်လက်နက်ကိုင် အကြမ်းဖက်အဖွဲ့တွေ..။ တခါတလေမှာတော့ ဒေသခံ အာဏာပိုင်တွေလည်း ပါဝင်ပက်သက် နေတယ်ပေါ့လေ။ ဒီနေရာမှာ စစ်တပ်ရဲ့ အခန်း ကဏ္ဍက `အခြေအနေတွေကို တည်ငြိမ်အောင် ထိန်းသိမ်းနေတယ်၊ တစ်မြို့မှာ ဖြစ်နေတဲ့ပြဿနာကို အခြားမြို့တွေ ကူးစက်မသွားအောင် ထိန်းသိမ်း ပေးနေတယ်´ဆိုတဲ့ ပုံစံမျိုးပေါ်အောင် သရုပ်ဆောင် ထားတယ်။ စစ်တပ်က ဒီလို သရုပ်ဖေါ်ထားတယ် ဆိုပေမဲ့ အကြမ်းဖက်မှုဖြစ်ပြီး ပထမ ၂/၃ ရက် လောက်ထိ အဲဒီဒေသကို သူတို့လူတွေ  ၀င်၊ထွက်ပြီး လုပ်စရာရှိတာတွေ အပြီးလုပ်လို့ရအောင် ဖွင့်ပေး ထားတယ်ဆိုတာ တွေ့ရတယ်။ ဒီတော့ ပထမ တစ်ရက် နှစ်ရက်မှာ လမ်းတွေဖွင့်ပေးထားပြီး အကြမ်းဖက်မှုတွေ ဖြစ်လာတယ်။ ဒါတွေအားလုံး ပြီးပြီဆိုတဲ့အခါ လမ်းတွေ၊ တံတားတွေ၊ မြို့အ၀င်အထွက် ဂိတ်တွေအားလုံးကို ပိတ်ပစ်လိုက်တယ်။ တကယ့်ရည်ရွယ်ချက်ကတော့ အဲဒီလိုဖြစ်နေတဲ့ ဒေသကို လာရောက်သတင်းယူမဲ့ သတင်းထောက်တွေ၊ အမှုမှန်ဖေါ်ထုတ်ဖို့ ကြိုးစားမဲ့လူတွေ မ၀င်ရောက်နိုင်အောင် ပိတ်ဆို့ထားလိုက်ခြင်းပဲ ဖြစ်ပါတယ်။ အပြင်ကို သတင်းထုတ်ပြန်ရာမှာတော့ အခြေအနေတွေအားလုံးကို ထိန်းသိမ်း လိုက်နိုင်ပြီ။ လူတချို့လည်း ကိုယ့်မြို့ကိုယ့်ရွာကို ပြန်လာနေကြပြီ။ ဘာမှမဖြစ်တော့ဘူး၊ ဘယ်သူမှ လာကြည့်ဖို့ မလိုအပ်ပါဘူးလို့ ပြောကြတယ်။ အစိုးရဘက်ကလည်း မိမိတို့မှာ တာဝန်မရှိကြောင်း၊ မိမိတို့အနေနှင့် အခြေအနေကို ထိန်းသိမ်းပေးရန်သာ တတ်စွမ်းနိုင်ကြောင်း နိုင်ငံတကာအသိုင်းအ၀ိုင်းနဲ့ ပြည်တွင်းပရိတ်သတ်ကို အခါခပ်သိမ်း သတင်းထုတ်ပြန်လေ့ရှိခဲ့တယ်။ သူတို့အဆိုအရ အကြမ်းဖက်ခံရသူတွေက မိမိကိုယ်ကို ခုခံကာကွယ်တဲ့ အတွက် တိုက်ခိုက်မှုတွေက ပိုမိုအရှိန်မြှင့်တက် လာရတယ်တဲ့လေ။ ဒီလိုနဲ့ပဲ ကိုဆိုဗိုနဲ့ ဘော့စ်နီးယားမှာ လူအစုလိုက် အပြုံလိုက် သတ်ဖြတ်မှုကြီးတွေ ဖြစ်ပွားခဲ့တယ်။

