ဘောလုံးကွင်းအတွင်း ဦးခေါင်း ထိခိုက်မှုနှင့် ပတ်သက်၍ ဖီဖာမှ လေ့လာမှုများပြုလုပ်မည်

သြဂုတ် ၁၅ ၊ ၂၀၁၄
M-Media

– ကမ္ဘာ့ဘောလုံးအဖွဲ့ချုပ် ဖီဖာအနေဖြင့် ဘောလုံးပွဲများတွင် ဦးခေါင်းထိခိုက်မှုများ၊ သတိလစ်မေ့မြော ခဲ့သည့် ဖြစ်စဉ်များနှင့် ပတ်သက်၍ စုံစမ်းလေ့လာမှုများကို ပြုလုပ်နေသည်ဟု သိရသည်။

မကြာမီက ကျင်းပပြီးစီးခဲ့သည့် ကမ္ဘာ့ဖလားပြိုင်ပွဲတွင် ကစားသမားအချို့မှာ ဦးခေါင်း၌ ထိခိုက်မှုများဖြစ်ပွားခဲ့ပြီး သတိလစ်မေ့မြောမှုများ ရှိခဲ့သည်။ ထိုကစားသမားများထဲတွင် မာရှေရာနို၊ အလ်ဗာရို ပီရီရာနှင့် ခရစ္စတို့ဖ် ကရ်မာတို့ကဲ့သို့ ထိပ်တန်း ကစားသမားများလည်း ပါဝင်သည်။

ထိုအဖြစ်အပျက်များကြောင့် ဖီဖာမှာ ဝေဖန်မှုများကို ခံခဲ့ရပြီးနောက် ထိုပြဿနာအတွက် ပိုမိုနားလည်နိုင်ရန် ယခုကဲ့သို့ ဆောင်ရွက်ခြင်းဖြစ်သည်။

“ကာကွယ်တားဆီးရေး ဆောင်ရွက်ခြင်းနဲ့ ဘောလုံးသမားတွေရဲ့ ဦးခေါင်းဒဏ်ရာအတွက် အသင့်လျော်ဆုံး ဆေးဝါးကုသမှုပေးဖို့ အရေးကြီးပါတယ်။ ဒီကိစ္စအတွက် ဖီဖာဟာ ဇူးဇစ်မြို့ ဆေးရုံနှစ်ခုက သုတေသနပညာရှင်တွေနဲ့အတူ ပူးပေါင်ပြီး ပရောဂျက်တစ်ခု ဆောင်ရွက်နေသလို၊ ဦးခေါင်းဒဏ်ရာရသွားတဲ့ ကစားသမားတစ်ဦး အချိန်ဘယ်လောက်ကြာကြာနားပြီး ဘောလုံးကွင်းထဲ ပြန်ဝင်ရမလဲဆိုတာနဲ့ ပတ်သက်ပြီး တိတိကျကျ ဆုံးဖြတ်ဖို့ လိုအပ်တဲ့ ကနဦး ဆောင်ရွက်ချက်တွေကိုလည်း သတ်မှတ်ပြီးပါပြီ” ဟု ဖီဖာမှ ထုတ်ပြန်သော ကြေညာချက်တွင် ဖော်ပြထားသည်။

အဆိုပါ လေ့လာမှုများကို ဖီဖာဆေးအဖွဲ့အကြီးအကဲ ဒေါက်တာ ဂျီရီ ဒီဗိုရက်က ကြီးကြပ်နေပြီး၊ ဦးခေါင်းထိခိုက်သွားသည့် ကစားသမားအနေဖြင့် အနည်းဆုံး ၂၄ နာရီအတွင်း ထိုဒဏ်ရအား စမ်းသပ်စစ်ဆေးကာ သင့်လျော်သော ဆေးကုသမှု ပြုလုပ်ရမည်ဟု ၎င်းက ပြောကြားခဲ့သည်။

ဘောလုံးကစားသမားများ ဦးခေါင်းထိခိုက်ခြင်းနှင့်ပတ်သက်၍ လိုအပ်သော ဆောင်ရွက်မှုများကို ယခုနှစ် ဘောလုံးရာသီမှစတင်ကာ ဆောင်ရွက်သွားမည်ဟု အင်္ဂလန်ဘောလုံးအဖွဲ့ချုပ် FA က ပြီးခဲ့သည် သီတင်းပတ်တွင် ကြေညာခဲ့သည်။