ပါလက်စတိုင်းအား အချုပ်အခြာ အာဏာပိုင်နိုင်ငံ အဖြစ် ပြင်သစ် အသိအမှတ်ပြုတော့မည်

နိုဝင်ဘာ ၂၉ ၊ ၂၀၁၄
M-Media

– အစ္စရေးနှင့် ပါလက်စတိုင်းအကြား ရှေ့မတိုးသာ နောက်မဆုတ်သာ အခြေအနေကို ကျော်ဖြတ်ရန် နိုင်ငံတကာ၏ အားထုတ်မှု မအောင်မြင်ပါက ပါလက်စတိုင်းအား အချုပ်အခြာအာဏာပိုင် နိုင်ငံအဖြစ် အသိအမှတ်ပြုတော့မည်ဟု ပြင်သစ်နိုင်ငံက သတိပေး ပြောကြားလိုက်သည်။

`ဆွေးနွေးညှိနှိုင်းတဲ့ အဖြေတစ်ခုရရှိဖို့ ဒီနောက်ဆုံးကြိုးစားမှု မအောင်မြင်ရင်တော့ ပါလက်စတိုင်းကို နိုင်ငံတစ်နိုင်ငံအဖြစ် အသိအမှတ်ပြုဖို့ ပြင်သစ်က လုပ်ရတော့မှာပါ။ ကျွန်တော်တို့ အဆင်သင့်ပါပဲ´ ဟု ပြင်သစ်နိုင်ငံခြားရေးဝန်ကြီး လောရင့် ဖာဘီယက်စ်က ယမန်နေ့တွင် ပါလီမန်၌ ပြောကြားခဲ့သည်။

အရှေ့အလယ်ပိုင်းငြိမ်းချမ်ရေးလုပ်ငန်းစဉ် ချိနဲ့လာမှုနှင့်ပတ်သက်၍ ဥရောပနိုင်ငံများက စိတ်ပျက်နေပြီး ပြင်သစ်ပါလီမန်အမတ်များကလည်း ပါလက်စတိုင်းအား အချုပ်အခြာအာဏာပိုင် နိုင်ငံတစ်ခုအဖြစ် အသိအမှတ်ပြုရန် အစိုးရအား တိုက်တွန်းရေး အဆိုပြုနေချိန်တွင် နိုင်ငံခြားရေးဝန်ကြီးက ထိုကဲ့သို့ ပြောကြားခဲ့ခြင်းဖြစ်သည်။

အာဏာရ ဆိုရှယ်လစ်ပါတီမှ တင်သွင်းသည့် အဆိုပါ အဆိုပြုချက်ကို နိုဝင်ဘာ ၂၈ ရက်နေ့တွင် ဆွေးနွေးခဲ့ကြပြီး လာမည့် ဒီဇင်ဘာ ၂ ရက်နေ့တွင် ပါလီမန်၌ အတည်ပြုရန်ရှိနေသည်။

ထိုအဆိုပြုချက်တွင် အစ္စရေး-ပါလက်စတိုင်း ပြဿနာအတွက် ပြီးပြတ်သည့် အဖြေတစ်ခုရရှိရန် လက်နက်တစ်ခုအဖြစ် ပါလက်စတိုင်းအား အချုပ်အခြာအာဏာပိုင်နိုင်ငံအဖြစ် အစိုးရက အသိအမှတ်ပြုရန် တိုက်တွန်းထားသည်။

ဗြိတိန် လွှတ်တော်အမတ်များကလည်း ထိုကဲ့သို့ အဆိုပြုချက်ကို ဆွေးနွေးခဲ့ကြပြီး အောက်တိုဘာ ၁၃ ရက်နေ့တွင် လက်ခံအတည်ပြုခဲ့သည်။ စပိန်လွှတ်တော်အမတ်များမှာ နိုဝင်ဘာ ၁၈ ရက်နေ့တွင်လည်းကောင်း ဆွီဒင်နိုင်ငံက အောက်တိုဘာ ၃၀ ရက်နေ့တွင်လည်းကောင်း ပါလက်စတိုင်းအား လွတ်လပ်သော အချုပ်အခြာအာဏာပိုင် နိုင်ငံအဖြစ် လက်ခံရန် အဆိုပြုချက်ကို အသီးသီး အတည်ပြုခဲ့ကြသည်။

Agencies