ဒီထက်ပိုပြီး အတွင်းကျကျ လေ့လာကြည့်တဲ့အခါ မီလိုဆီဗစ်ရဲ့ လျို့ဝှက်ထောက်လှမ်းရေးတွေက အဲဒီလို အကြမ်းဖက်အဖွဲ့တွေကို နိုင်ငံအနှံ့မှာ ဖွဲ့စည်းထားပြီးဖြစ်ကြောင်း တွေ့ရတယ်။ သူတို့က ပထမအဆင့်မှာ တခြား မတူညီတဲ့လူမျိုးစုတွေရဲ့ ကျေးရွာတွေကို မီးရှို့သတ်ဖြတ် တာတွေ လုပ်ခဲ့တယ်။ ဒါပေမဲ့ နောက်တစ်နှစ် နှစ်နှစ်အတွင်း ရွေးကောက်ပွဲတွေ နီးလာတဲ့အခါမှာတော့ သူတို့ကို ကွပ်ကဲ နေသူတွေရဲ့ အမိန့်အတိုင်း ပြိုင်ဘက်နိုင်ငံရေးသမားတွေကို သတ်ဖြတ်တာတွေ၊ ဖမ်းဆီးနှိပ်စက်တာ၊ ရန်စတာတွေ လုပ်ဆောင်ဖို့အတွက်လည်း အဲဒီအဖွဲ့တွေက အဆင်သင့် ရှိနေကြတယ်။

အချိန်ကြာလာတာနဲ့အမျှ အကြမ်းဖက်ခံနေရသူတွေ စိတ်ထဲ “ငါတို့လူမျိုးတွေကို ကာကွယ်ပေးမဲ့သူ ဘယ်သူမှ မရှိပါလား” လို့ စိတ်ပျက် ဒေါသထွက်လာကြပြီး ကိုယ့်အားကိုယ်ကိုးမှ ရတော့မယ်လို့ စဉ်းစားလာတဲ့အတွက် သူတို့ ဘက်ကလည်း မခံနိုင်တဲ့အဆုံး လက်တုန့်ပြန် တိုက်ခိုက်လာတဲ့အခါမှာ နှစ်ဖက်ပဋိပက္ခအဖြစ် ပိုမိုကြီးထွားသွားတယ်။ ဒီအခါမှာတော့ အစိုးရလိုချင်တဲ့ အကွက်ထဲကို တန်းဝင်သွားပါပြီ။ အစပိုင်းမှာ အစိုးရကိုယ်နှိုက်က မုဒိမ်းမှု၊ သတ်ဖြတ်မှု စတဲ့ ထွင်လုံးတွေနဲ့ တို့မီးရှို့မီးလုပ် သတင်းလွင့်ခဲ့ရပေမဲ့ နောက်ပိုင်းမှာတော့ သူတို့ ဖန်တီးစရာတောင် မလိုတော့ဘဲ တကယ်ဖြစ်လာ ပါတယ်။ ဒီတော့ အစိုးရက သူတို့သိဒ္ဓိတင်ပေးချင်တဲ့၊ Victims တွေ အဖြစ် ပုံဖေါ်ချင်တဲ့ဘက်က ခံရတဲ့သတင်းတွေကို အဆပေါင်းများစွာ ချဲ့ကားပြီး ထုတ်လွင့်ကြတယ်။ သူတို့ဘက်က အဆမတန်ခံစားလိုက်ရတဲ့ ပုံမျိုးပေါ့။ ပြည်တွင်းက မျိုးချစ်မီဒီယာတွေကလည်း ကိုယ့်အုပ်စုတွေရဲ့ တစ်ဖက်သတ်အကြမ်းဖက်မှုတွေအကြောင်း ဘယ်တော့မှ မဖော်ပြကြဘဲ တဘက်သူတွေရဲ့ လုပ်ရပ်တွေကိုတော့ မဆိုင်းမတွဘဲ အလွန်မြန်ဆန်စွာ တင်ပြလေ့ရှိခဲ့တယ်။ ဒီအခြေအနေကြောင့် စိုးရိမ်သောကနဲ့ အမျက်ဒေါသကို ပိုမိုကြီးထွားလာစေပြီး၊ ၀ါဒမှိုင်းမိနေတဲ့ ပြည်သူတွေကို  “ကာကွယ်ခြင်း”ဆိုတဲ့ ခေါင်းစဉ် တပ်ပြီး တခြားသူတွေကို မောင်းထုတ်ကြအောင်၊ သွေးချောင်းစီး သတ်ဖြတ်စေအောင် တွန်းပို့ပေးလိုက်ခြင်းသာ ဖြစ်ပါတယ်။

