” နိုင်ငံတော်အား ဖျက်ဆီးနေကြသည့် လုပ်ရပ် တခု ” (ပြည်သူ့အသံ)

ဇူလိုင် ၇ ၊ ၂၀၁၄
M-Media
.ပေးပို့သူ-  မောင်သာ.K

အကြမ်းဖက်သည့်အခါ အသုဘပို့သည့်အခါ မြန်မာနိုင်ငံတော်သီချင်းကို သီဆိုဟစ်ကြွေးနေကြခြင်းမှာ ကမ္ဘာ့အကြီးဆုံးအလွဲသုံးမှုဖြစ်သည်။

နိုင်ငံတော်သီချင်း၏ အနှစ်သာရကို လုံးဝနားမလည်ခြင်းဖြစ်သည်။ အဓိပ္ပါယ်လုံးဝနားမလည်ဘဲ သီဆိုသည့် ကြက်တူရွေး သတ္တဝါပမာ ဖြစ်သည်။

နိုင်ငံတော်သီချင်းဟူသည်မှာ မည်သည့်ဘာသာဝင် မည်သည့်လူမျိုးတဦးတယောက်မှ တကိုယ်တော်ပိုင် အရာမဟုတ်ဘဲ နိုင်ငံအတွင်းနေထိုင်သည်ဖြစ်စေ မနေထိုင်သည်ဖြစ်စေ နိုင်ငံ အတွင်းမွေးဖွားသည့် နိုင်ငံသား ဟူသရွေ့ မွေးရာပါပိုင်ဆိုင်သည့်အရာဖြစ်သည်။

`တရားမျှတ လွတ်လပ်ခြင်းနဲ့မသွေ တို့ပြည်တို့မြေ  များလူခပ်သိမ်း ငြိမ်းချမ်းစေဖို့ ခွင့်တူညီမျှ ဝါဒဖြူစင်တဲ့မြေ တို့ပြည်တို့မြေ ‘ ဟူသည့် လောကပါလ တရားသုံးပါးနှင့် အစချီသည့် နိုင်ငံတော်သီချင်းကို မသီဆိုကြဘဲ ‘ ကမ္ဘာမကြေ မြန်မာပြည် ဒါတို့မြေ ဒါတို့ပြည် တို့ပိုင်တဲ့မြေ ‘ ဟု အဘယ့်ကြောင့်ဖြတ်၍ သီဆိုနေကြပါသနည်း။

နိုင်ငံတော်သီချင်း၏ အစကိုပင် အလွတ် မရတော့ကြဟန် တူသည်။ သို့မဟုတ် အင်မတန်မှ လှပနက်ရှိုင်းသည့် နိုင်ငံတော် သီချင်း၏ အစချီစာသားကို မိမိတို့အလိုသဘောနှင့် ဖျက်တောက်လိုက်ကြဟန်တူသည်။

ထိုသို့သာဆိုပါက နိုင်ငံတော်၏ အထွတ်အမြတ် နိုင်ငံတော်သီချင်းကိုဖျက်စီးသည်အပြစ် နိုင်ငံတော်သီချင်းနှင့် လားလားမျှမသက်ဆိုင်သည့် ဆန့်ကျင်ဘက်နေရာတွင် တလွဲသုံးသည့် အပြစ်များကြောင့် ထိုသူများ၏ အပြစ်သည် နိုင်ငံတော်ကို ဖျက်စီးသည့်အပြစ်ပမာဖြစ်သည်ဟု ကျွန်ုပ်ခံယူသည်။

နိုင်ငံတော်ကို အမှန်တကယ်ချစ်မြတ်နိုးသည့် နိုင်ငံသားဟူသရွေ့တို့သည်လည်း ဤအတိုင်းခံယူမည်ဟု ကျွန်ုပ်ယုံကြည်သည်။

ဓါတ်ပုံညွှန်း- အကြမ်းဖက်မှုဖြစ်စဉ်တွင် ကွယ်လွန်သွားတဲ့ ကိုထွန်းထွန်း အသုဘ လိုက်ပို့နေသည့် ဆိုင်ကယ်စီးလူအုပ်စု (Photo- ဧရာဝတီ)

** M-Media ပြည်သူ့အသံ ကဏ္ဍတွင် ဖော်ပြပေးစေလိုသည့် အကြောင်းအရာ စာမူများကို [email protected] သို့ အီးမေးလ်ပေးပို့နိုင်ပါတယ်။ စိစစ်ပြိးဖော်ပြပေးပါမည်။