ဆရာကြီး အဲမ်အီဘရာဟင်

စက်တင်ဘာ ၁၅၊ ၂၀၁၄
-ရေးသားပြုစုသူ- ပါမောက္ခ ဒေါက်တာအောင်ဇော်

ဆရာကြီးကို အဘဦးယူစွဖ်၊ အမိ ဒေါ်ဂျမီလာတို့မှ ၁၉၁၀ ခုနှစ်တွင်  မုတ္တမမြို့၊ ဆီဆုံရပ်၌ ဖွားမြင်သည်။ သားချင်း ၇ ဦးအနက် တတိယမြောက် သားဖြစ်သည်။ တိုင်းရင်း မွတ်စလင်များအတွက် စေတနာထားသည့် ဆရာကြီးသည် မော်လမြိုင်မြို့၊ ဒိုင်းဝန်ကွင်း၊ မြို့ပတ်လမ်း၊ အမှတ် ၁၇ တွင် အစ္စလာမ် စာပေဖြန့်ချိရေးဌာန ထူထောင်ပြီး ဘာသာရေးကျမ်း အမျိုးမျိုး၊ စာစောင်အမျိုးမျိုးကို ထုတ်ဝေဖြန့်ချိသည်။ စာပေဖြင့် ထိရောက်စွာ အကျိုးပြုသည့် ပုဂ္ဂိုလ်ကြီးဖြစ်သည်။

ဆရာကြီးသည် အရဗီ၊ ဖာရစီ၊ အူရဒူ၊ မြန်မာဘာသာများ သာမက တိုင်းရင်းမွန်ဘာသာစကားကို လည်း ကျွမ်းသဖြင့် မွန်ပြည်နယ်တွင် မွန် ဘာသာဖြင့် ဟောကြား စည်းရုံးခဲ့သည်။

သာသနာပြု ပုဂ္ဂိုလ်ဆရာကြီးသည် အသက် ၆၉ နှစ် အရွယ်  ၁၉၇၉ ခုနှစ် ဧပြီလ ၄ ရက်နေ့ တွင် အလ္လာဟ်အသျှင့် အမိန့်တော် ခံယူသည်။
ဆရာကြီးပြုစုထုတ်ဝေဖြန့်ချိခဲ့သည့် ကျမ်းအချို့မှာ

–    မွတ်စလင်မ် ဇာနည်မယ်များကျမ်း (ခ၀ါတင်းနေ အစ္စလာမ်) ၁၉၇၉၊
–    မွတ်စလင်မ် ခင်ပွန်းသည်ကျမ်း (မိုဆလ် မန်ခါဝင်ဒ်) ၁၉၅၃၊
–    မွတ်စလင်မ် ဇနီးသည်ကျမ်း
–    အမျိုးသမီးကျမ်း (ခွာတိန်းနေ အစ္စလာမ်)
–    အစ္စလာမ် တရားတော်အရ သဂြိုင်္ဟ်နည်းကျမ်း (ကဖန် ဒဖန်) ၁၉၇၈
–    ဆာလေမိုဘာရစ်က် ခေါ် နှစ်သစ်မင်္ဂလာကျမ်း စသည်တို့ ဖြစ်ပါသည်။ အများစုမှာ ထင်ရှားသော အူရဒူ ကျမ်းရင်းများမှ မြန်မာပြန်ဆိုခြင်း ဖြစ်သည်။

ဘာသာပြန်ကျမ်းများနှင့်မတူ၊ တစ်မူထူးခြားသော ကိုယ်တိုင်ရေး ကျမ်းမှာ ဖေယာမေဗရ်မီ မွတ်စလင်ခေါ် ဗမာမွတ်စလင်များ၏ အနာဂတ် လမ်းစဉ်ကျမ်းဖြစ်သည့်။ ၁၉၇၇ ခုနှစ် သြဂုတ်လက ထုတ်ဝေခဲ့သည်။ ကျမ်းကို အပိုင်းလေးပိုင်းခွဲထားသည်။ ပထမပိုင်းသည် မွတ်စလင်ပီသမှု၊ ဒုတိယပိုင်းသည် ပညာရေးလုံလောက်မှု၊ တတိယပိုင်းသည် စီးပွာရေး အဆင့်မီမှု၊ စတုတ္တပိုင်းသည် အထွေထွေအကြောင်း အရာများ ဖြစ်သည်။

ပထမပိုင်း မွတ်စလင်ပီသမှုတွင် ဘာသာရေးအသွင်ဆောင်နေသော လွဲမှားသည့်ဓလေ့များကို လက်တွေ့ဖြစ်ရပ်များနှင့် သာဓကတင်ထားသည်။ ပြီးမှ ဖရဇ် ၁၃၀ လာ ကိုယ်လက်အင်္ဂါ သန့်ရှင်းမှု၊ နမာဇ်ဝတ်ပြုမှု၊ ဥပုသ်သီလဆောက်တည်မှု၊ ဆင်းရဲသားဒါနကြေးအပါအ၀င် လှူဒါန်းပေးကမ်းမှု၊ ဟဂ်ျဝတ်ပြုမှုနှင့် လက်တွေ့အကျိုးသက်ရောက်မှု၊ ဘ၀ တစ်လျှောက် မွတ်စလင်ပီသစွာ နေထိုင်စားသောက်မှု၊ အမည်ပေး ကင်ပွန်းတပ်မှု၊ ထိမ်းမြားမင်္ဂလာ ဆောင်နှင်းမှု အကြောင်းများကို ရှင်းပြ ထားသည်။

