နှစ်သစ်မှာ အတွေးသစ် အမြင်သစ်များအပေါ် လောင်းရိပ် မမိုးမိကြဖို့

ဧပြီ ၂၀ ၊ ၂၀၁၅
M-Media
သက်ဝေနှင်းရေးသည်။

.
အခုဆိုရင် မြန်မာတို့ရဲ့ နှစ်သစ်ကိုကူးလူးရောက်ရှိခဲ့ပါပြီ။ နှစ်ဟောင်းမှ အညစ်အကြေးများကို ရေလောင်းဆေးကြောဖြစ်ခဲ့ကြပေပြီ။

ယခုနှစ်ပြီးခဲ့လေသော သင်္ကြန်ပွဲတော်တွင် ချစ်ကြည်ရင်းနှီးခြင်း ပေါင်းစည်းခြင်းများစွာဖြင့် ဆင်နွဲကြသည်ကိုလည်း တွေ့ရှိခဲ့ကြပေပြီ။ ဟုတ်သည် သင်္ကြန်ကားများအပေါ်တွင် ကြည့်မည်လား။ သို့တည်းမဟုတ် သင်္ကြန်မဏ္ဍပ်များတွင် ကြည့်မည်လား။ ဘာသာခြားများ၊ အသွေးအရောင်မတူသူများ၊ နိုင်ငံခြားဧည့်သည်များနှင့် မြန်မာပြည်သူပြည်သားများ ဒိုးတူဘောင်ဖက် လည်ပတ်နေကြသည်။ ရေပက်ခံနေကြသည်။ ရေပက် ကစားနေကြလေသည်။

ဤသို့ မတူခြားနားမှုများ အတူယှဉ်တွဲကာပေါင်းစည်းပျော်ရွှင်မှုသည် မြန်မာပြည်ကြီး၏ ငြိမ်းချမ်းခြင်း ပျော်ရွှင်သာယာခြင်း နမိတ်ပုံတစ်ခုပင် ဖြစ်ပေသည်။

ယခုတိုးတက်၍ခေတ်မှီပြီး လွတ်လပ်ပွင့်လင်းလာသော ဒီမိုကရေစီခေတ်ကြီးတွင် လူတိုင်းလူတိုင်းသည် လွတ်လပ်စွာတွေးခေါ်မှု၊ လွတ်လပ်ပွင့်လင်းစွာ ဆုံးဖြတ်စီရင်နိုင်မှု၊ လူတစ်ဦးချင်းစီ အခွင့်အရေးများကို မည်သည့်အုပ်ချုပ်သူ၊ မည်သည့်လူ့အဖွဲ့အစည်းများမှ ချုပ်ကိုင်ထားခွင့် ချုပ်ကိုင်ပိုင်ဆိုးထားခြင်းမရှိတော့ပေ။ လူသားတို့၏ ကိုယ်ပိုင်ဥာဏ်ရည်ဥာဏ်သွေး ပွင့်လင်းမြင့်မားလာခြင်း၏ အခြေခံသဘောသည်လည်း ကိုယ်တိုင်ဆုံးဖြတ်ပိုင်ခွင့်နှင့် လွတ်လပ်စွာ စူးစမ်းလေ့လာနိုင်ခွင့်တို့ အပေါ်တွင်လည်း မူတည်ပေသည်။ ချုပ်ခြယ်မှုများ တားမြစ်ပိတ်ပင်မှုများ၊ ကန့်သတ်ခွဲခြားမှုများဆိုသည်မှာလည်း နည်းမှန်လမ်းမှန်ဖြစ်ရန်များစွာ အရေးကြီးလှပေသည်။

ယနေ့ခေတ်တွင် လူငယ်များတက်သစ်စ မျိုးဆက်သစ်များ အကြားတွင် ကန့်သတ်ချုပ်ခြယ်မှုများ ခွဲခြား ပိုင်းဖြတ်မှုများ နည်းပါးလာသည်ကို တွေ့ရှိကြရမည် ဖြစ်ပေသည်။ ယနေ့လူငယ်များသည် နောင်တစ်ချိန်တွင် လူကြီးဖြစ်လာသောအခါတွင် ခွဲခြားမှုမရှိသော အတွေးအခေါ်အသစ်၊ အယူအဆအသစ်များ အားစွဲကိုင်လျှက် လမ်းသစ်ဖောက်မည့် အနာဂတ်ကြယ်များပင်ဖြစ်၏။

ထို့ကြောင့် ယနေ့လူကြီးဖြစ်နေကြသည့် လူကြီးများသည် နောင်တွင်လူကြီးဖြစ်လာမည့် လူငယ်များအပေါ်တွင် နားလည်မှုများစွာထားရှိ၍ လူငယ်များ၏အတွေးအခေါ်အသစ် အယူအဆအသစ်၊ လမ်းစဉ်အသစ်များနှင့် ပတ်သတ်၍ ကန့်ကွက်ခြင်း၊ ရှုတ်ချခြင်း၊ တားမြစ်ခြင်းများ ပြုလုပ်မည့်အစား ထိုက်သင့်သလောက်လက်ခံပေးနိုင်ကြမည်ဆိုပါမှ ငြိမ်းချမ်းသာယာသော ပေါင်းစည်းမှုအသင်းများ လူသားတို့အကြားတွင် ပေါက်ဖွား ရှင်သန်ပေလိမ့်မည်။ လူငယ်များ၏စိတ်၊ ဦးနှောက်၊ အတွေးအခေါ်၊ အယူအဆများအပေါ်တွင် မည်သည့်လောင်းရိပ်ကိုမျှ မအုပ်စိုးမိစေရန် သတိချပ်ဖို့သာလိုအပ်လှပေသည်။

သက်ဝေနှင်း