ဝက်စ်ဘရွန်းနှင့် သရေကျခဲ့သည့်ပွဲ ခြေစွမ်းမှာ ယခုရာသီ အကောင်းဆုံးခြေစွမ်းဟု ဗန်ဂါးလ်ဆို

အောက်တိုဘာ ၂၁ ၊ ၂၀၁၄
M-Media

– ယနေ့နံနက်က ကစားခဲ့သည့် ၀က်စ်ဘရွန်းအား ၂ ဂိုးစီသရေကျခဲ့သောပွဲတွင် ပြသခဲ့သည့် ခြေစွမ်းမှာ ယခုနှစ်ရာသီ အသင်း၏ အကောင်းဆုံးခြေစွမ်းဖြစ်သည်ဟု မန်ယူနည်းပြ ဗန်ဂါးလ်က ပြောကြားလိုက်သည်။

ထိုပွဲတွင် မန်ယူမှာ ကစားပုံကောင်းခဲ့သော်လည်း အိမ်ရှင်အသင်း၏ ဦးဆောင်မှုကို ၂ ကြိမ်တိုင်တိုင် ချေပခဲ့ရပြီးမှ ၁ မှတ်ရရှိခဲ့ခြင်း ဖြစ်သည်။ ဗန်ဂါးလ်ကမူ ကစားပုံအား ကျေနပ်သော်လည်း ရလဒ်အတွက် စိတ်ပျက်ရသည်ဟု ဆိုသည်။

“ဒီရာသီမှာ အကောင်းဆုံးပုံစံနဲ့ ကစားနိုင်ခဲ့ပေမယ့် ရလဒ် မကောင်းခဲ့တဲ့အတွက် စိတ်ပျက်မိပါတယ်။ အသင်းက အခွင့်အရေးတွေအများကြီး ဖန်တီးနိုင်ခဲ့လို့ ကျွန်တော် ကျေနပ်ပါတယ်။ ၀က်စ်ဘရွန်းကတော့ အခွင့်အရေး နှစ်ကြိမ်မှာ ၂ ဂိုးသွင်းနိုင်ခဲ့ပါတယ်။ တစ်ဦးချင်းအမှားတွေကြောင့် ဒီလိုပေးလိုက်ရတာပါ” ဟု ဗန်ဂါးလ်က ပွဲအပြီးတွင် ပြောကြားခဲ့သည်။

ရာသီအစက ၃-၅-၂ ပုံစံဖြင့် တည်ဆောက်ခဲ့သည့် မန်ယူအသင်းမှာ ယခုပွဲတွင် ၄-၂-၃-၁ ပုံစံဖြင့် ကစားခဲ့ပြီး ဗန်ဂါးလ်ကမူ နည်းစနစ်အသစ်အား ကစားသမားများက ပြောင်းလဲ ကစားနိုင်မည်ဟု ယုံကြည်ကြောင်း ထပ်လောင်းပြောကြားခဲ့သည်။