ဒီအခါမှာ အခြေအနေမှန်တွေကို သိရှိထားတဲ့ နိုင်ငံတကာအသိုင်းအ၀ိုင်းကလည်း လက်ပိုက် ကြည့်နေလို့မရတော့ဘဲ ထုတ်ဖေါ် ဝေဖန်လာ ရတယ်။ ဒီလို ဝေဖန်ခြင်းကလည်း အစိုးရ အတွက် အကွက်ကောင်းတခု ဖြစ်နေ ပြန်တယ်။ ဘာကြောင့်လဲဆိုတော့ အစိုးရက – “တိုင်းပြည်ရဲ့ ရန်သူတွေက ပြည်တွင်း မှာသာမက ပြည်ပမှာလည်း ရှိနေကြတယ်၊ ပြည်တွင်းမှာ ရှိနေတဲ့ ရန်သူတွေကို နောက်ကွယ်ကနေ အားပေးထောက်ပံ့နေတဲ့ ပြည်ပအန္တရာယ်တွေ ရှိနေပြီ”လို့ သွင်သွင်ဝါဒဖြန့်ရင်း ပြည်သူလူထုရဲ့ စိတ်ထဲမှာ ငါတို့တိုင်းပြည်ဟာ ပြည်တွင်းရော ပြည်ပကပါ အန္တရာယ်တွေ ၀ိုင်းရံနေပါလားဆိုတဲ့ ခံစားချက်စူးနစ်ဝင်သွားစေတယ်။ ဒီလို ပြည်တွင်းပြည်ပ ရန်သူတွေကို ကာကွယ်တွန်းလှန်ဖို့ စုစည်းကြပါ။ ငါတို့ ဘာသာ ၊ ငါတို့လူမျိုးကို ကာကွယ်ဖို့ဆိုရင် ငါတို့အားလုံး စည်းလုံးညီညွှတ်မှ ရတော့မယ်။ ဒီလို စည်းလုံးညီညွှတ်မှုကို တည်ဆောက်ပေးနိုင်တဲ့၊ ငါတို့ ဘာသာ သာသနာ မပျောက်အောင် အကာကွယ်ပေးနိုင်တဲ့ ခေါင်းဆောင်တစ်ယောက် ရှိဖို့လိုအပ်တယ်၊ အဲဒီလို ခေါင်းဆောင်ကလည်း ခုချိန်မှာ ဆိုရင် ခိုင်မာပြတ်သားတဲ့ ဆုံးဖြတ်ချက်တွေချမှတ်ခဲ့တဲ့ သမ္မတကြီးဘယ်သူဘယ်ဝါကလွဲရင် တခြားမရှိနိုင်ဘူးဆိုတဲ့ ကြေငြာတွေ  ဆက်ဝင်လာတယ်။

တိုက်ဆိုင်တာက ဒီအချိန်မှာ မီလိုစီဗစ်ရဲ့ ပေါ်လစီကိုဝေဖန်မိရင် အဲဒီလူအတွက် တော်တော်လေးကို အန္တရာယ်များတယ်။ ဒီဖြစ်ရပ်တွေဟာ အစိုးရမှာသာ အဓိကတာဝန်ရှိတယ်ဆိုပြီး အတိုက်အခံဘက်က ဝေဖန်လိုက်ရင် အဲဒီလူက တိုင်းပြည် အကျိုးစီးပွားကို မလိုလားသူ၊ သစ္စာဖေါက် အဖြစ် ဝေဖန်တိုက်ခိုက်ခံရတယ်။ အတိုက်အခံက တဘက်ဘက်ကို ဘက်လိုက်ပြီး ပြောပေးတယ်၊ နောက်ကွယ်မှာ အဲဒီဘက်က အထောက်အပံ့တွေယူထားတယ်၊ အဲဒီဘက်နဲ့ ဘယ်လို ပက်သက်နေတယ် ဆိုတဲ့ စွပ်စွဲမှုတွေနဲ့ ထိုသူကို အမျိုးသားရေးသစ္စာဖေါက်၊ လူမျိုးနဲ့ဘာသာအပေါ် သစ္စာဖေါက်၊ တိုင်းပြည်အပေါ် သစ္စာဖေါက်အဖြစ် တံဆိပ်ကပ်ဖို့ အစိုးရအတွက် ပိုမိုလွယ်ကူသွားတယ်။ ဒါကြောင့်လည်း ဒီလောက် ကြောက်မက်ဖွယ် ဆိုးရွားပြင်းထန်လှတဲ့ လူအစုလိုက် အပြုံလိုက် သတ်ဖြတ်မှုကြီးတွေမှာ ၀င်ရောက်ပြောဆိုမဲ့သူ ရှားပါး သွားခဲ့ပါတော့တယ်။

