ပျော်ဘွယ်မှ ဗလီခိုးဆောက်မှု သတင်းမှာ အစွန်းရောက်များ၏ လိမ်ညာ ဝါဒဖြန့်သည့် သတင်းအမှားသာဖြစ်

ဇွန် ၂၅ ၊ ၂၀၁၅
M-Media
သတင်း-ဖြိုးသူရ

သတင်းအမှားများကို ပုံစံ အမျိုးမျိုး ဖြင့် လှုံ့ဆော်ရေးသားခဲ့မှုများ

လွန်ခဲ့တဲ့ ရက်သတ္တပတ်များ အတွင်း မန္တလေးတိုင်း၊ပျော်ဘွယ်မြို့ ပြည်သာယာ ကွက်သစ်တွင် ဗလီခိုးဆောက်နေသည့်ဟူ၍ လည်းကောင်း၊ အာရဗီ တက္ကသိုလ်ကို ခွင့်ပြုမိန့် မရှိဘဲ တိုးချဲ့နေကြောင်း၊ ၄င်းအဆောက်အအုံများမှာ ခွင့်ပြုချက် မရှိဘဲ ဖွင့်လှစ်ထားတာဖြစ်ကြောင်း၊ မက္ကာပြန် ၊ OIC စသည့် အသုံးအနှုန်းများဖြင့် တန်ဆာဆင် ရေးသားထားသည့် ပိုစ်များ ဆိုရှယ်မီဒီယာမှာ ပြန့်နှံ့လာတာကို တွေ့ရပါတယ်။ အဆိုပါ ပိုစ်များ ဖြန့်ဝေသည့် FB အကောင့်များမှာ မ.ဘ.သ အမည်နှင့် အကောင့်များ၊ အမျိုးသားရေးသမား လှုပ်ရှားသူများဟု ဆိုကာ အစ္စလာမ်ဆန့်ကျင်ရေး လုပ်ဆောင်နေသည့် FB အကောင့်များဖြစ်သည်ကို တွေ့ရှိရပါတယ်။
ညွှန်း- [https://goo.gl/yjiPev] [https://goo.gl/ebvVCa]
.
အဆိုပါ သတင်းနှင့် ပတ်သက်ပြီး သတင်းဖြစ်စဉ် အမှန်ကို သိရှိရဖို့ အတွက် M-Media မှ စုံစမ်းခဲ့ပါတယ်။ စုံစမ်း သိရှိခဲ့သမျှမှာ
.
ပျော်ဘွယ်မြို့နယ်တွင် ဆံပင်ရောင်းဝယ်ရေး လုပ်ငန်းလုပ်ကိုင်သော (တရုတ်နွယ် မွတ်စလင်မ် ) ပန်းသေး မိသားစုသည် ပျော်ဘွယ်မြို့မှ မန္တလေးဘက် အထွက် ရွာတစ်ရွာတွင် ခြံတစ်ခြံ ဝယ်ယူခဲ့ပါတယ်။ ရောင်းသူ ဝယ်သူနှစ်ဦး သဘောတူ ရောင်းဝယ်ပြီးကာမှ ခြံရောင်းသူ (ဗုဒ္ဓဘာသာဝင်) ကိုယ်တိုင်ကပင် ရွာဘုန်းတော်ကြီးကို ထိုခြံတွင် မွတ်စလင်မ်များ လာရောက်နေထိုင် လုပ်ကိုင်ကြမှာဖြစ်ကြောင်း ပြဿနာ ရှာတိုင်ကြားသည့် ပုံစံမျိုးဖြင့် သွားရောက် လျှောက်ထားခဲ့ကြောင်း သိရပါတယ်။
.
