နျူ ကိစ္စ ပြေလည်ရန် ပိတ်ဆို့မှုများ အားလုံး ဖယ်ရှားရန်လိုအပ်ဟု အီရန်သမ္မတပြော

ဇွန်လ ၁၅ ရက်၊ ၂၀၁၄
M-Media

– အီရန်နျူကိစ္စနှင့် ပတ်သက်၍ အလုံးစုံ သဘောတူညီချက်ရရန်အတွက် ပိတ်ဆို့မှုများအားလုံးကို ဖယ်ရှားပေးရန် လိုအပ်သည်ဟု အီရန်သမ္မတ ဟာဆန်ရူဟာနီက သမ္မတသက်တမ်း တစ်နှစ်ပြည့် မိန့်ခွန်းတွင် ပြောကြားလိုက်သည်။

အနောက်နိုင်ငံများကမူ အီရန်၏ ယူရေနီယံကြွယ်ဝရေး လုပ်ဆောင်မှုများကို လျော့ချရန် တောင်းဆိုထားပြီး နျူလက်နက်ထုတ်လုပ်ရန်အတွက် ပစ္စည်းများကို ထုတ်ပေးနိုင်ဖွယ်ရှိသည့် Arak ဓာတ်ပေါင်းဖိုကြီးနှင့် ပတ်သက်၍လည်း စိုးရိမ်မှုများရှိနေသည်။ သို့သော်လည်း အီရန်နိုင်ငံက ထိုဓာတ်ပေါင်းဖိုမှာ နျူစွမ်းအင်ကို ငြိမ်းချမ်းစွာ အသုံးပြုရေးအတွက်ဟု အခိုင်အမာပြောဆိုထားပြီး ပိတ်ဆို့မှုများအားလုံးကို ရုပ်သိမ်းပေးရန် တိုက်တွန်းထားသည်။

အီရန်နျူအရေး အချို့အကြောင်းအရာများနှင့် ပတ်သက်၍ မတူညီသောအမြင်များ ရှိနေသော်လည်း အင်အားကြီး ၆ နိုင်ငံနှင့် အီရန်နိုင်ငံတို့၏ နောက်ဆုံးအဆင့် ဆွေးနွေးမှုကို လာမည့် တနင်္လာနေ့တွင် ဗီယင်နာ၌ စတင်ပြုလုပ်သွားမည်ဖြစ်ပြီး ထိုဆွေးနွေးမှုမှတဆင့် ဇူလိုင် ၂၀ ရက်မတိုင်ခင် နောက်ဆုံး သဘောတူညီချက် ရနိုင်ဖွယ်ရှိနေသည်။