ဒါဟာ ဆယ်စုနှစ်တစ်ခုအတွက် ယခင် ယူဂိုဆလားဗီးယားနိုင်ငံတစ်ဝှန်း အစွန်းရောက်အမျိုးသားရေးဝါဒကို လှိမ့်သွင်းခဲ့တဲ့ နည်းလမ်းတွေပါဘဲ။ ဒီလိုဖြစ်ရပ်တွေမတိုင်ခင်မှာသာ ရွေးကောက်ပွဲကျင်းပမယ်ဆိုရင် ပြည်သူလူထုက ကွန်မြူနစ်ပါတီကို လုံးဝမကြိုက်တဲ့အတွက် ကွန်မြူနစ်ပါတီကို အသွင်ပြောင်းထားတဲ့ မီလိုဆီဗစ်ရဲ့ပါတီဟာ ရှုံးနိမ့်ဖို့သေချာနေတယ်။ ခုလို ဒီအကြမ်းဖက် ပဋိပက္ခတွေ ဖြစ်သွားပြီး နှစ်နှစ်လောက် အကြာမှာ ရွေးကောက်ပွဲလုပ်တဲ့အခါမှာတော့ မီလိုဆီဗစ် အနေနဲ့ တိုင်းပြည်မှာရှိတဲ့ မဲတွေရဲ့ ၈၀% လောက်ကို ရရှိသွားတယ်။ ဘာကြောင့်လဲဆိုတော့ လူများစုကြီးက သူ့ကို သဘောကျ နေတယ်၊ အထင်ကြီးတယ်။ သူဟာ အမျိုး ဘာသာ သာသနာကို ပြတ်ပြတ်သားသား ကာကွယ်ပေးနိုင်တဲ့ သမ္မတကြီး ဖြစ်တယ်ဆိုပြီး ယုံကြည်ပြီး မဲပေးခဲ့ကြတယ်။ မီလိုဆီဗစ်နဲ့ အပေါင်းအပါတစ်စုဟာ ၁၉၉၀၊ ၁၉၉၂ နဲ့ ၁၉၉၇ ရွေးကောက်ပွဲတွေမှာ ပြတ်ပြတ်သားသား အနိုင်ရခဲ့ပြီး တိုင်းပြည်ကို ဆယ်နှစ်လောက် အုပ်ချုပ်သွားခဲ့ပါတယ်။ အဲဒီလို အနိုင်ရခဲ့တာမှာလည်း မဲလိမ်မဲခိုးစရာတောင် မလိုဘဲ လူထုက တကယ့်ကို ကြိုက်နှစ်သက်လို့ပေးခဲ့တဲ့ သန့်ရှင်းတဲ့ မဲတွေနဲ့ နိုင်ခဲ့တာဖြစ်ပါတယ်။

