နိုင်ငံတကာသတင်းတို (စက်တင်ဘာ ၂၀၁၅)

စက်တင်ဘာ ၂၀၁၅
M-Media

အီဂျစ်လုံခြုံရေးတပ်ဖွဲ့၏ မှားယွင်းပစ်ခတ်မှုကြောင့် ကမ္ဘာလှည့်ခရီးသည်များ သေဆုံး
……………………………………
အီဂျစ်နိုင်ငံအနောက်ပိုင်းရှိ သဲကန္တာရတစ်ခုတွင် စစ်သွေးကြွများအား ရှာဖွေနေစဉ် လုံခြုံရေးတပ်ဖွဲ့များက ကမ္ဘာလှည့်ခရီးသွား အုပ်စုအား မှားယွင်း ပစ်ခတ်မှုကြောင့် မက္ကဆီကိုနိုင်ငံသား ၈ ဦးနှင့် အီဂျစ်နိုင်ငံသား ၄ ဦး စုစုပေါင်း ၁၂ ဦး သေဆုံးခဲ့သည်ဟု အီဂျစ် ပြည်ထဲရေးဝန်ကြီးဌာနက သတင်းထုတ်ပြန်ခဲ့သည်။ ထို့ပြင် အခြား မက္ကဆီကိုနိုင်ငံသား ၈ ဦးနှင့် အီဂျစ် ၂ ဦးမှာ ဒဏ်ရာရရှိခဲ့သည်။

တောမီးကြောင့် အင်ဒိုနီးရှား ပြည်နယ်တစ်ခု အရေးပေါ်အခြေအနေ ကြေငြာခဲ့ရ
……………………………………………
တောမီးလောင်မှုကြောင့် ဖြစ်လာသော မီးခိုးငွေ့များဖြင့် ဖုံးလွှမ်းနေသည့် ဆူမားတြားကျွန်းမှ ရီအူပြည်နယ်ကို အင်ဒိုနီးရှားအစိုးရက ယနေ့တွင် အရေးပေါ်အခြေအနေ ကြေငြာခဲ့သည်။ တောမီးလောင်မှုမှာ ပြင်းထန်လာသောကြောင့် ရေပါသည့်ဗုံးများကြဲချရန်နှင့် ဓာတုဗေဒနည်းဖြင့် မိုးတိမ်တုဖန်တီးကာ မိုးရွာချရန် အင်ဒိုနီးရှားက ပြင်ဆင်နေသည်။ အဆိုပါတောမီးမှ မီးခိုးများမှာ အိမ်နီးချင်း မလေးရှားနှင့် စင်ကာပူတို့ကိုပါ ပြန့်နှံ့ခဲ့ပြီး စင်ကာပူတွင် ပြုလုပ်မည့် ဂရင်းပရီ ကားမောင်းပြိုင်ပွဲကိုပါ ထိခိုက်နိုင်ဖွယ် ရှိနေသည်။

ဂျပန်စစ်သားများအတွက် ဥပဒေအသစ် ပြည်သူထက်ဝက်ကျော် ကန့်ကွက်
………………………………………
ဒုတိယကမ္ဘာစစ်နောက်ပိုင်း ပထမဆုံးအဖြစ် ဂျပန်စစ်တပ်များ နိုင်ငံရပ်ခြားတွင် သွားရောက်တိုက်ခိုက်မှုကို ခွင့်ပြုမည့် ဥပဒေကို ဂျပန်နိုင်ငံသား ထက်ဝက်ကျော် ၅၄ ရာခိုင်နှုန်းက ကန့်ကွက်ခဲ့သည်ဟု ပြီးခဲ့သည့် နှစ်ရက်အတွင်း Asahi Shimbun သတင်းစာမှ စစ်တမ်းကောက်ယူမှုအရ သိရသည်။ ဂျပန်ဝန်ကြီးချုပ် ရှင်ဇိုအာဘေးကမူ စက်တင်ဘာ ၂၇ ရက်နေ့တွင် အဆုံးသတ်မည့် ပါလီမန်အစည်းအဝေးအတွင်း အဆိုပါ ဥပဒေကို ပြဌာန်းချင်နေသည်။ မဲပေးမှုတွင် ပြည်သူများ၏ ၂၉ ရာခိုင်နှုန်းသာ ထောက်ခံခဲ့သည်။

Ref: News Agencies