လက်စ်ဗီးဂက်စ်တွင် ဗြိတိန် ခရီးသည်တင်လေယာဉ်တစ်စီး မီးလောင်

စက်တင်ဘာ ၉၊ ၂၀၁၅
M-Media

– ဗြိတိသျှလေကြောင်းလိုင်းမှ ခရီးသည်တင်လေယာဉ်တစ်စင်းမှာ ယမန်နေ့က အမေရိကန်ပြည်ထောင်စု လက်စ်ဗီးဂက်စ်ရှိ မက်ကာရန် လေဆိပ်တွင် မီးလောင်ကျွမ်းခဲ့ပြီး ခရီးသည် ၁၄ ဦးခန့် ဒဏ်ရာများ ရရှိခဲ့သည်ဟု သိရသည်။

အဆိုပါလေယာဉ်မှာ ဘိုးအင်း ၇၇၇ လေယာဉ်ဖြစ်ပြီး၊ ခရီးသည် ၁၅၉ ဦးနှင့် လေယာဉ်အမှုထမ်း ၁၃ ဦးတို့ လိုက်ပါလာကာ ဒေသစံတော်ချိန် ညနေ ၄ နာရီကျော်ခန့်၌ လန်ဒန်သို့ ပျံသန်းရန် ဆောင်ရွက်နေစဉ် ပြေးလမ်းမပေါ်၌ ဘယ်ဘက်အင်ဂျင် မီးလောင်ခဲ့ခြင်းဖြစ်သည်။

ကလာ့က်ကောင်တီ မီးသတ်ဌာနမှ ဒုတိယအကြီးအကဲ ဂျွန်ကလာဆန်ကမူ ဒဏ်ရာရသူများမှာ လေယာဉ်ပေါ်မှ အရေးပေါ် လေထိုးလျှောဖြင့် ဆင်းစဉ် ထိခိုက်ခဲ့ခြင်းဖြစ်သည်ဟု ပြောကြားခဲ့သည်။

ဒဏ်ရာရရှိသူများတွင် တစ်ဦးအပါအ၀င်ဖြစ်သည့် ခရီးသည် ဂျေး ဂျန်နင်းကမူ လေယာဉ်ပျံသန်းရန် အဆင်သင့်ဖြစ်နေစဉ် ခပ်အုပ်အုပ်အသံတစ်ခု ကြားသောကြောင့် ပြတင်းပါက်ဖွင့်၍ ကြည့်ရှုခဲ့ရာ အင်ဂျင်မီးလောင်နေသည်ကို တွေ့ခဲ့ရသည်ဟု ပြောကြားခဲ့သည်။

ထို့နောက် လေယာဉ်မှူးက အရေးပေါ်အခြေအနေဖြစ်နေ၍ ခရီးသည်များအား ကယ်ထုတ်ရမည်ဟု စကားပြောစက်မှတစ်ဆင့် ပြောကြားခဲ့ပြီး လေယာဉ်အမှုထမ်းများက ခရီးသည်များအား ဘေးလွတ်ရာသို့ ရောက်ရှိရန် ညွှန်ကြားနိုင်ခဲ့သည်ဟု ဆိုသည်။

ထိုအဖြစ်အပျက်အတွက် ဘိုးအင်းကလည်း ကြေညာချက်တစ်စောင် ထုတ်ပြန်ခဲ့ပြီး လက်စ်ဗီးဂက်စ်ရှိ မက်ကာရန်လေဆိပ်တွင် ဖြစ်ပျက်ခဲ့သော ထိုအဖြစ်အပျက်ကို မိမိတို့က သိရှိပြီး သတင်းအချက်အလက်များ ပိုမိုစုဆောင်းရန် အဖွဲ့တစ်ခုကို စေလွှတ်ထားကြောင်း ဖော်ပြခဲ့သည်။

Ref: CNN