အဲဒီနောက်ပိုင်း `မီလိုဆီဗစ်´ တိုင်းပြည်ကို (၁၀)နှစ်လောက် အုပ်ချုပ်လိုက်တာ တိုင်းပြည်လည်း ဖွတ်ဖွတ်ညှက်ညှက် ကျေတဲ့ထိ ဖြစ်သွားတယ်။ ရလဒ်အနေနဲ့ နိုင်ငံပြိုကွဲခြင်း နဲ့ ရန်ငြိုးစစ်ပွဲကြီး(၄)ခု ပဲပေါ့။ လူ့အသက် နှစ်သိန်းကျော် ဆုံးရှုံး ခဲ့တယ်။ ထောင်နဲ့ချီတဲ့မြို့ရွာတွေ ပြာပုံ ဘ၀ ရောက်သွားခဲ့တယ်။ မြို့ကြီးတွေမှာ ကျည်ခွံတွေ ဖုံးလွှမ်းခဲ့တယ်။ လူပေါင်း နှစ်သန်းကျော် နေရပ်စွန့်ခွာ ထွက်ပြေးခဲ့ရတယ်။ အိုးမဲ့အိမ်မဲ့ ဖြစ်ခဲ့ရတယ်။ စီးပွားရေးက အဖတ်ဆည် မရအောင် ပျက်စီးသွားခဲ့တယ်။ ၁၉၉၉ ခုနှစ် မတ်လ မှာ `နေတိုး´စစ်အုပ်စု ၀င်လာပြီး (၇၈)ရက်တိုင်တိုင် ဗုံးမိုး ရွာသွန်းပေးခြင်းခံရတဲ့ အခြေအနေ ဆိုက်သွား တယ်။ ဒီအခါမှ ပြည်သူလူထုကလည်း အမြင်မှန် တွေရလာတယ်။ ရွေးကောက်ပွဲမှာ ပေါက်ကရ ကတိ တွေ ပေးတာကို နားယောင်ပြီးမဲပေးခဲ့တဲ့ လူထုဟာ (၁၀)နှစ်လောက်ကြာပြီးမှ မီလိုဆီဗစ်ဟာ လူကောင်း မဟုတ်ဘူးလို့ သိသွားတယ်။ အစောပိုင်းမှာတော့ သူက တိုင်းပြည်နဲ့လူမျိုးကို ကာကွယ်မယ် ဘာညာ နဲ့ လူပြိန်းကြိုက် ၀ါဒဖြန့်ခဲ့ပေမဲ့၊ တကယ့်လုပ်ရပ် တွေကို ပြန်ကြည့်လိုက်တဲ့အခါမှာ တိုင်းပြည်နဲ့လူမျိုး ကို ဖျက်ဆီးပစ်နေတဲ့ လုပ်ရပ်တွေဆိုတာ သိလာကြ တယ်။ ဒါကြောင့် သူဟာ အစောပိုင်း ရွေးကောက်ပွဲ (၃)ကြိမ်ထိ နိုင်ခဲ့ပေမဲ့ (၂၀၀၀)ခုနှစ် မှာကျင်းပတဲ့ (၄)ကြိမ်မြောက် ရွေးကောက်ပွဲမှာ ရှုံးနိမ့်သွားတယ်။ အဲဒီအကြိမ်မှာ သူက ရှုံးနိမ့်တော့မှာကို ကြိုမြင်တဲ့ အတွက် မဲလိမ်မဲခိုးဖို့ ကြိုးစားသေးပေမဲ့လည်း အရာမရောက်တော့ပါဘူး။ ဆာဗီးယားလူငယ် တန်ပြန်လှုပ်ရှားမှုအဖွဲ့ (Serbian youth movement Otpor) နဲ့ အတိုက်အခံအင်အားစုတွေ ပေါင်းပြီး `မီလိုဆီဗစ်´ကို ဖြုတ်ချလိုက်နိုင်ခဲ့တယ်။ အတိုက်အခံတွေ အာဏာရလာပြီး နောက်ပိုင်း `မီလိုဆီဗစ်´ ကိုယ်တိုင်လည်း ထွက်ပြေးနေရာကနေ (၂၀၀၁)ခုနှစ် ဧပြီလမှာ ဖမ်းမိသွားပြီး၊ `လူမဆန်တဲ့ ပြစ်မှုတွေ ကျူးလွန်ခဲ့တဲ့ စစ်ရာဇ၀တ်ကောင်´အဖြစ်  The Hague မှာရှိတဲ့ နိုင်ငံတကာ ရာဇ၀တ်ခုံရုံး(ICC)ကို ပို့ခံ လိုက်ရပါတယ်။ ဒါပေမဲ့လည်း အမှုစီရင်လို့ မပြီးသေးခင်၊ စီရင်ချက်ချတဲ့အဆင့်ထိ မရောက်ခင် ၂၀၀၆ ခုနှစ် မတ်လ (၁၁) ရက်နေ့မှာ ထောင်ထဲမှာပဲ သူ့ကိုယ်သူ အဆုံးစီရင်သွားခဲ့ပါတော့တယ်။

