မက်ဆီနှင့် ရော်နယ်ဒို ဘယ်သူပိုကောင်းသလဲ ရွေးလို့ မရဟု ဖီဂို ပြော

အောက်တိုဘာ ၁၃ ၊ ၂၀၁၄
M-Media

– ရီးယဲလ်မှ ရော်နယ်ဒိုနှင့် ဘာစီလိုနာမှ မက်ဆီတို့နှစ်ဦးတွင် အကောင်းဆုံး တစ်ဦးကို ရွေးချယ်၍ မရဘဲ ၂ ဦးစလုံး အကောင်းဆုံး ကစားသမားများ ဖြစ်ကြသည်ဟု ကမ္ဘာ့အကောင်းဆုံး ဘောလုံးသမားဟောင်း လူးဝစ်ဖီဂိုက ပြောကြားလိုက်သည်။

ရော်နယ်ဒိုမှာ ယခုရာသီတွင် ၁၁ ပွဲကစား ၁၉ ဂိုးအထိ သွင်းယူပေးထားပြီး၊ မက်ဆီမှာလည်း ဘာစီလိုနာအတွက် ၇ ဂိုး သွင်းပေးထားကာ ၇ ဂိုး ဖန်တီပေးထားသည်။ ထိုကြောင့် ၎င်းတို့နှစ်ဦးတွင် မည်သူက အကောင်းဆုံးဆိုသည်ကို ဖီဂိုအား A Bola အားကစား ဂျာနယ်က မေးမြန်းရာ

“ကမ္ဘာ့အကောင်းဆုံး ဘောလုံးသမားနှစ်ယောက်ကြားထဲမှာ ဒါကို ရွေးချယ်လို့ မရပါဘူး။ ဒါဟာ သိပ်ခက်ပါတယ်။ ဘာ့ကြောင့်လဲဆိုတော့ တစ်ယောက်ကိုရွေးလိုက်တယ်ဆိုရင် နောက်တစ်ယောက်က မကောင်းဘူး ဖြစ်သွားမှာပါ။ ဒါဟာ အမှန်တရားမဟုတ်ပါဘူး။ ဒါ့ကြောင့် ကျွန်တော့်ရွေးဖို့ကို မနှစ်သက်တာပါ။ သူတို့နှစ်ယောက်လုံး ကောင်းကြပါတယ်” ဟု ဖီဂိုက ပြန်လည်ဖြေကြားခဲ့သည်။

အစပထမတွင် ဖီဂိုမှာ ၎င်းတို့နှစ်ဦးထက် မိမိသာလျှင် ကမ္ဘာ့အကောင်းဆုံး ဘောလုံးသမား ဖြစ်သည်ဟု အရွှန်းဖောက် ပြောကြားခဲ့သေးသည်။ ဖီဂိုမှာ ဘာစီလိုနာနှင့် ရီးယဲလ် နှစ်သင်းစလုံးတွင် ကစားခဲ့ဖူးသူလည်း ဖြစ်သည်။

၂၀၁၄ ခုနှစ် ကမ္ဘာ့အကောင်းဆုံးဘောလုံးသမားဆု Ballon d’Or ဆု စကာတင် ကစားသမားများကို ယခုလ ၂၈ ရက်နေ့တွင်ကြေညာမည်ဖြစ်သည်။