ပါလက်စတိုင်း အစိုးရသစ် ၀န်ကြီးလောင်းသုံးဦးအား ဂါဇာသို့ ၀င်ရောက်ခွင့် အစ္စရေးပိတ်ပင်

ဇွန် ၂ ၊ ၂၀၁၄
M-Media

– ညီညွတ်သော ပါလက်စတိုင်းအစိုးရ၏ ၀န်ကြီးလောင်းသုံးဦးအား အနောက်ဘက်ကမ်းခြေမှ ဂါဇာသို့ ၀င်ရောက်ခွင့်မပြုဟု ပါလက်စတိုင်းနယ်မြေရှိ အစ္စရေး စစ်တပ်အကြီးအကဲ ယိုအဗ် မိုဒီချိုင်က ရေဒီယိုမှတစ်ဆင့် ယနေ့တွင် ပြောကြားခဲ့သည်။

အစ္စရေးဝန်ကြီးချုပ်ရုံးနှင့် ကာကွယ်ရေးဝန်ကြီးဌာနသို့ AFP က ဆက်သွယ်ရာတွင် ထိုသတင်းအားနှင့် ပတ်သက်၍ ဖြေကြားရန် ငြင်းဆိုခဲ့သည်။ ဖာတာနှင့် ဟားမတ်စ် နှစ်ဖွဲ့ ပေါင်းစည်းပြီးနောက် ဖွဲ့စည်းမည့် ပါလက်စတိုင်းအစိုးရသစ်ကို တနင်္လာနေ့တွင် ကြေညာမည်ဟု ပါလက်စတိုင်းသမ္မတ မဟ်မူဒ် အဘတ်စ်က စနေနေ့တွင် ပြောကြားခဲ့ပြီး ထိုအစိုးရအား သပိတ်မှောက်မည်ဟု အစ္စရေးက အကြောင်းကြားထားသည်ဟု ၎င်းက ဆိုသည်။

ဂါဇာတွင်အခြေစိုက်သည့် ဟားမတ်စ်အဖွဲ့နှင့် မဟ်မူဒ်အဘတ်စ်ခေါင်းဆောင်သည့် ဖာတာအဖွဲ့မှာ ပြီးခဲ့သည့် ဧပြီလက ပြန်လည်ပေါင်းစည်းခဲ့သည်။ ထို့ပြင် အချိန်ကြာညောင်းစွာ နှောင့်နှေးနေခဲ့ရသည့် ရွေးကောက်ပွဲ ပြန်လည်ကျင်းပရန်အတွက် လွတ်လပ်သော အစိုးရဖွဲ့စည်းရေးကိုလည်း သဘောတူခဲ့ကြသည်။

AFP