နိုင်ငံတကာ သတင်းတို (ဇူလိုင် ၁၂၊ ၂၀၁၅)

ဇူလိုင် ၁၂၊ ၂၀၁၅
M-Media

စပိန်ခွဲထွက်ရေး စစ်သွေးကြွနှစ်ဦးကို ဖမ်းဆီး စစ်ဆေးနေ
………………………….
စပိန်ခွဲထွက်ရေး စစ်သွေးကြွအဖွဲ့ ETA မှ အကြီးတန်းအဖွဲ့ဝင်နှစ်ဦးကို အင်္ဂါနေ့က ပြင်သစ်နိုင်ငံ အနောက်တောင်ပိုင်းတွင် ဖမ်းဆီးခဲ့ပြီးနောက် စုံစမ်းစစ်ဆေးမှုများ ပြုလုပ်နေသည်ဟု Reuters သတင်းဌာနက ယနေ့တွင် ဖော်ပြထားသည်။ ၎င်းတို့ ၂ ဦးမှာ စပိန်အစိုးရ၏ အလိုချင်ဆုံး ETA အဖွဲ့ဝင်များလည်း ဖြစ်သည်။ ETA အဖွဲ့က ၎င်းတို့မှာ အကြမ်းဖက်တိုက်ခိုက်မှုများ မပြုလုပ်တော့ဟု ၂၀၁၁ ခုနှစ်က ကြေညာခဲ့သော်လည်း အဖွဲ့ဝင်များမှာ ပြန်လည်၍ လက်နက်ကိုင်ဆောင်မှုများ ပြုလုပ်နေသည်။

တရုတ် တရားရုံးချုပ်၏ တရားသူကြီးတစ်ဦး ချစားမှုဖြင့် စစ်ဆေးခံနေရ
………………………….
တရုတ်တရားရုံးချုပ်မှ ဒုတိယဥက္ကဌဖြစ်သော ဇီ ဇီယိုမင်းမှာ ချစားမှုနှင့် ပတ်သက်၍ စုံစမ်းစစ်ဆေးမှုကို ခံနေရသည်ဟု တရုတ်အစိုးရ၏ ချစားမှုတိုက်ဖျက်ရေးအဖွဲ့က ယနေ့တွင်ထုတ်ပြန်သော ကြေညာချက်အကျဉ်းချုပ်တွင် ဖော်ပြထားသည်။ သို့သော်လည်း ၎င်းအား ရာထူးမှ ထုတ်ပယ်ခဲ့လား၊ သို့မဟုတ် ဖယ်ရှားခဲ့လားဆိုသည်ကို ထည့်သွင်းဖော်ပြထားခြင်း မရှိပေ။ ဇီ ဇီယိုမင်းမှာ တရုတ် တရားရေးတာဝန်ရှိသူများထဲမှ ချစားမှုနှင့် ပတ်သက်၍ စုံစမ်းစစ်ဆေးမှုကို ခံရသော အကြီးဆုံးပုဂ္ဂိုလ် ဖြစ်လာခဲ့သည်။

မက္ကဆီကို နာမည်ကြီး မူးယစ်ရာဇာတစ်ဦး အကျဉ်းထောင်မှ ထွက်ပြေးလွတ်မြောက်
………………………………..
အမည်ဆိုးဖြင့်ကျော်ကြားသည့် မက္ကဆီကို မူးယစ်ရာဇာ ဂျိုအာကွင်း အလ် ချာပို ဂူဇ်မန်မှာ မက္ကဆီကိုစီးတီး အပြင်ဘက်ရှိ လုံခြုံရေးအဆင့်မြင့် အကျဉ်းထောင်မှ ဒုတိယအကြိမ် လွတ်မြောက်သွားခဲ့သည်ဟု မက္ကစီကို လုံခြုံရေးကော်မရှင်၏ ပြောကြားမှုကို ကိုးကား၍ AP သတင်းဌာနက ယနေ့တွင် ဖော်ပြခဲ့သည်။ စီနာလိုအာ မူးယစ်ဂိုဏ်း၏ ခေါင်းဆောင်ဖြစ်သော ဂူဇ်မန်ကို ထောင်၏ ရေချိုးခန်းတွင် နောက်ဆုံး တွေ့ခဲ့ရခြင်းဖြစ်ပြီး ရှာဖွေမှုများကို လုပ်ဆောင်နေကာ ပြည်တွင်းလေဆိပ်တစ်ခုကိုလည်း ပိတ်ထားလိုက်သည်။ ဂူဇ်မန်မှာ ၂၀၁၄ ခုနှစ် ဖေဖော်ဝါရီလက ထောင်ဒဏ်ကျခံခဲ့ရခြင်းဖြစ်သည်။

Ref: News Agencies