သုံးသပ်ချက်

(၁)   အာဏာရှင်စနစ်ကို ပြောင်းလဲပစ်ချင်လို့ကျင်းပတဲ့ ရွေးကောက်ပွဲတွေမှာ အာဏာရှင်ကြီး`မီလိုဆီဗစ်´ကပဲ ဘာကြောင့် ဆက်လက် အနိုင်ရခဲ့တာလဲဆိုတာ လေ့လာကြည့်ရင်တော့ အဓိကအားဖြင့် နိုင်ငံရေး အိုင်ဒီယိုလော်ဂျီ ကင်းမဲ့နေတဲ့ လူ့အဖွဲ့အစည်းထဲမှာ `အစွန်းရောက် အမျိုးသားရေးဝါဒ´ကို အိုင်ဒီယိုလော်ဂျီ တစ်ခုအနေနဲ့ ခပ်ပြင်းပြင်း ရိုက်သွင်းပေးနိုင်ခဲ့လို့  လူကြိုက်များမှု ရရှိခဲ့တာဖြစ်ပါတယ်။ ကမ္ဘာ့သမိုင်း တလျောက် ပေါ်ပေါက်ခဲ့တဲ့ `အစွန်းရောက် အမျိုးသားရေးဝါဒ´ကို လေ့လာသုံးသပ်ကြည့်ရင် များသောအားဖြင့် တချိန်က အာဏာရှင် အသိုင်းအ၀ိုင်း ဆက်လက် ရှင်သန်ခွင့်ရဖို့ အတွက် နောက်ဆုံး`အသက်ကယ်ဆေး´သဖွယ် ဖြစ်နေတာကို တွေ့ရလေ့ရှိတယ်။ ယူဂိုဆလားဗီးယားရဲ့ ကွန်မြုနစ် အာဏာရှင်တွေဟာ အမျိုးသားရေးဝါဒကို ဗန်းပြပြီး ကွန်မြူနစ် တစ်ပါတီ အာဏာရှင်စနစ်ကိုပဲ နောက်ထပ် (၁၀)နှစ်လောက် သက်ဆိုးရှည်အောင် ဆွဲဆန့်သွားခဲ့တာဖြစ်ကြောင်း တွေ့ရလိမ့်မယ်။ ဒီအတွက် ပြည်သူလူထုဘက်က ပေးဆပ်လိုက်ရတဲ့ တန်ဖိုးကတော့ ကြီးမားလွန်းလှပါတယ်။ လူထုဟာ `မီလိုဆီဗစ်´ရဲ့ ၀ါဒမှိုင်းတိုက်မှုနောက် ကောက်ကောက်ပါအောင် လိုက်ခဲ့မိတဲ့ အတွက် `မီလိုဆီဗစ်´ စိတ်ထင်သလိုဖျက်ဆီးခွင့်ရသွားတဲ့ တိုင်းပြည်ဟာလည်း ပြန်လည် ထူထောင်နိုင်ဖို့ ကြိုးစားလာခဲ့တာ ခုချိန်မှာမှ နာလန်ထူစအဆင့်ပဲ ရှိပါသေးတယ်။

