အာဖဂန်တာလီဘန်နှင့် အမေရိကန်တို့ ကာတာတွင် တွေ့ဆုံဆွေးနွေးမည်

ဖေဖော်ဝါရီ ၁၉၊ ၂၀၁၅
M-Media

– အာဖဂန်ငြိမ်းချမ်းရေးအတွက် တာလီဘန်ကိုယ်စားလှယ်များနှင့် အမေရိကန်တာဝန်ရှိသူတို့၏ ပထမအကျော့ ငြိမ်းချမ်းရေး ဆွေးနွေးပွဲကို ကာတာနိုင်ငံ၌ ယနေ့တွင် ကျင်းပပြုလုပ်မည်ဟု သိရသည်။

၂၀၀၁ ခုနှစ်က စတင်ခဲ့သည့် အမေရိကန်တို့၏ ကျူးကျော်စစ် အဆုံးသတ်ရန် ယခင်က တာလီဘန်နှင့် အမေရိကန်တို့အကြား ညှိနှိုင်းဆွေးနွေးမှုများ ပြုလုပ်ခဲ့သော်လည်း အရာမထင်ခဲ့ပေ။ သို့သော်လည်း ယခုနောက်ဆုံး ပေါ်ထွက်လာသည့် ကြိုးပမ်းမှုမှာ ငြိမ်းချမ်းရေးကို ဆောင်ရွက်နေသည့် အာဖဂန်သမ္မတသစ် အရှက်ရက်ဖ် ဂါနီအတွက် မျှော်လင့်ချက်များ မြင့်မားလာခြင်းလည်းဖြစ်သည်။

“ဒီပထမအကျော့ ဆွေးနွေးပွဲဟာ ဒီနေ့ (ဖေဖော်ဝါရီ ၁၉ ရက်နေ့) ကာတာမှာ ပြုလုပ်သွားမှာဖြစ်ပြီး ဒုတိယအကျော့ကိုတော့ သောကြာနေ့မှာ ပြုလုပ်သွားမှာပါ။ အဖြေမထွက်ခင် ဆွေးနွေးပွဲမှာ ဘာတွေဖြစ်မလဲဆိုတာကိုတော့ ကျွန်တော်တို့ စောင့်ကြည့်ရပါမယ်” ဟု အာဖဂန် တာလီဘန်အဖွဲ့မှ အကြီးတန်းအဖွဲ့ဝင်တစ်ဦးက Reuters သတင်းဌာနသို့ ပြောကြားခဲ့သည်။

တာလီဘန်များအား စေ့စပ်ဆွေးနွေးရေး စားပွဲဝိုင်းသို့ ခေါ်ဆောင်နိုင်ခြင်းမှာ ဆယ်စုနှစ်တစ်ခုကျော်ကြာ ကြာမြင့်ခဲ့သည့် စစ်ပွဲအား သံတမန်နည်းလမ်းအရ ဖြေရှင်းရန် အခက်အခဲတစ်ခုကို ကျော်ဖြတ်နိုင်ခြင်းလည်း ဖြစ်သည်။

ပါကစ္စတန်စစ်ဘက်မှ တာဝန်ရှိသူတစ်ဦးကလည်း ပါကစ္စတန်ရှိ တာလီဘန်များမှာ မတ်လအစောပိုင်းတွင် တွေ့ဆုံဆွေးနွေးမှုများ စတင်ရန် ဆန္ဒရှိနေသည်ဟု ယနေ့နံနက်ပိုင်းက ပြောကြားခဲ့သည်။ သို့သော်လည်း ဆွေးနွေးပွဲပြုလုပ်မည့် ရက်အတိအကျကိုမူ ထုတ်ဖော်ပြောဆိုခဲ့ခြင်း မရှိပေ။

Ref: aljazeera