ပရော်ဖက်ရှယ်နယ်ကစားသမား ဖြစ်လာမည်ဟု လုံးဝမထင်ခဲ့ကြောင်း ရော်နယ်ဒိုပြော

သြဂုတ် ၂၊ ၂၀၁၅
M-Media

– မိမိအနေဖြင့် ဘောလုံး စကစားခဲ့ခြင်းမှာ ပျော်ရွှင်မှုအတွက်ဖြစ်ပြီး ယနေ့ကဲ့သို့ ပရော်ဖက်ရှင်နယ် ကစားသမားတစ်ယောက် ဖြစ်လာလိမ့်မည်ဟု လုံးဝ မထင်ထားခဲ့ကြောင်း ရီးယဲလ်တိုက်စစ်မှူး ခရစ္စတီယာနို ရော်နယ်ဒိုက ၀န်ခံပြောကြားလိုက်သည်။

ရော်နယ်ဒိုမှာ ၎င်းမွေးဖွားကြီးပြင်းရာ မာဒီရာကျွန်းရှိ အန်ဒိုရင်ဟာမြို့တွင် ၎င်း၏ လူငယ်ဘောလုံးသမားဘ၀ကို စတင် လေ့ကျင့်ခဲ့ခြင်းဖြစ်ပြီး ၎င်းတွင် ဘောလုံးပါရမီရှိကြောင်း မစဉ်းစားခဲ့မိပေ။

“ကျွန်တော့်ရဲ့မိသားစုမှာ အားလုံးက ဘောလုံးကို ချစ်မြတ်နိုးပါတယ်။ တစ်နေ့ ကျွန်တော် လမ်းပေါ်မှာ ဘောလုံးကစားနေတုန်း အဖေက “ငါအလုပ်သွားတုန်း မင်းဘာဖြစ်လို့ ကလပ်အသင်းတစ်ခုမှာ သွားမကျင့်တာတုန်း” လို့ ပြောတာကို ကျွန်တော် မှတ်မိပါသေးတယ်။ ကျွန်တော်က “ဟုတ်ကဲ့။ ဘာ့ကြောင့် မသွားရမှာလဲ” လို့ ပြန်ဖြေခဲ့ပြီး အဲဒီမှာ စပြီး ကစားတော့တာပါပဲ” ဟု ရော်နယ်ဒိုက
Herbalife သို့ ပြောကြားခဲ့သည်။

“နေ့တိုင်း ကျွန်တော် လေ့ကျင့်ဖို့သွားခဲ့ပြီး အသင်းမှာ ပါဝင်ရတာကို ကျွန်တော် ပျော်လာခဲ့ပါတယ်။ ကျွန်တော့်အတွက် အဖေက အမြဲတမ်းရှိနေခဲ့တာပါ”

ထို့ပြင် ရော်နယ်ဒိုက မိမိမှာ အခြားကလေးများထက် ထူးခြားနေသည်ကို ခံစားခဲ့ရပြီး ဖရော်ဖက်ရှင်နယ် ကစားသမားဖြစ်ကာ မန်ယူ၊ ရီးယဲလ်နှင့် စပို့တင်းတို့သို့ ပြောင်းရွှေ့ရလိမ့်မည်ဟု လုံးဝ ထင်မထားခဲ့ကြောင်း၊ ထိုစဉ်က မိမိအနေဖြင့် ပျော်ရွှင်မှုအတွက်သာ ကစားခဲ့ခြင်းဖြစ်ပြီး ပါရမီရှိသည်ဟု မထင်ခဲ့ကြောင်း ၎င်းက ထပ်လောင်းပြောကြားခဲ့သည်။

သို့သော်လည်း နှစ်အနည်းငယ်ကြာ လေ့ကျင့်မှုများ ပြုလုပ်ခဲ့ပြီးနောက် ထိပ်တန်းအဆင့်တွင် ကစားရန် စဉ်းစားခဲ့သည်ဟု ရော်နယ်ဒိုက ၀န်ခံခဲ့သည်။

“၃၊ ၄ နှစ်လောက်နောက်ပိုင်းမှာ “ငါ အဲဒီအဆင့်မှာ ကစားချင်တယ်” လို့ စပြီး အတွေးဝင်လာပါတယ်။ ပွဲတွေအားလုံးကို ကျွန်တော်ကြည့်ခဲ့ပြီး အဲဒီအသင်းတွေရဲ့ ဂျာစီတွေကိုဝတ်ဖို့ စိတ်ကူးယဉ်ခဲ့ပါတယ်”

Ref: Goal