(၂)   ဘာကြောင့် အဲလ်ဘေးနီးယား မွတ်ဆလင်တွေ အများစုနေထိုင်တဲ့ ကိုဆိုဗိုဒေသမှာ လူမျိုးရေး ပဋိပက္ခတွေ ဖန်တီးခဲ့တာလဲ ဆိုတာ လေ့လာကြည့်ရင် ယူဂိုဆလားဗီးယားနိုင်ငံမှာ ခရိုအက်၊ဆာ့ဘ်၊မက်ဆီဒိုးနီးယား စသဖြင့် လူမျိုးစုတွေ နဲ့ ကိုးကွယ်မှုတွေ ကွာခြားနေပေမဲ့ တကယ့်လူမျိုးကို ကြည့်လိုက်ရင်တော့ `ဆလဗ်´လူမျိုးတွေသာဖြစ်ပြီး ခရစ်ယာန်ကို ကိုးကွယ်သူများတယ်။ အဲလ်ဘေးနီးယန်းတွေသာ လူမျိုးမတူ၊ ဘာသာမတူ၊ ဘာသာစကား မတူဘဲ သီးခြားဖြစ်နေတဲ့အတွက် အဲဒီနေရာမှာ ပြဿနာဖန်တီးရင် ပိုလွယ်တယ်။ နောက်ပြီး ဒုတိယကမ္ဘာစစ် အတွင်းက ဖြစ်ရပ်တချို့ကြောင့်လည်း လူများစုဆာ့ဘ်တွေက အဲလ်ဘေးနီးယား လူနည်းစုအပေါ် အမြင် သိပ်မကြည်လင်ကြဘူး။ ဒါပေမဲ့ ဘယ်လို အမြင်မကြည်တာတွေပဲရှိရှိ အဲဒီဒေသမှာ ပဋိပက္ခတွေဖြစ်ခဲ့ရတဲ့ တကယ့်အကြောင်းခံက ဘာသာရေး ကြောင့်လည်းမဟုတ်၊ လူမျိုးရေးကြောင့်လည်း မဟုတ်ဘဲ အဓိကအကြောင်းရင်းကတော့ `မီလိုဆီဗစ်´ အာဏာဆက်လက် ချုပ်ကိုင်ထားလိုတဲ့ အတွက်ကြောင့်ပဲဖြစ်ပါတယ်။

လူမျိုးဖြုတ်သတ်ဖြတ်မှုဆိုတာ သာမာန်လူထုတွေထဲ အပြန်အလှန် အကြမ်းဖက်မှုတွေ အဆက်မပြတ်ဖြစ်ပွားရာကနေ ပွင့်ထွက်လာတတ်တဲ့ အရာမျိုး လုံးဝ မဟုတ်ကြောင်း သိစေချင်ပါတယ်။ (မြန်မာနိုင်ငံမှာလည်း ရိုဟင်ဂျာ လူမျိုးစုကစလို့ မွတ်စ်လင်မ်အားလုံး အထိ လွှမ်းခြုံ ဦးတည်လာနေတဲ့ ဘာသာရေး အခြေခံတဲ့ လူမျိုးရေး သုတ်သင် ရှင်းလင်းမှုတွေဟာ “စိတ်ဓာတ်စစ်ဆင်ရေး”အားဖြင့် အဆင့်မြင့်မြင့် ထိထိရောက်ရောက် ကြိုတင်ကြံစည်ခဲ့တာဖြစ်ပြီး၊ နိုင်ငံတော်ရဲ့ ထိပ်သီးယန္တရား တစ်ချို့ ပါဝင်ပတ်သက်မှု မရှိဘဲနဲ့ ဘယ်လိုမှ ဖြစ်ပေါ်လာစရာ အကြောင်းမရှိဘူး ဆိုတာ အသေအချာပြော လိုပါတယ်။)

(၃)   ဒီဖြစ်ရပ်ဆိုးတွေကို ထပ်မဖြစ်အောင် ဘယ်လိုတားဆီးနိုင်မလဲဆိုတာ သုံးသပ်ကြည့်ရင် အဓိကအားဖြင့်တော့ အစိုးရရဲ့ ပူးပေါင်းပါဝင်မှု မဖြစ်မနေလိုအပ်ပါတယ်။ အကြမ်းဖက်ပဋိပက္ခတွေ ဖြစ်ပွားရာဒေသတွေကို သမ္မတ နဲ့ အတိုက်အခံခေါင်းဆောင်၊ လူထုခေါင်းဆောင်ဆိုသူတွေ ကိုယ်တိုင်ကိုယ်ကျ သွားရောက်ပြီး လူထုနဲ့တွေ့ဆုံဖို့ လိုအပ် ပါတယ်။ ဒါက ဖြစ်နေတဲ့ ပဋိပက္ခကို ရပ်တန့်အောင် ဆောင်ရွက်ယုံ သက်သက်ပဲ ဖြစ်ပါတယ်။ မိမိနိုင်ငံ နယ်နမိတ်အတွင်း အလားတူ အဖြစ်ဆိုးတွေ ထပ်မံ မဖြစ်ပွားတော့အောင် နိုင်ငံတော် အာဏာပိုင်တွေသာလျှင် အဓိက တာဝန်ယူရမှာ ဖြစ်ပါတယ်။