၎င်းမိသားစုမှ အဆိုပါရွာမှ ပျော်ဘွယ်မြို့ ပြည်သာယာ ရပ်ကွက်သို့ နေရာပြောင်း မြေကွက် တစ်ကွက် ဝယ်ယူခဲ့ကြောင်း၊ ပန်းသေး မိသားစုမှ ဝယ်ယူထားသည့် မြေကွက်တွင် အိမ်အဆောက်အဦး ဆောက်လုပ်ခဲ့ကြောင်း၊ ယင်းသို့ဆောက်လုပ်ရာတွင် သံပန်း တပ်ဆင်ရန်အတွက် သံပန်း လုပ်ငန်းဆောင်ရွက်သူ နှစ်ဦး(ဗုဒ္ဓဘာသာဝင်များ)ထံသို့ ဆက်သွယ်စုံစမ်းခဲ့ပြီး တစ်ဦးအား ရွေးချယ် လုပ်ငန်းအပ်နှံခဲ့ကြောင်း၊ လုပ်ငန်း အပ်နှံခြင်း မခံရသည့် သံပန်း လုပ်ငန်းဆောင်ရွက်သူမှ ရွေးချယ် မခံရခြင်းအပေါ် မကျေနပ်ဖြစ်ကာ မြို့နယ် ၉၆၉ အမာခံများနှင့် ဆက်သွယ်ခဲ့ကြောင်း၊ ထိုသူတို့သည် ထိုမိသားစု၏ ဆောက်လုပ်နေသည့် အိမ်အဆောက်အဦး ထုထည်ကြီးမားသည့် အပေါ် ‘အာရဗီတက္ကသိုလ် ဆောက်လုပ်နေသည် ဗလီဝတ်ကျောင်းဆောက် လုပ်နေသည်’ ဟု ယိုးစွပ်ကာ ပြဿနာရှာခဲ့ကြပါတယ်။
.
ထို့ကြောင့် အာရဗီကျောင်း ဗလီဝတ်ကျောင်းဆောက်လုပ်ခြင်း မဟုတ်ကြောင်း ဖြေရှင်းခဲ့သည့်အခါ ထိုယိုးစွပ်မှုဖြင့် ပြဿနာရှာ၍ မရနိုင်တော့ကြောင်း၊ ပန်းသေးမိသားစုသည် အဆိုပါခြံနှင့် အိမ်အဆောက်အဦး ဆောက်လုပ်ရာတွင် သက်ဆိုင်ရာတို့နှင့် နားလည်မှုယူကာ စည်ပင်အား အဆောက်အဦး ပုံစံတင်ထားသည်ထက် ပေပို ဆောက်လုပ်မှုများ လုပ်ခြင်း ရှိခဲ့ကြောင်း သိရပါတယ်။ မကျေနပ်သေးသော ၉၆၉ အမာခံနှင့် သံပန်းလုပ်ငန်းရှင်တို့သည် ပထမ ယိုးစွပ်ပြဿနာရှာမှု မအောင်မြင်သဖြင့် ပေကျော်ဆောက်လုပ်မှုကို အစဆွဲ ဖော်ထုတ် တိုင်ကြားခဲ့ကြပါတယ်။
.
၎င်းတိုင်ကြားမှုအပေါ် အရေးယူဆောင်ရွက်ခြင်း အဖြစ် သက်ဆိုင်ရာမှ ပေကျော်ဆောက်လုပ်နေသည့် အဆောက်အဦးများကို ပြန်လည် ဖျက်ပေးရန် အမိန့်ထုတ်ပြန် အရေးယူခဲ့ခြင်းဖြစ်ပါတယ်။ လူမှုကွန်ရက် မီဒီယာများတွင် ပြန့်နှံ့နေသကဲ့သို့ ပန်းသေး မိသားစု၏ ထောက်ပံ့မှုဖြင့် အရဗီ တက္ကသိုလ်နှင့် ဗလီဝတ်ကျောင်း တရားမဝင်ဆောက်လုပ်ခြင်း လုံးဝမဟုတ်ကြောင်း၊ အိမ်အဆောက်အဦး ဆောက်လုပ်ခြင်းသာဖြစ်ပြီး လုပ်ငန်း မရခြင်းအပေါ် အညှိုးထားပြဿနာရှာခြင်းနှင့် ပေကျော်ဆောက် လုပ်ခြင်းကြောင့် ကျော်သည့် အပိုင်းကို ပြန်ဖျက်ပေးရန် ဖျက်မိန့်ချခြင်းသာဖြစ်ကြောင်း ပျော်ဘွယ်မြို့ခံတစ်ဦးမှ အောက်ပါအတိုင်း ရှင်းပြခဲ့ပါတယ်။
.