ဒုတိယပိုင်း ပညာရေးလုံလောက်မှုတွင် ပညာဆည်းပူးခြင်း သဘောကိုဖွင့်ဆိုပြီး ခေတ်ပညာ သင်ကြားတတ်မြောက်ရန် အရေးကြီးကြောင်း အကျိုးသင့် အကြောင်းသင့် တင်ပြသည်။

တတိယပိုင်း စီးပွားရေးအဆင့်မီမှုတွင် စိုက်ပျိုးရေး၊ တိရစ္စာန် မွေးမြူရေး၊ ကူးသန်းရောင်းဝယ် ရေး၊ သတ္တုတွင်း တူးဖော်ရေး၊ စက်မှု လက်မှုပညာ ဆည်းပူးရေး၊ စက်မှုလက်မှုလုပ်ငန်းများ ဆောင်ရွက်ရေး တို့ကို အဆင့်ဆင့်ရှင်းပြပြီးမှ မွတ်စလင်မ်များ ချမ်းသာကြွယ်ဝအောင် ကြိုးစားရန် အရေးကြီးကြောင်းတင်ပြ သည်။ အချိန်တိုင်းတွင် မင်္ဂလာရှိ၏ ဟူသော ဆောင်ပုဒ်ဖြင့် ထကြွလုံ့လ၀ီရိယရှိရန် တပ်လှန့်နှိုးဆော် လိုက်သည်။

အထွေထွေ နောက်ဆက်တွဲတွင် အီမာန်ယုံကြည်ချက်ကို ထိခိုက်စေနိုင်သည့် မဆိုင်ရာဝင်ရော မှုများ၊ တမန်တော်နေ့၊ မိဘဆွေမျိုး ညာတကာများကို ပြုရမည့်ဝတ်၊ ရမ်ဇာန်ညနှိုးသော ဂျာဂိုးအဖွဲ့၊ လကြည့် တွက်ချက် စိစစ်ရေး၊ နည်လှည့်အလှူခံအဖွဲ့၊ တဗ်လိဂ်သာသနာ ဖြန့်ချိမှု၊ စစ်မှန်သော ခေါင်းဆောင်မှုများအကြောင်း တင်ပြသည်။

ဆရာကြီးသည် ပြဿနာရပ်တိုင်းကို ကုရ်အာန်၊ ဟဒီးဆ်၊ အထောက်အထားများဖြင့် ဆွေးနွေးတင်ပြသည်။ ယနေ့ နိုင်ငံ တစ်နံ တစ်လျား တွေ့ကြုံခံစားနေ ရသော ပြဿနာများကို ခေတ်အမြင် ခေတ် အတွေးများဖြင့် ဆွေးနွေးခြင်းဖြစ်သည်။ ရှိသင့်သော ခေါင်းဆောင်မှု၊ ခေတ်ပညာ အရေးပါလိုအပ်မှု၊ လကြည့်စိစစ်တွက်ချက်မှု၊ ဘာသာခြားများနှင့် ရင်းနှီးမှုစသည့် သာမန်ဘာသာရေး စာအုပ်များတွင် မမျှော်လင့်နိုင်သည့် ဆရာ၏ သဘောထား ခံယူချက်များကို ပြတ်သားပွင့်လင်းစွာ တွေ့ရှိ ရသည်။ တစ်မူထူးခြားသော ခေတ်မီကျမ်းတစ်ကျမ်းဟု ဆိုနိုင်သည်။

ပစ္စုပ္ပန်သည် တစ်ခဏ၊ တစ်လယနှင့်အမျှ အတိတ်သို့တိုးဝင်နေ သကဲ့သို့ အနာဂတ်သည်လည်း ပစ္စုပ္ပန်သို့ ရွေ့နေပေသည်။ ဆရာ့၏ ၁၉၇၇ ခုနှစ်က တင်ပြသည့် အနာဂတ်လမ်းစဉ်သည် ယခုနှစ်ပေါင်း ၃၀ (မျိုးဆက်တစ်ဆက်) လွန်ပြီးကာလတွင် မည်သည့်အခြေရှိနေသည်ကို ဆင်ခြင်သုံးသပ်ရန် စာရှုသူများ ၏ တာဝန်ဖြစ်ပါသည်။ ဆရာကား တာဝန်ကျေခဲ့ပါပြီ။ သားသမီး ၇ ဦးထွန်းကားသည်။ ဆရာကြီး၏သားကြီး ကထိက ဦးမြတ်သူ(M.Sc) နှင့်သားငယ် အဲမ်ဂျီဗရာအီလ်(M.Sc) တို့သည် ဆရာကြီး မျှော်လင့်သည့်အတိုင်း ပညာရေးတွင် ထွန်းပေါက်ကြပါသည်။

ဆရာကြီးကို စေတနာ ၀ါသနာကို အရင်းခံပြီး စာပေရေးသားဖြန့်ချိမှု လုပ်ငန်းကို ပေါက်မြောက် အောင်မြင်စွာ စွမ်းဆောင်နိုင်သူအဖြစ် မှတ်တမ်း တင်ရမည် ဖြစ်သည်။

** ပါမောက္ခ ဒေါက်တာအောင်ဇော် ရေးသားပြုစုသည့် တိုင်းရင်းမွတ်စလင် စာပြုစာဆို ပုဂ္ဂိုလ်ကျော်များ(၂) စာအုပ်မှ ကူးယူဖော်ပြပါသည်။