စီးရီးအေ ထိပ်တန်း ဂိုးသွင်းသူဖြစ်ချင်ဟု ၉ ပွဲ ကစားပြီး ၁ ဂိုးသာသွင်းသေးသည့် တောရက်စ်ဖွင့်ဟ

နိုဝင်ဘာ ၂၅ ၊ ၂၀၁၄
M-Media

– မိမိအနေဖြင့် ရာသီအကုန်တွင် စီးရီးအေ၏ ထိပ်တန်း ဂိုးသွင်းရှင် ဖြစ်ချင်ပြီး အသင်းမှာလည်း ဥရောပ ထိပ်တန်းအသင်း တစ်သင်း ဖြစ်လာမည်ဟု အေစီမီလန် တိုက်စစ်မှူး ဖာနန်ဒိုတောရက်စ်က ပြောကြားလိုက်သည်။

ချယ်ဆီးမှ အငှားဖြင့် သြဂုတ်လတွင် အေစီမီလန်သို့ ရောက်ရှိလာသည့် တောရက်စ်မှာ ချယ်ဆီး၌ ကစားသကဲ့သို့ပင် ရုန်းကန်နေရပြီး အသင်းနှင့် ၉ ပွဲကစားကာ ၁ ဂိုးသာ သွင်းယူပေးထားနိုင်သည်။

သို့သော်လည်း ၎င်းကမူ အသင်းအတွက် ပိုမိုကြီးမားသော ကူညီမှုမျိုးကို ဆောင်ရွက်မည်ဟု ပြောကြားခဲ့ပြီး အသင်း၏ ဂိုးသွင်းခွင့် ဖန်တီးမှုအတွက် မစိုးရိမ်ဟုလည်း ဆိုသည်။

“တကယ်လို့ ပွဲဟာ ဂိုးမရှိ သရေကျတယ်ဆိုပေမယ့် ကျွန်တော်တို့ အခွင့်အရေး ငါးကြိမ်လောက် ဖန်တီးနိုင်ခဲ့ပါတယ်။ ဒါဟာ ကောင်းမွန်တဲ့ လက္ခဏာပါပဲ။ ကျွန်တော်တို့ ဂိုးသွင်းခွင့် ဖန်တီးသင့်တာထက် ပိုမိုနည်းပါးစွာ ဖန်တီးနိုင်ခဲ့တဲ့ပွဲတွေဟာ နည်းနည်းပဲရှိပါတယ်။ ဒါပေမယ့် အခုအချိန်ဟာ ရှေ့ဆက်ဖို့ ကျွန်တော်တို့အပေါ် မူတည်နေတဲ့အချိန်ပါပဲ” ဟု တောရက်စ်က Gazzetta dello Sport သတင်းစာသို့ ပြောကြားခဲ့သည်။

ယခုလက်ရှိတွင် စီးရီးအေ ဂိုးအများဆုံးသွင်းထားသူများမှာ ကားလို့စ်တီဗက်ဇ်နှင့် ဂျိုဆေး ကဲလီဂျွန်တို့ဖြစ်ပြီး ၇ ဂိုးစီ အသီးသီး သွင်းယူထားသည်။