အီဂျစ်စွန့်စား သွားလာသူတစ်ဦး တောင်ဝင်ရိုစွန်းသို့ ရောက်ရှိ

ဇန်န၀ါရီ ၂၊ ၂၀၁၅
M-Media

– ကမ္ဘာ့အမြင့်ဆုံး တောင် ၇ လုံးကို အောင်မြင်စွာ တက်ရောက်နိုင်ခဲ့သည့် အီဂျစ်နိုင်ငံမှ စွန့်စားသွားလာသူတစ်ဦးမှာ ယခုတစ်ပတ်အတွင်း တောင်ဝင်ရိုးစွန်းသို့ အောင်မြင်စွာ ရောက်ရှိခဲ့သည်ဟု သိရသည်။

အိုမာ ဆမ်ရာဟုခေါ်သည့် အဆိုပါ အီဂျစ်နိုင်ငံသားမှာ ကမ္ဘာ့ အအေးဆုံး၊ လေအထန်ဆုံးနှင့် အခြောက်သွေ့ဆုံး တောင်ဝင် ရိုးစွန်းကို ရောက်ရှိရန်အတွက် အန်တာတိကတိုက်တွင် ၁၁၁ ကီလိုမီတာ အကွာအဝေးကို ခက်ခဲစွာ ကျော်ဖြတ်ခဲ့ရသည်။

ဂျာမနီ၊ ရုရှားနှင့် အိန္ဒိယနိုင်ငံတို့မှာ အဖွဲ့ဝင် ၁၁ ဦးပါသည့် ဆမ်ရာတို့အဖွဲ့မှာ နေ့စဉ် ၉ နာရီခန့် နှင်းလျှောစီးကာ ခရီးသွားခဲ့ရပြီး ရာသီဥတုအခြေအနေကိုလိုက်၍ တစ်နေ့လျှင် ၁၄ ကီလိုမီတာမှ ၁၆ ကီလိုမီတာအထိ ခရီးတွင်ခဲ့ဟု ဆိုသည်။

ဆမ်ရာမှာ တောင်ဝင်ရိုးစွန်းသို့ ပြီးခဲ့သည့် တနင်္လာနေ့က ရောက်ရှိခဲ့ခြင်းဖြစ်ပြီး တစ်ရက်အကြာ အင်္ဂါနေ့တွင် ၎င်း၏ အောင်မြင်မှုကို ဆိုရှယ်မီဒီယာများ၌ ရေးသားဖော်ပြခဲ့သည်။

`နှစ်သစ်ရောက်ဖို့ နီးကပ်နေတဲ့အချိန်မှာ ရရှိခဲ့တဲ့ ဒီအောင်မြင်မှုနဲ့အတူ ၂၀၁၅ ခုနှစ်ဟာ အီဂျစ်နိုင်ငံနဲ့ အိပ်မက်တွေကို အကောင်အထည်ဖော်ချင်ကြတဲ့ လူတိုင်းအတွက် ကောင်းမွန်တဲ့ နှစ်တစ်နှစ် ဖြစ်လာလိမ့်မယ်လို့ ကျွန်တော်မျှော်လင့်ပါတယ်´ ဟု ဆမ်ရာက ၎င်း၏ အောင်မြင်မှုကို ဖွင့်ဟခဲ့သည်။

ထို့ပြင် ၎င်းအနေဖြင့် အစာအိမ်ရောဂါပြင် အချို့သောအခက်အခဲများကို ကြုံတွေ့ခဲ့ရသော်လည်း မိမိ၏ သက်လုံကို ထိန်းကာ အောင်မြင်အောင် ဆောင်ရွက်နိုင်ခဲ့ကြောင်း ထည့်သွင်းဖော်ပြခဲ့သည်။

တိုက်ကြီး ၇ တိုက်မှ ကမ္ဘာ့အမြင့်ဆုံး တောင် ၇ လုံးကို တက်ရောက်နိုင်ခဲ့သည့် ဆမ်ရာမှာ `စွန့်စားသွားလာမှု ဂရင်စလင်းပြိုင်ပွဲ´ အား အောင်မြင်ရန် အတွက် လက်ရှိတွင် မြောက်ဝင်ရိုးစွန်းကိုသာ သွားရောက်ရန် ကျန်ရှိနေပြီး ၎င်းကလည်း ၂၀၁၅ ခုနှစ် ဧပြီလတွင် မြောက်ဝင်ရိုစွန်းသို့ သွားရောက်မည်ဟု ပြောကြားခဲ့သည်။

ယခုနှစ်မှာ အာရပ်စွန့်စားသွားလာသူများ အောင်မြင်သည့် နှစ်တစ်နှစ်ဖြစ်ပြီး ပြီခဲ့သည့်မေလကလည်း ဆော်ဒီအာရေဗျမှ အသက် ၂၅ နှစ်အရွယ် အမျိုးသမီး ရာဟာမိုဟာရက်မှာ ကမ္ဘာ့အမြင့်ဆုံး ဧ၀ရက်တောင်ကို တက်ရောက်နိုင်ခဲ့သည်။

ထိုသို့ တက်ရောက်နိုင်ခဲ့ခြင်းကြောင့် မိုဟာရက်မှာ ဧ၀ရက်တောင်ထိပ်ကို ရောက်ရှိသည့်ဆော်ဒီအာရေဗျ၏ ပထမဆုံးအမျိုးသမီး ဖြစ်လာခဲ့ပြီး အာရပ်များထဲမှ အသက်အငယ်ဆုံး ဧ၀ရက်တောင်ရောက် အမျိုးသမီးလည်း ဖြစ်သည်။

Source : alarabiya

ပုံ ၁ – တောင်ဝင်ရိုးစွန်းသို့ ရောက်ခဲ့သည့် အိုမာဆမ်ရာ
ပုံ ၂ – ဧ၀ရက်တောင်ကိုတက်ခဲ့သူ ဆော်ဒီအာရေဗျမှ ရာဟာ မိုဟာရက်