နိုက်ဂျီးရီးယားတွင် မွတ်စလင်များနှင့် ခရစ်ယာန်များ စုပေါင်း ၀ါဖြေ

ဇူလိုင် ၂၂ ရက်၊ ၂၀၁၂

Source: OnIslam

၂၀၁၂ ဇန်နဝါရီလတွင် မွတ်စလင် ခေါင်းဆောင်များနှင့် ခရစ်ယာန်ခေါင်းဆောင်များ Kano ချခ်ျကျောင်းတွေ တွေ့ဆုံခဲ့စဉ်က Photo-OnIslam

ကိုင်ရို။ ။ သွေးစည်းညီညွတ်မှု ပြယုဂ်အဖြစ် နိုက်ဂျီးရီးယား ခရစ်ယာန်လူငယ်များသည် မြောက်ပိုင်း ကဒူနာ မြို့ရှိ စူလတန် ဘယ်လို (Sultan Bello) ဗလီကြီးတွင် မွတ်စလင်များနှင့် အတူတကွ ၀ါဖြေရန် (ဥပုတ်ထွက်ချိန် အစားအသောက်စားခြင်း) စုရုံးခဲ့ကြပြီး ငြိမ်းချမ်းရေးနှင့် ခန္တီတရားထားရှိရေးသတင်းစကားကိုလည်း ဖြန့်ချီခဲ့ကြသည်။

“ဒီသမိုင်းဝင် ဗလီကြီးမှာ မွတ်စလင်တွေက ခရစ်ယာန်တွေကို အတူ ၀ါဖြေဖို့ ဖိတ်ခေါ်ခဲ့ခြင်းဟာ သိပ်ပြီး အရေးပါပါတယ်။” ဟု နိုက်ဂျီးရီးယား ခရစ်ယာန်လူငယ်များအသင်း (CAN)၏ အကြီးအကဲဖြစ်သူ ဒီဂျီ အိုဘာဒီယာ ဟရူနာ (Diji Obadiah Haruna) က ဇူလိုင် ၂၂ရက် တနင်္ဂနွေနေ့က The Leadership သတင်းစာသို့ ပြောကြားခဲ့သည်။

အဆိုပါ ၀ါဖြေပွဲကို စနေနေ့က ကျင်းပခဲ့ခြင်းဖြစ်ပြီး ရမသွာန်လ ပထမဆုံးရက် ၀ါဖြေခြင်းလည်းဖြစ်သည်။ ထိုအခမ်းအနားသို့ ခရစ်ယာန်ခေါင်းဆောင်များအပါအ၀င် လူငယ် ၁၀၀ ကျော် တက်ရောက်ခဲ့ကြသည်။

မွတ်စလင်နှင့် ခရစ်ယာန်လူငယ်များသည် စားသောက်ဖွယ်ရာများဖြင့် စားပွဲတစ်ခုတည်းတွင်ထိုင်ကာ ၀ါဖြေခဲ့ကြလေသည်။

အဆိုပါအခမ်းအနားကို မွတ်စလင်လူငယ်များအသင်း(Muslim youth division)၏ အကြီးအကဲဖြစ်သူ ဒေါက်တာ ဆူလိုင်မန် ရှူအဘူ ရှင်ကာဖီ (Dr Suleiman Shuabu Shinkafi) နှင့် CAN ခေါင်းဆောင် ဟရူနာ တို့ ပူးပေါင်းခေါင်းဆောင်သော Christian-Muslim Youth Peace Initiative of Nigeria အဖွဲ့မှ ကျင်းပခဲ့ခြင်းဖြစ်သည်။

ခရစ်ယာန်လူငယ်များနှင့်အတူ စုပေါင်းဝါဖြေခြင်းအနှစ်သာရမှာ နိုက်ဂျီးရီးယားနိုင်ငံအတွင်းရှိ ထွေပြားသော အုပ်စုများနှင့် ဘာသာရေးကွဲပြားခြားနားမှုများအကြား ငြိမ်းချမ်းစွာ ယှဉ်တွဲရပ်တည်နိုင်ရေးကို တိုးမြှင့်ရန်ဖြစ်သည်။ ဘာသာတရားများအကြား နားလည်ခြင်းနှင့် သည်းခံခြင်းတို့ကို တိုးမြှင့်ရန် အခွင့်အလမ်းတစ်ခုအဖြစ်လည်း ရှုမြင်ကြသည်။

