ဘာစီလိုနာမှာ လက်ဖျားခါလောက်သည်ဟု အန်ဆယ်လော့တီပြော

မေ ၃၊ ၂၀၁၅
M-Media

– စနေနေ့က ကော်ဒိုဘာအသင်းအား ၈ ဂိုးပြတ်ဖြင့် အနိုင်ရခဲ့သည့် ဘာစီလိုနာအသင်းမှာ လက်ဖျားခါလောက်သည်ဟု ပြိုင်ဘက် ရီးယဲလ်မက်ဒရစ်နည်းပြ အန်ဆယ်လော့တီက ပြောကြားလိုက်သည်။

ဘာစီလိုနာမှာ ဆွာရက်ဇ်၊ မက်ဆီနှင့် နေးမာတို့၏ ဂိုးများဖြင့် အနိုင်ရရှိချိန်တွင် ရီးယဲလ်မှာ ဆီးဗီးလားအသင်းအား ခက်ခက်ခဲခဲကစားခဲ့ရပြီး ရော်နယ်ဒို၏ ဟက်ထရစ်ကြောင့် ၃ ဂိုး ၂ ဂိုးဖြင့် အနိုင်ရခဲ့သည်။

“ဘာစီလိုနာဟာ လက်ဖျားခါလောက်တဲ့အသင်းပါ။ သူတို့ရဲ့ တိုက်စစ်မှူးတွေက သိပ်ပြီး ထိရောက်ပါတယ်။ သူတို့အားလုံး ကောင်းကြတယ်။ သူတို့ ဒီလို ဂိုးအများကြီးသွင်းနိုင်တာ မထူးဆန်းပါဘူး” ဟု အန်ဆယ်လော့တီက ဆီးဗီးလားနှင့်ပွဲအပြီးတွင် ပြောကြားခဲ့သည်။

ဘာစီလိုနာ၏ ထိုနိုင်ပွဲကြောင့် ကော်ဒိုဘာမှာ တန်းဆင်းသွားပြီဖြစ်ပြီး၊ ဇယားထိပ်တွင်မူ ဘာစီလိုနာက ရီးယဲလ်အား ၂ မှတ်ဖြတ်ကာ ဦးဆောင်နေသည်။ အန်ဆယ်လော့တီကမူ ဆီးဗီးလားအသင်းအား အနိုင်ရရှိသည့်အတွက် ကျေနပ်မိသည်ဟုဆိုကာ ချန်ပီယံလိဂ်နှင့်ပတ်သက်၍လည်း ပြောကြားခဲ့သည်။

“သိပ်အရေးပါတဲ့နိုင်ပွဲပါ။ ဒီနိုင်ပွဲဟာ လာလီဂါကို ဆွတ်ခူးနိုင်နေတုန်းပဲဆိုတဲ့ အဓိပ္ပါယ်ပါပဲ။ ပြီးတော့ အင်္ဂါနေ့ တူရင်မှာကစားမယ့် ဂျူဗင်တပ်စ်နဲ့ ချန်ပီယံလိဂ် ဆီးမီးဖိုင်နယ်အတွက်လည်း ယုံကြည်မှုရှိစေပါတယ်။ အခုအချိန်က ကျွန်တော်တို့ အမှတ်ဆုံးရှုံးသွားတဲ့အချိန်ကို ပြန်ကြည့်တဲ့အချိန် မဟုတ်ပါဘူး။ ရာသီကုန်သွားရင် ကျွန်တော်တို့ ဆန်းစစ်သွားမှာပါ”

Ref: Goal