ဘာကာ၏ လက်ရှိခြေစွမ်းနှင့် ဖလားမရပါက အဓိပ္ပါယ်မရှိဟု ပီကေးပြော

ဧပြီ ၁၆၊ ၂၀၁၅

M-Media

– ယခုနှစ်ရာသီတွင် ခြေစွမ်းကောင်းများ ပြသနေသည့် မိမိတို့အသင်း ဆုဖလားတစ်ခုခု မရရှိပါက အဓိပ္ပါယ်ရှိမည်မဟုတ်ဟု ဘာစီလိုနာ နောက်ခံလူ ပီကေးက ပြောကြားလိုက်သည်။

ယနေ့နံနက်က ပဲရစ်တွင်ကစားခဲ့သည့် ချန်ပီယံလိဂ် ကွာတားဖိုင်နယ် ပထမအကျော့တွင် ဘာကာမှာ အိမ်ရှင်ပီအက်စ်ဂျီအား ၃ ဂိုး ၁ ဂိုးဖြင့် ပြတ်ပြတ်သားသား အနိုင်ရခဲ့ပြီး ဆီမီးဖိုင်နယ်သို့ တက်ရောက်ရန် အလားအလာကောင်းနေသည်။ ထို့ပြင် လာလီဂါတွင်လည်း ထိပ်ဆုံး၌ရှိနေပြီး စပိန်ဘုရင့်ဖလားတွင်လည်း ဘီလ်ဘာအိုအသင်းနှင့် တွေ့ဆုံရမည်ဖြစ်သည်။

ယမန်နှစ်က ဖလားလက်မဲ့ဖြစ်ခဲ့သည့် ဘာကာမှာ ယခုနှစ်တွင် ပို၍ တိုးတက်လာခဲ့ပြီး ပီကေးကမူ မိမိတို့၏ တောင့်တင်းသော ယခုခြေစွမ်းဖြင့် ဖလားတစ်လုံးလုံး မရခဲ့လျှင် အဓိပ္ပါယ်ရှိမည်မဟုတ်ဟု ဆိုသည်။

“ရာသီကုန်မှာ ကျွန်တော်တို့ဟာ ဖလားတစ်လုံးမှ မရဘူးဆိုရင် ဒါဟာ ဘာမှ အဓိပ္ပါယ်မရှိပါဘူး။ လုပ်စရာတွေတော့ အများကြီး ရှိတုန်းပါ။ ပြီးတော့ ရာသီပြီးဖို့လည်း လိုပါသေးတယ်။ ပဲရစ်ကိုလာပြီး နိုင်ပွဲယူရတာ ကျွန်တော်တို့အတွက် ရင်ဖိုလှိုက်မောစေပါတယ်။ အုပ်စုအဆင့် ကျွန်တော်တို့ ဒီမှာ ၃ ဂိုး ၂ ဂိုးနဲ့ ရှုံးခဲ့တယ်။ ဒီညမှာတော့ မတူညီတာတွေ ဖြစ်ခဲ့ပါတယ်။ ဒါပေမယ့် ဒါဟာ အဆုံးအဖြတ်တော့ မဟုတ်သေးပါဘူး” ဟု ပီကေးက ပွဲအပြီးတွင် ပြောကြားခဲ့သည်။

ဘာစီလိုနာမှာ ယခုနှစ် ချန်ပီယံလိဂ် ဆီးမီးဖိုင်နယ်သို့ တက်ရောက်နိုင်ပါက နောက်ဆုံး ၈ နှစ်အတွင်း ၇ ကြိမ်မြောက် တက်ရောက်နိုင်ခြင်း ဖြစ်မည်ဖြစ်သည်။ ပီကေးကမူ မိမိတို့ ယခုနှစ်အတွင်း ရရှိခဲ့သည့် ရလဒ်များအတွက် အလွန် ယုံကြည်မှုရှိနေပြီး မတူညီသော ပြိုင်ပွဲ ၃ ခုတွင် အခွင့်အရေးများ ရရန် ခက်ခဲသည်ကိုလည်း သိရှိထားကြောင်း ထည့်သွင်းပြောကြားခဲ့သည်။

Ref: Goal.com