ကားများ၏ ကာဘွန်ထုတ်လွှတ်မှု စစ်ဆေးခြင်းကို အမေရိကန် ပိုမိုတင်းကြပ်မည်

အောက်တိုဘာ ၃၊ ၂၀၁၅
M-Media

– ဗောက်စ်ဝဂွန် ကားထုတ်လုပ်ရေးမှ ၎င်းတို့ ဒီဇယ်ကားများ၏ ကာဘွန်ထုတ်လွှတ်မှုအတွက် ဓာတ်ခွဲခန်းစမ်းသပ်မှုတွင် ဆော့ဖ်ဝဲတစ်ခုသုံးကာ လိမ်ညာခဲ့သည့် ပြဿနာ ပေါ်ထွက်လာပြီးနောက် အမေရိကန် သဘာဝပတ်ဝန်းကျင် ထိန်းသိမ်းရေး အေဂျင်စီ EPA က ကားများ ကာဘွန်ထုတ်လွှတ်မှု စစ်ဆေးခြင်းကို ပိုမိုတင်းကြပ်လိုက်သည်ဟု ယမန်နေ့တွင် ပြောကြားခဲ့သည်။

“စမ်းသပ်မှုစနစ်ကို ကျွန်တော်တို့ လုံးဝ ပြောင်းလဲလိုက်ပါပြီ။ စမ်းသပ်တွက်ချက်မှုအသစ်တွေကို ကျွန်တော်တို့ ပေါင်းထည့်ခဲ့ပြီး ထုတ်လုပ်တပ်ဆင်ပြီးသွားတဲ့ ယာဉ်တွေ၊ ထုတ်လုပ်တပ်ဆင်ဆဲ ယာဉ်တွေနဲ့ အသုံးပြုနေတဲ့ယာဉ်တွေကိုပါ ဒီစနစ်နဲ့ စမ်းသပ်သွားမှာပါ” ဟု EPA ၏ သယ်ယူပို့ဆောင်ရေးနှင့် လေထုအရည်အသွေးဆိုင်ရာရုံးမှ ဒါရိုက်တာဖြစ်သူ ခရစ္စတိုဖာ ဂရန်ဒလာက ပြောကြားခဲ့သည်။

ထိုကဲ့သို့ တင်းကြပ်သော စမ်းသပ်မှုများကြောင့် ကားထုတ်လုပ်ရေးလုပ်ငန်းများမှာ ပိုမိုကုန်ကျမည်ဖြစ်သည်။ ဗောက်စ်ဝဂွန်ကားများ၏ ပြဿနာ ပေါ်လာပြီးနောက်ပိုင်း သဘာဝပတ်ဝန်းကျင် ထိန်းသိမ်းရေးအဖွဲ့များက ကားအားလုံး၏ ကာဘွန်ထုတ်လွှတ်မှုပမာဏကို မောင်းနှင်နေစဉ် ကြားဖြတ်စမ်းသပ်ရန် တိုက်တွန်းခဲ့ကြသည်။

Ref: Channelnewsasia