အစ္စလာမ်ပြက္ခဒိန်တွင် အမြင့်မြတ်ဆုံးဖြစ်သော ရမ်သွာန်လမြတ်သည် နိုက်ဂျီးရီးယားနိုင်ငံတွင် သောကြာနေ့က စတင်ခဲ့သည်။ ဤလမြတ်တွင် အရွယ်ရောက်ပြီးသော မွတ်စလင်မှန်သမျှ နံနက် အရုဏ်တက်ချိန်မှ ညနေ နေ၀င်ချိန်အထိ စားခြင်း၊သောက်ခြင်း၊ ဇနီးမောင်နှံပေါင်းသင်းဆက်ဆံခြင်း စသည်တို့ကို ရှောင်ကျဉ်ရသည်။ ဥပုတ်သီလဆောက်တည်ခြင်းကြောင့် ရောဂါဆိုးရွားမည်ကို စိုးရိမ်ရသောသူများနှင့် ခရီးသွားနေသူများအတွက် ပလပ်ခွင့်ရှိသည်။

မွတ်စလင်များသည် ဥပုတ် သီလဆောက်တည်းခြင်းမှ သည်းခံမှု၊ မိမိကိုယ်ကို ထိန်းချုပ်နိုင်မှု၊ ဘာသာတရားကိုင်းရှိုင်းမှု စသည်တို့ကို သင်ယူရရှိပြီး ၀တ်ပြုခြင်း၊ ကုရ်အာန်ကျမ်းတော်မြတ်အား လေ့လာခြင်းနှင့် ကောင်းမှုကုသိုလ်များ ပြုလုပ်ခြင်းတို့တွင် ရမသွာန်၏ အချိန်များကို နှစ်မြှုပ်ထားကြလေသည်။

အတားအဆီးများအား ချိုးဖျက်သောအရာ။

အဆိုပါ ၀ါဖြေပွဲသည် နိုက်ဂျီးရီးယား လူ့အဖွဲ့အစည်းတွင်းရှိ အနှောက်အယှက်အဟန့်အတားများအား ချိုးဖျက်ရန် ရည်ရွယ်ခြင်းလည်းဖြစ်သည်။

“ပြဿနာတွေဖြစ်တဲ့အချိန်မှာ လူငယ်တွေက အဆိုးဆုံးပါပဲ။ တစ်ဖက်နဲ့ တစ်ဖက် လိုအပ်နေတဲ့ သည်းခံမှုတွေကို ဖန်တီးတည်ဆောက်ချင်တယ်။ ပြီးတော့ အကြမ်းဖက်မှုတွေအတွက် လူငယ်တွေကို အသုံးချတာတွေကို ရပ်တန့်စေချင်တယ်။” ဟု (Christian-Muslim Youth Peace Initiative of Nigeria) အဖွဲ့အတွင်းရှိ မွတ်စလင်လူငယ်များအသင်း (Muslim youth division)၏ အကြီးအကဲ ဒေါက်တာ ရှင်ကဖီ (Dr Shinkafi)က ဆိုသည်။

သူက လူငယ်များအား အဓိပ္ပါယ်ပါပါ စေ့စပ်ဆွေးနွေးပေးရန် အစိုးရအား တိုက်တွန်းပြောကြားထားပြီး၊ သို့မှသာ နိုက်ဂျီးရီးယားလူငယ်များ ကျူးလွန်ကြသော ဒုစရိုက်မှုများ လျော့ကျသွားလိမ့်မည်ဟု ဆိုသည်။

နိုက်ဂျီးရီးယားနိုင်ငံသည် ဘာသာရေးပဋိပက္ခ အဖြစ်ဆုံးနိုင်ငံဖြစ်ပြီး မြောက်ပိုင်း မွတ်စလင်ဒေသနှင့် တောင်ပိုင်း ခရစ်ယာန် ဒေသအဖြစ် ကွဲနေကြသည်။

သန်း ၁၄၀ ရှိသော နိုက်ဂျီးရီးယား လူဦးရေတွင် မွတ်စလင် ၅၅ ရာခိုင်နှုန်းနှင့် ခရစ်ယာန် ၄၀ ရာခိုင်နှုန်းရှိကြပြီး ဒေသအများစုတွင် အေးချမ်းတည်ငြိမ်စွာ နေထိုင်ကြသည်။

ဘာသာပြန်-ဝေဇင်

ကိုးကား-http://www.onislam.net/english/news/africa/458090-nigeria-muslims-christians-share-iftar.html