“ပန်းသေးတွေက မန္တလေးအထွက်နားက ရွာမှ အရင် ခြံဝယ်တယ်။ ရောင်းတဲ့သူက ဗုဒ္ဓဘာသာဝင်။ အဲ့ဒီသူ ကိုယ်တိုင်ကပဲ ငွေချေပြီး ငွေယူပြီးကာမှ ရွာဘုန်းကြီးကို သွားလျှောက်တယ်။ မွတ်စလင်မ်တွေ လာနေတော့မယ် ဘာနဲ့ပေါ့။ ကြည်ဖြူရောင်းဝယ်ကြပြီးမှ ငွေယူပြီးမှ သက်သက်ညစ်တာပေါ့။ အဲ့ဒါနဲ့ သူတို့လည်း ရှုပ်တယ် ပြဿနာဖြစ်တယ်ဆိုပြီး ပြည်သာယာထဲ မှာ ပြောင်းဝယ်တယ်။ အိမ်က ဆောက်တာ တော်တော်ကြီးတယ်။ သံပန်းလုပ်ဖို့ နှစ်ယောက်ကို ဈေးဆိုင်တယ်။ တစ်ယောက်ကို ရွေးလိုက်တယ်။ နှစ်ယောက်လုံးက ဗုဒ္ဓဘာသာပဲ။ လုပ်ငန်းမရတဲ့ တစ်ယောက်က မကျေနပ်ဘဲ ၉၆၉တွေနဲ့ပေါင်းပြီး ပြဿနာရှာတယ်။ အဆောက်အဦးက ထုထည်ကြီးတော့ အရဗီကျောင်းခိုးဆောက်တယ်၊ ဗလီခိုးဆောက်တယ် ဆိုပြီး ပြဿနာလုပ်တယ်။ ဟုတ်မှ မဟုတ်တာ၊ အိမ်ဆောက်တာကိုး။ အဲ့တော့ မဟုတ်ကြောင်းရှင်းတော့ မကျေနပ်ကြဘူး။ အဲ့ဒီစွဲချက်နဲ့လည်း ပြဿနာဆက်ရှာလို့ မရတော့ဘူး။  မရရအောင် ပြဿနာလုပ်မယ်ဆိုပြီး ပေပိုဆောက်တာကို အစစွဲပြီး ပြဿနာလုပ်ကြတာ။ အဲ့ဒီမိသားစုကလည်း နားလည်မှုယူထားပြီး ပေပိုဆောက်ထားတယ်။ အဲ့တော့ သက်ဆိုင်ရာက ပေပိုဆောက်နေတာတွေ အားလုံးပြန်ဖျက်ပေးဖို့ အမိန့်ချတယ်။ ဒါပါပဲ။”
.
၂၀၁၂ နှစ်လယ်ပိုင်းလောက်မှ စတင်ကာ တစ်နိုင်ငံလုံးအတိုင်းအတာဖြင့် အစ္စလာမ်ဘာသာနှင့် နိုင်ငံသား မြန်မာမွတ်စလင်မ်တို့ အပေါ် တစ်ဖက်သတ် မုန်းတီးရေးဖြန့်ချီခြင်းများ အရှိန်အဟုန်နဲ့ လုပ်ဆောင်ခဲ့မှုများကို အာဏာပိုင် အစိုးရက ထိရောက်စွာ အရေးယူ ဆောင်ရွက်ခြင်း မရှိပေ။ ပျော်ဘွယ်မြို့တွင်လည်း ၉၆၉ လှုပ်ရှားမှုများရှိနေပြီး မြို့ခံမွတ်စလင်မ်များကို ပြဿနာရှာလိုမှု အချို့ရှိနေသော်လည်း ငြိမ်းချမ်းမှု လိုလားသူ ဘာသာပေါင်းစုံ မြို့ခံ အများစုကြီးမှာ အေးချမ်းသင့်မြတ်စွာဖြင့် သွားလာလုပ်ကိုင်နေကြကြောင်း စုံစမ်းသိရှိရပါတယ်။
.
ပျော်ဘွယ်မြို့ပေါ်တွင် ဗလီဝတ်ကျောင်းတော် ၈ ခုရှိပြီး တစ်မြို့လုံးတွင် မွတ်စလင်မ်ဦးရေ သောင်းကျော်ရှိကြောင်း သိရှိရပါတယ်။