အနောက် အာဖရိကမှ ပြန်လာသည့် ကျန်းမာရေး ဝန်ထမ်းများကို သီးခြား ခွဲထားမည်ဟု တရုတ်အစိုးရ ပြော

နိုဝင်ဘာ ၄ ၊ ၂၀၁၄
M-Media

– အနောက်အာဖရိကတွင် အီဘိုလာကူးစက်နေသူများအား ကုသပေးခဲ့သည့် ကျန်းမာရေးဝန်ထမ်းများ နိုင်ငံ အတွင်းသို့ ရောက်လာပါက ရောဂါ လက္ခဏာပြနိုင်သောကာလ ကျော်လွန်သည် အထိ သီးခြားခွဲထားမည်ဟု တရုတ်ကျန်းမာရေး ၀န်ကြီးဌာန လက်ထောက်ဒါရိုက်တာ ဟီကွင်ဟာက ပြောကြားလိုက်သည်။

တရုတ်နိုင်ငံသို့ ပြန်လာသည့် ကျန်းမာရေး ၀န်ထမ်းများအနေဖြင့် စောင့်ကြည့်ကာလသို့ ရောက်မီ စစ်ဆေးမှုများကို တင်းတင်းကျပ်ကျပ် ခံယူရမည်ဖြစ်ပြီး၊ နောက်ပိုင်း တွင် ရောဂါလက္ခဏာပြနိုင်သည့်ကာလဖြစ်သော ၂၁ ရက်အထိ သီးသန့်ခွဲထားကာ ကျန်းမာရေးဌာနက စောင့်ကြည့်လေ့လာသွားမည် ဖြစ်သည်။

သို့သော်လည်း အဆိုပါ ကျန်းမာရေး ၀န်ထမ်းများအား အိမ်တွင် သီးသန့်ထားမည်လား၊ သို့မဟုတ် ဆေးရုံများရှိ သီးသန့်အခန်းများတွင် ထားမည်လားဆိုသည်ကို ကွင်ဟာက ပြောကြားခဲ့ခြင်းမရှိဘဲ ရောဂါ လက္ခဏာပြသူများကို အီဘိုလာအတွက် အထူးပြင်ဆင်ထားသော ဆေးရုံများသို့ ပို့ဆောင် သွားမည်ဖြစ်ကြောင်းသာ ပြောကြားခဲ့သည်။

ယခုနှစ်အစောပိုင်းက စတင်ခဲ့သည့် အီဘိုလာ ဗိုင်းရပ်စ်ပိုးပြန့်နှံ့မှုကြောင့် သေဆုံးမှုအရေအတွက်မှာ ၅၀၀၀ နီးပါး ရှိလာပြီဖြစ်ပြီး လက်ရှိကူးစက်နေသူမှာ ၁၃၀၀၀ ကျော်ရှိကြောင်း ကမ္ဘာ့ကျန်းမာရေးအဖွဲ့ WHO က ထုတ်ပြန်ထားပြီး သေဆုံးသူနှင့် ရောဂါကူးစက်ခံရသူ အရေအတွက်မှာ ထိုထက်ပို၍ များပြားနိုင်သည်ဟုလည်း ပြောကြားထားသည်။

တရုတ်နိုင်ငံမှာ အီဘိုလာ ပြန့်နှံ့ရာ ဒေသများသို့ ကျန်းမာရေး ၀န်ထမ်း ၃၀ ကို စေလွှတ်ထားပြီး လာမည့်သီတင်းပတ်များတွင်လည်း ရာနှင့်ချီ၍ စေလွှတ်ရန် စီစဉ်ထားသည်။ ထို့ပြင် လိုက်ဘေးရီးယားနိုင်ငံ၌ ကုတင် ၁၀၀ ဆန့် အီဘိုလာကုသရေးစင်တာ တစ်ခု တည်ဆောက်ရန်အတွက်လည်း တရုတ်ပြည်သူ့လွတ်မြောက်ရေး တပ်မှ တပ်ဖွဲ့ဝင်များကို စေလွှတ်ထားသည်။

ref_ AFP/ir