ဘန်ကောက်ရှိ ဧရာဝဏ်နတ်ကွန်း ဗုံးပေါက်မှု အဓိကတရားခံကို ထိုင်းကြေငြာ

စက်တင်ဘာ ၂၆၊ ၂၀၁၅
M-Media

– ဘန်ကောက်ရှိ ဧရာဝဏ်နတ်ကွန်း ဗုံးပေါက်ကွဲမှုနှင့် ပတ်သက်၍ ပထမဆုံး ဖမ်းဆီးထားသည့် အဒီမ်း ကာရာဒက်ဂ်မှာ လုံခြုံရေးကင်မရာတွင် တွေ့ခဲ့ရသည့် နတ်ကွန်းသို့ ၀င်ရောက်ဗုံးထောင်ခဲ့သူ ဖြစ်သည်ဟု ထိုင်းရဲတပ်ဖွဲ့က ပြောကြားလိုက်ပြီး၊ ယခင် ထုတ်ပြန်ချက်များနှင့် ကွဲလွဲနေသည်။

သြဂုတ်လ ၁၇ ရက်နေ့က ဖြစ်ပွားခဲ့သည့် ထိုပေါက်ကွဲမှုအတွင်း လူ ၂၀ သေဆုံးခဲ့ပြီး ရဲတပ်ဖွဲ့ ပြောရေးဆိုခွင့်ရှိသူ ပရာဝပ် သာဗွန်ဆီရီက နတ်ကွန်းရှိ ခုံတွင် ဗုံးပါသည့် ကျောပိုးအိတ် ထားခဲ့သည်ကို ကင်မရာ၌ မြင်တွေ့ခဲ့ရသော အင်္ကျီအ၀ါနှင့်လူမှာ ၎င်းတို့ ဖမ်းဆီးထားသူ နိုင်ငံခြားသားဖြစ်သည်ဟု ယနေ့တွင် ပြောကြားခဲ့သည်။

“လုံခြုံရေးကင်မရာ၊ မျက်မြင်သက်သေတွေရဲ့ ပြောကြားမှုနဲ့ ၎င်းရဲ့ထွက်ဆိုချက်တွေအရ အဒီမ်းဟာ အင်္ကျီအ၀ါနဲ့လူ ဖြစ်တယ်ဆိုတာ အတည်ပြုနိုင်ခဲ့ပါပြီ။ အခင်းဖြစ်ရာနေရာမှာ ဗုံးထားခဲ့ပြီးနောက် သူဟာ ဆိုင်ကယ်တက္ကဆီကို ခေါ်ခဲ့ပြီး သူ့အင်္ကျီကိုလည်း လွမ်ပီနီပန်းခြံက နားနေဆောင်မှာ လဲခဲ့ပါတယ်” ဟု သာဗွန်ဆီရီက ဆိုသည်။

အဒီမ်းမှာ ကြိုတင်စီမံ၍ လူသတ်မှုအပါအ၀င် စွဲချက် ၈ ခုဖြင့် တရားစွဲဆိုခြင်း ခံထားရသည်။ သို့သော်လည်း အဒီမ်း၏ ရှေ့နေဖြစ်သူ ချက်က်ချာ့တ် ကန့်ပ်ဟိုင်ကမူ ၎င်း၏အမှုသည်မှာ အပြစ်မဲ့သည်ဟု ပြောကြားခဲ့သည်။

“(လုံခြုံရေးကင်မရာက) အ၀ါရောင်အင်္ကျီနဲ့လူရဲ့ ပုံပန်းသွင်ပြင်နဲ့ အဒီမ်းဟာ မကိုက်ညီပါဘူး။ သူ ၀န်ခံမယ်လို့လည်း ကျွန်တော် မယုံဘူး”

ထိုဗုံးကွဲမှုအတွက် ဖမ်းဆီးခံထားရသူနှစ်ဦးမှ အခြားတစ်ဦးဖြစ်သူ ယူဆူဖူ မီရိုင်လီမှာ ဆက်လက်ထိန်းသိမ်းခံနေရဆဲဖြစ်ပြီး၊ ၎င်းမှာ ဗုံးကို မိုဘိုင်းဖုန်းဖြင့် ဖောက်ခွဲခဲ့သည်ဆိုသော ပြောကြားမှုအတွက် ရဲတပ်ဖွဲ့က သက်သေအထောက်အထား ဖော်ပြခဲ့ခြင်းမရှိချေ။

ရဲတပ်ဖွဲ့မှာ စောစောပိုင်းက ဖမ်းဆီးထားသူ နှစ်ဦးစလုံး ဗုံးခွဲသူမဖြစ်နိုင်ဟု ပြောကြားခဲ့သည်။ ထို့ပြင် မီရိုင်လီမှာ ထိုတိုက်ခိုက်မှုကို ပူးပေါင်းဆောင်ရွက်ခဲ့သော်လည်း ဗုံးအား စနတ်တံ ဖြုတ်ခဲ့သူမဟုတ်ဟုလည်း ပြောထားဖူးသည်။

Ref: Aljaeera