မြင်နေရသည်ကို စိတ်မချမ်းသာသည့်အတွက် ရှူးမိတ်ကာ၏ ပိုင်ဆိုင်မှုအချို့ကို ဇနီးဖြစ်သူ ရောင်းချ

မေ ၉၊ ၂၀၁၅
M-Media

– ၂၀၁၃ ခုနှစ်က မတော်တဆဖြစ်ရင်း ဦးနှောက်ထိခိုက်ကာ သတိပြန်မလည်လာသေးတဲ့ ကမ္ဘာ့ ပြိုင်ကားမောင်းချန်ပီယံဟောင်း ဂျာမန်နိုင်ငံသား မိုက်ကယ် ရှူးမိတ်ကာတစ်ယောက် အပြည့်အ၀ ပြန်ကောင်းလာမှာ မဟုတ်ဘူးဆိုတဲ့သတင်း ထွက်ပေါ်လာပြီးတဲ့ နောက်ပိုင်းမှာတော့ ရှူးမိတ်ကာရဲ့ ဇနီးဖြစ်သူက ပေါင် ၂၅ သန်းတန် ဂျက်လေယာဉ်နဲ့ နွေရာသီ အပန်းဖြေအိမ်တို့ကို ရောင်းချလိုက်ပါတယ်။

ရှူးမိတ်ကာဟာ ၂၀၁၃ ခုနှစ် ဒီဇင်ဘာလက ပြင်သစ်နိုင်ငံ အဲလ်ပ်စ်တောင်တန်းမှာ ရေခဲပြင်စကိတ်စီးရင်း မတော်တဆ ပြုတ်ကျခဲ့ပြီးနောက် ခေါင်းကို ထိသွားခဲ့တာပါ။ အဲဒီအချိန်ကစပြီး သတိပြန်မလည်လာတော့ပဲ ဆေးကုသမှုခံနေရပြီး နီးစပ်သူတွေကတော့ ရှူးမိတ်ကာကို ကုသမှုမှာ တိုးတက်မှု နည်းနည်းပဲရှိတယ်လို့ ဆိုပါတယ်။

ဇနီးဖြစ်သူ ကိုရင်နာက ရှူးမိတ်ကာရဲ့ ပေါင်း သန်း ၅၀၀ လောက်တန်ဖိုးရှိတဲ့ စီးပွားရေးတွေကို ဦးဆောင်လုပ်ကိုင်နေသူ ဖြစ်ပါတယ်။ ဂျက်လေယာဉ်နဲ့ နော်ဝေက အပန်းဖြေအိမ်ကို ရောင်းရတဲ့ အကြောင်းအရင်းကတော့ ရှူးမိတ်ကာတစ်ယောက် သူ့ရဲ့ ဂျက်လေယာဉ်ကို ဘယ်တော့မှ ပြန်စီးနိုင်တော့မှာမဟုတ်ဘဲ အပန်းဖြေအိမ်ကိုလည်း ဘယ်တော့မှ ပြန်သွားနိုင်တော့မှာ မဟုတ်တာကြောင့် ဒါတွေကို မြင်နေရတာဟာ စိတ်မချမ်းသာစေတဲ့အတွက် ဖြစ်တယ်လို့ ဂျာမန်မဂ္ဂဇင်း Bunte က ရေးသားဖော်ပြခဲ့ပါတယ်။

နောက်ပြီး ရှူးမိတ်ကာမတော်တဆဖြစ်ခဲ့ရာ နေရာက သူပိုင်တဲ့ သစ်သားအပန်းဖြေအိမ်ကိုလည်း ရေားင်းချဖို့ ကိုရင်နာက စီစဉ်နေပါတယ်။

ဆရာဝန်တွေက ရှူးမိတ်ကာဟာ အနည်းငယ်ပဲ ပြောင်းလဲမှုရှိပြီး ကျန်တဲ့သက်တမ်းတစ်လျှောက်လုံးမှာ လှုပ်ရှားနိုင်တော့မှာ မဟုတ်သလို၊ စကားလည်း ပြောနိုင်တော့မှာ မဟုတ်ဘူးလို့ မကြာသေးခင်က ပြောကြားခဲ့ပါတယ်။

အခုလက်ရှိမှာတော့ ရှူးမိတ်ကာကို ဆွဇ်လန်က နေအိမ်မှာ ဆရာဝန်အဖွဲ့၊ သူနာပြုတွေ၊ နားလည်တတ်ကျွမ်းသူတွေနဲ့ ပြုစုကုသနေပါတယ်။

Ref: Mirror