(၄)   လူဆိုတာ မွေးလာကတည်းက နောက် လူတစ်ယောက်ကို မုန်းတီးစက်ဆုပ်တဲ့ စိတ်ဓါတ်က အလိုအလျောက် ပါလာတာ မဟုတ်ပါဘူး။ ဒါတွေက လူတွေကိုယ်တိုင် ဖန်တီးလို့ဖြစ်လာတဲ့ ရလဒ်တွေပါ။ ခုလို အမုန်းတရားကို အခြေခံပြီး ဖြစ်လာတဲ့ အကြမ်းဖက် သတ်ဖြတ်မှုတွေရဲ့ အဓိက ဇစ်မြစ် တစ်ခုက လူသားတွေရဲ့စိတ်ဓါတ်ကို `အရိုင်းစိတ်´ သွပ်သွင်း ပေးလိုက်တဲ့ ၀ါဒဆိုး..  တနည်းအားဖြင့် `အစွန်းရောက် အမျိုးသားရေး ၀ါဒဆိုး´ပါပဲ။ ဒီလို အခြေခံ အကြောင်းရင်းကို အပြီးတိုင် မချေမှုန်းမချင်း ဒီလိုပြဿနာတွေ ဆက်လက်ဖြစ်ပွားနေဦးမှာပါ။ တကယ်တမ်း လူ့အဖွဲ့အစည်းထဲမှာ အမြစ်တွယ်နေပြီဖြစ်တဲ့ `အစွန်းရောက် အမျိုးသားရေးဝါဒ´ရဲ့ အဆိုးကျော့ သံသရာကြီး တစ်ခုလုံးကို မြေလှန်ပစ်နိုင်ဖို့ ဆိုရင်တော့ အစိုးရအပါအ၀င် အားကောင်းတဲ့ လူမှုအဖွဲ့အစည်းတွေ၊ ပြည်သူ အများလေးစားလက်ခံတဲ့ ပုဂ္ဂိုလ်တွေ၊ သမမျှတအမြင်ရှိတဲ့ ဘာသာရေးခေါင်းဆောင်တွေ၊ စိတ်ချယုံကြည်ရတဲ့ မီဒီယာတွေ၊ အတိုက်အခံတွေအားလုံး လက်တွဲညီညီနဲ့ တန်ပြန်ဆန့်ကျင်ကြမှသာ ဖြစ်နိုင်ပါလိမ့်မယ်။ ဒါ့အပြင် လူပြိန်းကြိုက် သွေးထိုးလှုံ့ဆော်နေကြတဲ့ တရားဝင်/တရားမ၀င် အင်အားစု အားလုံးကို အစိုးရဘက်က ထိရောက်ပြတ်သားတဲ့ အရေးယူမှုတွေ အမြန်ဆုံး ပြုလုပ် ဆောင်ရွက်ပေးရမှာ ဖြစ်ပါတယ်။

ကမ္ဘာ့သမိုင်းတလျောက် ဖြစ်ပွားခဲ့တဲ့ ဒီလိုဖြစ်ရပ်ဆိုးတွေဟာ မြန်မာပြည်သူတွေအနေနဲ့ ယူတတ်မယ်ဆိုယင် တူညီတဲ့ သင်ခန်းစာတွေ၊ သတိပေးချက်တွေ ဖြစ်ပါတယ်။

သတိထားကြပါ …

ပေးဆပ်ရမယ့် တန်ဖိုးတွေက ကြီးမားလွန်းပါတယ်…

သိပ်ပြီး နောက်ကျသွားပါလိမ့်မယ်…။

ဦးဦး မှော်ဆရာ
(၁၉ – ၃ – ၂၀၁၄)

PDF ဖြင့်ဖတ်လိုလျှင် => http://goo.gl/EIjPt9