ဆူဒန်သမ္မတအား ICC သို့ လွှဲပေးရန်အတွက် တောင်အာဖရိက စဉ်းစားနေ

ဇွန် ၁၅၊ ၂၀၁၅
M-Media

– နိုင်ငံအတွင်း တနင်္လာနေ့အထိ ဆက်ရှိနေရန်အတွက် ဆူဒန်သမ္မတ အိုမာရ် အလ်-ဘရှီးရ်အား တောင်အာဖရိက တရားရုံးချုပ်မှ အမိန့်ပေးလိုက်ပြိး နိုင်ငံတကာ ရာဇ၀တ်ခုံရုံး ICC သို့ ပို့ဆောင်ရမည်လားဆိုသည်ကို မိမိတို့က ဆုံးဖြတ်သွားမည်ဟု ပြောကြားလိုက်သည်။

ဘရှီးရ်မှာ ဒါဖာရ်ဒေသ၌ လက်နက်ကိုင်ဆန္ဒပြသူများကို နှိမ်နင်းရာတွင် စစ်ရာဇ၀တ်မှု ကျူးလွန်သည်ဟု စွပ်စွဲခံထားရသူဖြစ်ပြီး ICC က ၎င်းအား ၂၀၀၉ ခုနှစ်ကတည်းက ဖမ်းဝရမ်းထုတ်ထားခဲ့ခြင်း ဖြစ်သည်။

ယမန်နေ့က ကျင်းပပြုလုပ်ခဲ့သည့် အာဖရိကသမဂ္ဂ ထိပ်သီးအစည်းအဝေးပွဲသို့ တက်ရောက်ရန်အတွက် ဘရှီးရ်မှာ စနေနေ့က ဂျိုဟန်နစ္စဘတ်သို့ ရောက်ရှိလာခဲ့ပြီးနောက် တရားရုံးချုပ်က ထိုကဲ့သို့ အမိန့်ပေးခဲ့ခြင်းဖြစ်ပြီး၊ တရားသူကြီးကမူ ဘရှီးရ်အား ကြိုဆိုရန် ကက်ဘိနတ်အဖွဲ့၏ ဆုံးဖြတ်ချက်က ICC ဖမ်းဝရမ်းကို လှည့်စားခြင်းလားဆိုသည်ကို ဆုံးဖြတ်သွားမည်ဟု ဆိုသည်။

တောင်အာဖရိကနိုင်ငံမှာ ICC ၏ အဖွဲ့ဝင်နိုင်ငံတစ်ခုဖြစ်ပြီး ကိုယ်ပိုင်တပ်ဖွဲ့မရှိသည့် ICC အနေဖြင့် တရားခံများကို ဖမ်းဆီးရရှိရေးမှာ အဖွဲ့ဝင်နိုင်ငံများ၏ သဘောထားအပေါ် မူတည်နေသည်။

ထိုကဲ့သို့ ၀ရမ်းထုတ်ခံခဲ့ရပြီးနောက် ဘရှီးရ်မှာ ICC အဖွဲ့ဝင်မဟုတ်သည့် နိုင်ငံများနှင့် အဖွဲ့ဝင်နိုင်ငံဖြစ်သော်လည်း ဖမ်းဆီးမပေးဟု ကြေညာခဲ့သည့် နိုင်ငံများကိုသာ သွားရောက်ခဲ့သည်။

နယူးယောက်အခြေစိုက် လူ့အခွင့်အရေးစောင့်ကြည့်အဖွဲ့၏ ခေတ္တ တရားရေးဒါရိုက်တာဖြစ်သူ အီလီစီ ကက်ပလာက တောင်အာဖရိကအနေဖြင့် ဘရှီးရ်အား ဖမ်းဆီးမပေးပါက ဆိုးရွားသည့် ရာဇ၀တ်မှုများအတွက် တရားမျှတမှု ဆောင်ကျဉ်းပေးရေးနှင့် ပတ်သက်သည့် တောင်အာဖရိက၏ ဂုဏ်သိက္ခာမှာ အစွန်းအထင်းဖြစ်သွားမည်ဟု ပြောကြားခဲ့သည်။

Ref: Aljazeera