ကျွန်မရင်ထဲက ဆန္ဒလေးတစ်ခု

(ကျွန်မအတွက် အဓိပ္ပါယ်ရှိတဲ့ အမှတ်တရနေ့တစ်နေ့ သို့မဟုတ် ၆၅-နှစ်မြောက် အာဇာနည်နေ့)

 ဇူလိုင်၊ ၁၉ ရက်၊ ၂၀၁၂

မန္တလေး၊

အာဇာနည်နေ့အထိမ်းအမှတ် – ကံတက်ကုန်းဘုန်းကြီးကျောင်း

ကျွန်မအတွက်အဓိပ္ပါယ်ရှိတဲ့နေ့များစွာရှိတဲ့အနက် ၆၅-နှစ်မြောက် အာဇာနည်နေ့လည်း နေ့တစ်နေ့အဖြစ် တိုးဝင်လာခဲ့ပြန်တယ်။

အာဇာနည်နေ့အထိမ်းအမှတ်အခန်းအနားတွေကို ဟိုးငယ်ငယ်ကသာ လက်တွေ့မြင်သိခွင့်ရပြီး နောက်ပိုင်း လက်တွေ့မြင်တွေ့ခွင့်မရတော့တာ နှစ် ၂၀-ကျော်တိုင်အောင် ကြာခဲ့ပြီလေ။

အခု ၆၅-နှစ်မြောက် အာဇာနည်နေ့မှာတော့ ဟိုးအရင်က အာဇာနည်နေ့အထိမ်းအမှတ်ပြုလုပ်ကြသလိုမြင်ကွင်းမျိုးထိ မရောက်ခဲ့ပေမယ့် ပြီးခဲ့တဲ့ နှစ် ၂၀-ကျော်အတွင်း ကွယ်ပျောက်နေတဲ့ အငွေ့အသက်လေးတချို့ကို ပြန်မြင်လိုက်ရတယ်။

အာဇာနည်နေ့အထိမ်းအမှတ်အခန်းအနားတွေကို သက်ဆိုင်ရာ လုပ်နိုင်ရာ တစ်ပိုင်တစ်နိုင်လေးတွေ လုပ်လာကြတာတွေ့ရတယ်။

အာဇာနည်နေ့အထိမ်းအမှတ် – ကံတက်ကုန်းဘုန်းကြီးကျောင်း

ကျွန်မ မနေ့က ကံတက်ကုန်းဘုန်းတော်ကြီးကျောင်းမှာပြုလုပ်တဲ့ အာဇာနည်နေ့အခမ်းအနားကိုမြင်တွေ့ရတာလည်း ကြည်နူးခဲ့ရပါတယ်။ ကံတက်ကုန်းဘုန်းတော်ကြီးကျောင်းက သူငယ်တန်းကနေ အဌမတန်းအထိ ကလေးတွေဟာ အာဇာနည်ပုဂ္ဂိုလ်တစ်ဦးချင်းရဲ့ဓါတ်ပုံလေးတွေ ချိတ်ဆွဲထားတဲ့ ပန်းခွေတွေကိုင်ဆောင်ပြီး အောင်ပင်လယ်တ၀ိုက် စည်းကမ်းရှိရှိ လှည့်လည်ပြီး ကျောင်းဝင်းထဲပြန်ဝင်လာတဲ့ မြင်ကွင်းလေးရယ် လွမ်းသူတွေပန်းခွေတွေချိတ်ဆွဲကြတဲ့မြင်ကွင်းလေးရယ်က ကျွန်မကို မျက်ရည်ဝဲလာစေခဲ့ပါတယ်။ အဲလိုမြင်ကွင်းမျိုး မမြင်ခဲ့ရတာ အလွန်ကို ကြာညောင်းခဲ့ပြီလေ။

အဲဒီကနေတဆင့် မန္တလေးတိုင်းဒေသကြီးက ဦးစီးကျင်းပတဲ့ အာဇာနည်နေ့အထိမ်းအမှတ် ဆွမ်းကပ် အလှူဒါနပြုပွဲ ပြုလုပ်တဲ့ မြို့တော်ခန်းမဆီ ကျွန်မရောက်ခဲ့ပြန်တယ်။ အဲဒီမှာပဲ ၀ါဆိုဆရာတော်ကြီးက တရားတော်ဟောကြားနေစဉ်မှာပဲ မြို့တော်ခန်းမရှေ့က သြဥဆွဲသံရယ်၊ ကားတွေ ဟွန်းတီးသံတွေရယ်ကို ကြားလိုက်ရစဉ် နာရီကိုကြည့်မိလိုက်တော့ ၁၀-နာရီ ၃၇-မိနစ်မှာ လက်တံလေးတွေက ပြနေတယ်။ ပရိသတ်အားလုံးလည်း တရားနာနေကြတော့ သြဥဆွဲသံတောင် ကြားမိလိုက်ရဲ့လားလို့တွေးမိတယ်။ ဘယ်သူမှတော့ အလေးမပြုလိုက်ကြတော့ဘူးပေါ့။

နေ့ခင်းပိုင်းမှာတော့ ကီးမားတင်ဝင်း ခန်းမမှာ ပြုလုပ်တဲ့ အာဇာနည်ကျေးဇူးအောက်မေ့ဖွယ် အခမ်းအနားကို ရောက်ပြန်တော့လည်း ကျေနပ်မိပါတယ်။ တက်ရောက် လာကြသူအားလုံးက တစ်မိနစ်ငြိမ်သက်ပြီး ကျဆုံးလေပြီးတဲ့ အာဇာနည် ၉-ဦးကို အလေးပြုခဲ့ကြပါတယ်။

အသီးသီးပြောကြားသွားကြတဲ့ပုဂ္ဂိုလ်တွေရဲ့ ပြောကြားချက်တွေကိုလည်း အားရမိတယ်။ မြ၀တီဆရာတော်ကြီးေ ပြောကြားသွားတဲ့  ညီညွတ်ရေးတရား၊ ဦးဘုန်း(ဓါတု)ရဲ့ မာန် အပြည့်နဲ့ပြောကြားသွားတွေကို နားထောင်ရပြီးနောက် ဗိုလ်ချုပ်အောင်ဆန်းသီချင်းဆိုရင်း နိဂုံးချုပ်မှာ ဗိုလ်ချုပ်မိန့်ခွန်းကို မာန်အပြည့်ပြောသွားတာ နားထောင်ရင်း ကြက်သီးတောင် ထမိပါရဲ့။

ဒါပေမယ့် ကျွန်မရင်ထဲက ဆန္ဒလေးတစ်ခုတော့ ရှိလာခဲ့တယ်။ မန္တလေးတစ်မြို့လုံးအတိုင်းအတာနဲ့ပြုလုပ်ပြီး လူထုအားလုံးလွတ်လပ်စွာပြုလုပ်နိုင်ကြမယ့် ခြိမ့်ခြိမ့်သဲအာဇာနည်နေ့ အခမ်းအနားကြီးကိုတော့ မကြာခင်ကာလမှာ ကျွန်မမြင်တွေ့လာမယ်လို့ပေါ့ ……….. ။

အာဇာနည်နေ့အထိမ်းအမှတ် – ကံတက်ကုန်းဘုန်းကြီးကျောင်း

အာဇာနည်နေ့အထိမ်းအမှတ် – မြို့တော်ခန်းမ(၁)

အာဇာနည်နေ့အထိမ်းအမှတ် – ကီးမားတင်ဝင်းခန်း