မလေးရှားတွင် ချောကလက် ၂ မျိုး၌ ဝက်၏ DNA တွေ့ ၊ ဟလာလ် ခွင့်ပြုမိန့်  ရုတ်သိမ်းပြီး ဈေးကွက်မှ ပြန်သိမ်းရန် အမိန့်ထုတ်

မေ ၂၆ ၊ ၂၀၁၄
M-Media

– Cadbury Confectionery Malaysia ကုမ္ပဏီက ထုတ်လုပ်သည့် ချောကလက် အမှတ်တံဆိပ် နှစ်ခုအား မလေးရှား ကျန်းမာရေးဝန်ကြီးဌာက စစ်ဆေးခဲ့ရာ ၀က်၏ DNA တွေ့ရှိခဲ့ ခြင်းကြောင့် ချောကလက် တံဆိပ်နှစ်ခုအား ပြန်လည်သိမ်းဆည်းရန်အတွက် ကုမ္ပဏီက စီစဉ်နေကြောင်းကို မလေးရှားနိုင်ငံ The Star သတင်းဌာနတွင် မေလ ၂၄ ရက်နေ့တွင် ဖော်ပြပါရှိသည်။

ထိုကိစ္စနှင့်ပတ်သက်၍ ကုမ္ပဏီ၏ တရားဝင် Facebook စာမျက်နှာ၌ စနေနေ့က ကြေညာချက်ထုတ်ပြန်ခဲ့ပြီး မလေးရှားအစိုးရက သတ်မှတ်ထားသည့် အရည်အသွေးစံနှုန်းနှင့် ကိုက်ညီစေရန်အတွက် ချောကလက် ထုတ်လုပ်သည့် ကုန်ကြမ်းများအား အသေအချာ စစ်ဆေးနေသည်ဟု ဖော်ပြထားသည်။

Cadbury ကုမ္ပဏီမှ ချောကလက်များတွင် ၀က်၏ DNA ပါဝင်နေကြောင်း  မေလ ၂၃ ရက်နေ့က ဆိုရှယ်မီဒီယာများတွင် သတင်းများ ပြန့်နှံ့ခဲ့ပြီးနောက် မလေးရှား ကျန်းမာရေး ၀န်ကြီးဌာနက စစ်ဆေးခဲ့ခြင်းဖြစ်သည်။

ချောကလက်တံဆိပ် ၂ မျိုးကို စစ်ဆေးခဲ့ရာ ၂၀၁၄ ခုနှစ် နိုဝင်ဘာ ၁၃ ရက်တွင် သက်တမ်းကုန်မည့် Cadbury Dairy Milk Hazelnut တံဆိပ် (ဘားကုတ်နံပါတ် 200813M01H I2) နှင့် ၂၀၁၅ ခုနှစ် ဇန်န၀ါရီ ၁၅ ရက်နေ့တွင် သက်တမ်းကုန်မည့် Cadbury Dairy Milk Roast Almond တံဆိပ် (221013N01R I1) ဘားကုဒ်နံပါတ် ချောကလက်တို့တွင် ၀က်၏ DNA များ တွေ့ရှိခဲ့ရခြင်းဖြစ်သည်ဟု ကျန်းမာရေးဌာက စနေနေ့အစောပိုင်းတွင် ထုတ်ပြန်ခဲ့သော ကြေညာချက်တွင် ဖော်ပြထားသည်။

ထိုချောကလက်ကို ထုတ်လုပ်သည့် Cadbury Confectionary Malaysia ကုမ္ပဏီအနေဖြင့် ထိုချောကလက်များအား ချက်ခြင်းပြန်လည် သိမ်းယူရန် ဆောင်ရွက်ရမည်ဖြစ်ကြောင်း မလေးရှား ကျန်းမာရေးဝန်ကြီးဌာန အထွေထွေ ဒါရိုက်တာ ဒါတွတ် ဒေါက်တာ နူရ် ဟီရှမ် အဘ်ဒူလာက ပြောကြားခဲ့သည်။

“စားသုံးသူတွေအနေနဲ့ ဒီချောကလက်တွေကို မ၀ယ်ခင်မှာ ဘားကုဒ် နံပါတ်တွေကို ဖတ်ကြည့်ဖို့ ကျန်းမာရေး ၀န်ကြီးဌာနက အကြံပြုထားပါတယ်” ဟု ၎င်းက ဆိုသည်။

အဆိုပါ ချောကလက် နှစ်မျိုးကို  Malaysian Department of Islamic Development(Jakim) မှာ ဟလာလ် အမှတ်တံဆိပ် ခွင့်ပြုထားခြင်းကို ရုတ်သိမ်းပြီ ဖြစ်ကြောင်း မလေးရှားသတင်းဌာန တခုဖြစ်သည့် The Star သတင်းဌာနတွင် ဖော်ပြထားတာကိုတွေ့ရပါသည်။

ထိုကိစ္စနှင့် ပတ်သက်၍ မလေးရှားအစ္စလာမ်ဖွံ့ဖြိုးရေးဌာနက (Jakim) က မကြာမီ ကြေညာချက်ထုတ်ပြန်ဖွယ်ရှိနေသည်။