နိုင်ငံတကာသတင်းတို (ဇွန် ၃၊ ၂၀၁၅)

ဇွန် ၃၊ ၂၀၁၅
M-Media

MERS ဗိုင်းရပ်စ်ကြောင့် တောင်ကိုရီးယားတွင် ကျောင်းများ ပိတ်ပစ်
………………………………
ပြီးခဲ့သည့် သီတင်းပတ်အနည်းငယ်အတွင်း ကူးစက်ပြန့်နှံ့လာခဲ့သည့် MERS ဗိုင်းရပ်စ်ပိုးကြောင့် တောင်ကိုရီးယားရှိ စာသင်ကျောင်းပေါင်း ၂၀၀ ကျော်ကို ပိတ်ပစ်ခဲ့သည်ဟု ပညာရေးဝန်ကြီးဌာနက ယနေ့တွင် ပြောကြားခဲ့သည်။ ကျောင်းသားများ ကျောင်းမတက်ဟု ဆရာများက ပြောကြားခဲ့ပြီးနောက် ယခုကဲ့သို့ ကျောင်းပိတ်ခဲ့ခြင်းဖြစ်ပြီး MERS ဗိုင်းရပ်စ်ပိုးကြောင့်
လက်ရှိချိန်အထိ တောင်ကိုရီးယားတွင် လူ ၂ ဦး သေဆုံးခဲ့ပြီဖြစ်ကာ ရာနှင့်ချီ၍ စောင့်ကြည့်ခံနေရသည်။

မဟာမိတ်များ၏ တိုက်ခိုက်မှုအတွင်း IS တစ်သောင်းကျော် သေဆုံး
……………………………..
အမေရိကန်ဦးဆောင်ပြီး မဟာမိတ်အာရပ်နိုင်ငံများပါဝင်သည့် ၉ လကြာ IS ဆန့်ကျင်ရေး တိုက်ခိုက်မှုအတွင်း IS တပ်ဖွဲ့ဝင် တစ်သောင်းကျော်ကို သုတ်သင်နိုင်ခဲ့သည်ဟု အမေရိကန် လက်ထောက်နိုင်ငံခြားရေးဝန်ကြီး အန်တိုနီ ဘလင်ကန်က ယနေ့တွင်ပြောကြားခဲ့သည်။

တရုတ်သင်္ဘောမှောက်မှု ၄၀၀ ကျော် ပျောက်ဆုံးနေဆဲ
……………………………..
တရုတ်နိုင်ငံ ယန်ဇီမြစ်အတွင်း မုန်တိုင်းတိုက်ခတ်နေချိန် တနင်္လာနေ့ညပိုင်းက နစ်မြုပ်သွားခဲ့သည့် ဇိမ်ခံသင်္ဘောမှ လက်ရှိအချိအထိ အနည်းဆုံး အလောင်း ၁၉ လောင်းကို ရှာဖွေတွေ့ရှိထားပြီး လူပေါင်း ၄၀၀ ကျော်မှာ ဆက်လက်ပျောက်ဆုံးနေဆဲဖြစ်သည်။ အဆိုပါ သင်္ဘောမှောက်မှုမှာ နှစ်ပေါင်း ၇၀ အတွင်း တရုတ်နိုင်ငံ၏ အဆိုးရွားဆုံး ရေကြောင်း ဖြစ်ရပ်ဆိုးကြီးလည်း ဖြစ်သည်။

ရီးယဲလ်နည်းပြသစ်အဖြစ် ဘင်နီတက်ဇ်အား ခန့်အပ်
………………………
ရီးယဲလ်မက်ဒရစ်အသင်းက ၎င်းတို့၏ လစ်လပ်နေသော နည်းပြနေရာအတွက် နာပိုလီနည်းပြဟောင်း ရာဖာ ဘင်နီတက်ဇ်အား ယနေ့တွင် ၃ နှစ်စာချုပ်ဖြင့် တရားဝင်ခန့်အပ်ခဲ့သည်။ ရီးယဲလ် (ခ) အသင်းကို နည်းပြခဲ့ဖူးသည့် ဘင်နီတက်ဇ်မှာ အိမ်ပြန်လာခြင်းဖြစ်သည်ဟု ရီးယဲလ်ဥက္ကဌ ဖလော်ရန်တီနို ပီရက်ဇ်က ပြောကြားခဲ့သည်။ “အိမ်ပြန်လာရတာ စိတ်လှုပ်ရှားစရာပါပဲ။
ဘာပြောရမှန်းမသိပါဘူး။ ကျွန်တော်တို့ ဖလားတွေရပြီး အသင်းကောင်းကောင်းကစားအောင် ကျွန်တော် ဆောင်ရွက်ပေးချင်ပါတယ်” ဟု ဘင်နီတက်ဇ်က မျက်ရည်ဖြိုင်ဖြိုင်ကျ၍ ပြောကြားခဲ့သည်။

Ref: News Agencies