လီဗာပူးလ်အသင်း၏ လေ့ကျင့်ရေးကွင်းတွင် ဆွာရက်ဇ်နှင့် စကာတဲလ်သို့ အချင်းများခဲ့

ဧပြီ ၂၇ ၊ ၂၀၁၄
M-Media

– ယမန်နေ့က ပြုလုပ်ခဲ့သည့် လီဗာပူးလ်အသင်း၏ လေ့ကျင့်ခန်းအစီအစဉ်တွင် တိုက်စစ်မှူး ဆွာရက်ဇ်နှင့် နောက်ခံလူစကာတဲလ်တို့မှာ အချင်းများခဲ့ကြသည်ဟု သိရသည်။

Melwood လေ့ကျင့်ရေးကွင်းတွင် လီဗာပူးလ်အသင်းသားများမှာ ၃ ယောက် နှစ်ဖွဲ့ခွဲ၍ ဘောလုံးဖြင့် ပိုက်ကျော်ခြင်းကစားနေစဉ် တစ်ဘက်အသင်းမှ စကာတဲလ်က ရယ်စရာများပြော၍ ခြင်းခတ်နေသည့် ဘောလုံးအား လက်ဖြင့်ထိန်းခဲ့ရာမှ စတင်ဖြစ်ပွားခဲ့ခြင်းဖြစ်သည်။

ဆွာရက်ဇ်မှာ စကာတဲလ်၏ထိုလုပ်ရပ်ကြောင့် မကျေမနက်ဖြစ်ကာ ပိုက်နားသို့တိုးလာခဲ့ပြီးနောက် တွန်းထိုးရန် ကြိုးစားခဲ့သည်။ သို့သော်လည်း အသင်းဖော်များက ဖြန်ဖြေပေးခဲ့မှုကြောင့် ထိုအချင်းများမှုမှာ ပြီးဆုံးခဲ့သည်။

ထိုကဲ့သို့ဖြစ်ပွားချိန်တွင် နည်းပြဘရန်ဒန်ရော်ဂျာ အနားတွင်ရှိနေသော်လည်း မည်သည့်တုံ့ပြန်မှုများမှ မပြုလုပ်ခဲ့ပေ။ လီဗာပူးလ်အသင်းမှာ ပရီးမီးယားလိဂ်အမှတ်ပေးဇယားကို ဦးဆောင်နေပြီး ချန်ပီယံဖြစ်ရေး အဓိကပြိုင်ဘက်ဖြစ်သည့် ချယ်ဆီးအသင်းနှင့် ယနေ့တွင် ယှဉ်ပြိုင်ကစားရမည်ဖြစ်သည်။