ဆွာရက်ဇ်၏ ပြစ်ဒဏ်မှာ ပြင်းထန်သော်လည်း မှန်ကန်သည်ဟု ဘလတ္တာဆို

ဇူလိုင် ၁၆ ၊ ၂၀၁၄
M-Media

– ကမ္ဘာ့ဖလားအုပ်စုပွဲတွင် အီတလီနောက်ခံလူ ချီလီနီအား ကိုက်ခဲ့မှုကြောင့် ဥရုဂွေးတိုက်စစ်မှူး ဆွာရက်ဇ်အား ဘောလုံးကစားခွင့် ၄ လ ပိတ်ပင်ခဲ့ခြင်းမှာ ပြင်းထန်သော်လည်း မှန်ကန်သော လုပ်ရပ်ဖြစ်သည်ဟု ဖီဖာဥက္ကဌ ဆပ်ဘလတ္တာက ပြောကြားခဲ့သည်။

“ဘောလုံးသမားတစ်ယောက်အနေနဲ့ဆိုရင်တော့ ဒီပြစ်ဒဏ်ဟာ အရမ်းပြင်းထန်တယ်လို့ ကျွန်တော်ထင်ပါတယ်။ ဒါပေမယ့် ဖီဖာဥက္ကဌတစ်ဦးအနေနဲ့ဆိုရင်တော့ စည်းကမ်းထိန်းသိမ်းရေး ကော်မရှင်ရဲ့ ဆုံးဖြတ်ချက်ကို ကျွန်တော် လက်ခံရပါမယ်” ဟု ဘလတ္တာက ပြောကြားခဲ့သည်။

လီဗာပူးလ်အသင်းမှ ဘာစီလိုနာသို့ ယူရို ၉၅ သန်းဖြင့် ပြောင်းရွှေ့သွားခဲ့သည့် ဆွာရက်ဇ်မှာ ဘောလုံးကစားခွင့်အပြင် ကွင်းအတွင်းသို့ဝင်ရောက်ခြင်း၊ လေ့ကျင့်ခန်းဆင်းခြင်းနှင့် ဘောလုံးနှင့် သက်ဆိုင်သည့် လှုပ်ရှားမှုအားလုံးကို ၄ လအတွင်း လုံးဝ ဆောင်ရွက်ခွင့်ရမည်မဟုတ်ချေ။

ဘလတ္တာကမူ ဆွာရက်ဇ်အနေဖြင့် ဘောလုံးလောကသို့ ပြန်လည်ဝင်ရောက်လာသည့်အချိန်တွင် ယခင်က ပြသခဲ့သည့် နည်းစနစ်ပိုင်းကျွမ်းကျင်မှု နှင့် ဘောလုံးစွမ်းရည်များကို ပြသနိုင်လိမ့်မည်ဟု ယုံကြည်ကြောင်း ထည့်သွင်းပြောကြားခဲ့သည်။